ارىستاعى اپاتتان زارداپ شەككەن حالىقتى قولداۋعا باعىتتالعان كومەك ءالى جالعاسىپ جاتىر. جۋىردا «نۇرلى استانا» كورپوراتيۆتىك قورى ەلوردالىق كاسىپكەرلەرگە ۇندەۋ جاريالاپ, ارىستىقتارعا كومەك بەرۋگە شاقىردى. «زارداپ شەككەن قالانىڭ 9-شى سەكتورىنداعى تۇرعىن ۇيلەر مەن ينفراقۇرىلىمدىق نىسانداردى قالپىنا كەلتىرۋ نۇر-سۇلتان قالاسىنا جۇكتەلدى. بۇل سەكتوردا 700-گە جۋىق ۇيلەر بار. ەلوردالىق 15 قۇرىلىس بريگاداسى پالاتالىق لاگەردە ورنالاسىپ, 2 ءتورت قاباتتى, 58 ەكى قاباتتى ۇيلەردى قالپىنا كەلتىرۋدە. نۇر-سۇلتانداعى كاسىپورىندار مەن ۇيىمداردان ءالى دە قاراجات جينالۋدا. مۇنداي قيىندىق اركىمنىڭ باسىنا كەلۋى مۇمكىن. سوندىقتان كومەك قولىن سوزايىق» دەلىنگەن اتالعان قور تاراتقان حابارلامادا.
قارجى مينيسترلىگى ارىس تۇرعىندارىن 2019 جىلدىڭ سوڭىنا دەيىن سالىق تولەۋدەن بوساتتى. قارىزى بار سالىق تولەۋشىلەرگە سالىعىن ءبولىپ تولەۋگە نەمەسە كەيىن تولەۋگە مۇمكىندىك بەرىلەدى. ول ءۇشىن سالىق تولەۋشىلەر مۇلكىن نەمەسە بانكتەگى كەپىلدەمەسىن كەپىلگە قويۋى قاجەت. «كانيكۋل» كەزىندە ارىستىقتارعا ءوسىمپۇل قولدانىلمايدى. بۇعان قوسا, ولارعا سالىقتى وندىرۋدە ماجبۇرلەۋ شارالارى مەن تاسىلدەرى قولدانىلمايدى. مەملەكەتتىك كىرىستەر كوميتەتى ارىسقا سالىق باقىلاۋىن جۇرگىزبەيدى. مۇنداي جەڭىلدىكتەر ارىستا تىركەلگەن 792 زاڭدى تۇلعاعا, 3085 جەكە كاسىپكەرگە جانە 65 465 ازاماتتىق تۇلعاعا قاتىستى بولماق.
ارىستاعى Halyk Bank سالىمشىلارىنا قارىزى بويىنشا جارتى جىلعا دەيىن نەگىزگى نەسيەنى تولەۋ كەيىنگە شەگەرىلدى. بانكتىڭ ءباسپاسوز قىزمەتى حابارلاعانداي, قارجى ينستيتۋتىنىڭ باسشىلىعى ارىستاعى بانك سالىمشىلارى مەن كاسىپكەرلەردى قولداۋ ماقساتىندا قارىز بويىنشا اقى تولەۋدى توقتاتتى. شىلدە ايىنىڭ باسىنداعى احۋال بويىنشا, ارىستا Halyk Bank-ءتىڭ 3 639 سالىمشىسى بار ەكەن, ولاردىڭ بانككە جالپى قارىزىنىڭ كولەمى 3,3 ملرد تەڭگەدەن اسادى.
ەۋرازيالىق توپ (ERG) باسشىلىعى اپاتتان زارداپ شەككەندەرگە 400 ملن تەڭگە كولەمىندە جاردەم بەرەدى. بۇل تۋرالى ەۋرازيالىق توپتىڭ (ERG) ءباسپاسوز قىزمەتى حابارلادى. «ەۋرازيالىق توپتىڭ باسشىلىعى اپاتتان زارداپ شەككەن قالانىڭ تۇرعىندارىن قولداۋ ماقساتىندا كومپانيانىڭ بيۋدجەتىنەن 400 ملن تەڭگە اقشا ءبولىپ, ارىستىقتارعا جىبەرەدى» دەلىنگەن حابارلامادا.
ارىس ارقىلى وتەتىن پويىزداردىڭ قوزعالىسى قالپىنا كەلتىرىلدى. «جولاۋشىلار تاسىمالى» اق-نىڭ باسشىلىعى جولاۋشىلاردى تاسىمالداۋ ۇدەرىسىنە كومەك بەرگەنى ءۇشىن تۇركىستان, جامبىل, قىزىلوردا وبلىستارىنىڭ, الماتى مەن شىمكەنت قالالارىنىڭ اكىمدىكتەرىنە, مەتسەناتتار مەن ۆولونتەرلەرگە, سونداي-اق ءىىم-ءنىڭ توتەنشە جاعدايلار جونىندەگى كوميتەتىنە العىس ءبىلدىردى. كومپانيانىڭ ءباسپاسوز قىزمەتى تاراتقان مالىمەت بويىنشا, توتەنشە جاعداي بولىپ جاريالانعان, 24-27 ماۋسىم كۇندەرى تاراز, شىمكەنت, تۇركىستاننان كەلگەن پويىزدارمەن جانە اۆتوبۋستارمەن 15 مىڭنان اسا جولاۋشى جەتكىزىلگەن. قاربالاس كۇندەردە كاسسالاردان بيلەت العان جولاۋشىلاردىڭ 50 ملن تەڭگەسى وزدەرىنە قايتارىلعان. ايتا كەتەلىك, ارىستاعى اپات كەزىندە پويىزداردىڭ قاڭتارىلىپ قالۋىنان 8 مىڭنان اسا جولاۋشىلار ۆوكزالداردا قالعان بولاتىن.
