ءاسانالىنى الەم ارداقتايدى
ەلوردادا وتكەن سەنبى كۇنى «ەكسپو-2017» حالىقارالىق مامانداندىرىلعان كورمەسىنىڭ مادەني باعدارلاماسى اياسىندا قازاقستاننىڭ ەڭبەك ەرى, كسرو حالىق ءارتىسى, مەملەكەتتىك سىيلىقتىڭ لاۋرەاتى ءاسانالى ءاشىموۆتىڭ 80 جىلدىعىنا ارنالعان «استانا» I دۇنيەجۇزىلىك تەاتر فەستيۆالى شىمىلدىعىن ءتۇردى. مۇنىمەن قوسا ايگىلى ءارتىستىڭ قۇرمەتىنە كينوپتالىق اشىلدى.
كينواپتالىقتى «قازاقفيلم» اق مادەنيەت جانە سپورت مينيسترلىگىنىڭ تاپسىرىسىمەن تۇسىرگەن «سىر تۇنعان ايسبەرگ» اتتى ومىرباياندىق دەرەكتى فيلم اشتى. كينوتۋىندىدا ساحنا مايتالمانىنىڭ ءومىرى مەن شىعارماشىلىعى جايلى سىر شەرتىلىپ, ءارىپتەستەرى مەن دوستارى ەستەلىكتەرمەن ءبولىستى. وتباسى مۇشەلەرى دە ءسوز سويلەدى.
«ءاسانالى ءاشىموۆ سياقتى بىرەگەي تۇلعانىڭ تاعدىرىن ءبىر فيلمگە سىيدىرۋ مۇمكىن ەمەس. سوندىقتان ءفيلمدى ءتۇسىرۋ وتە كۇردەلى بولدى. ءاسانالى اعا مەن ءۇشىن اڭىز ادام. ول تۋرالى ءفيلمدى جاستاردان قۇرالعان شىعارماشىلىق ۇجىم بولىپ تۇسىردىك. كارتينانى تۇسىرۋگە 4 اي ۋاقىت جۇمسادىق. بۇيىرتسا, قىركۇيەك ايىندا كارتينا الماتىدا جالپاق جۇرتقا كورسەتىلەدى» دەيدى فيلم رەجيسسەرى ولجاس بايالباەۆ.
كينواپتالىق 23 ماۋسىمعا دەيىن سوزىلادى. ال دۇنيەجۇزىلىك تەاتر فەستيۆالى ءالى ءبىر اپتاعا, ياعني 26 ماۋسىمعا دەيىن جالعاسادى. وسىعان وراي بەيبىتشىلىك جانە كەلىسىم سارايىندا ساحنا ساڭلاعىنىڭ ءومىرى مەن ونەرىنە ارنالعان كورمە اشىلدى. كورەرمەندەر بۇل كورمەنى ارالاپ, العاشقى كۇنى «استانا – ميۋزيكل» تەاترى قويعان ج.پرەسگۋرۆيكتىڭ «رومەو مەن دجۋلەتتا» ميۋزيكلىن تاماشالادى.
فەستيۆالگە ەلىمىزدىڭ اتىنان ۋ.شەكسپيردىڭ «اساۋعا تۇساۋ» كومەدياسىن ساحنالاعان «جاستار» تەاترى, ر.وتارباەۆتىڭ «بەيبارىس سۇلتان» تاريحى دراماسىن كورەرمەنگە ۇسىنعان م.اۋەزوۆ اتىنداعى قازاق مەملەكەتتىك اكادەميالىق دراما تەاترى, بۇگىن ش.ايتماتوۆتىڭ «قىزىل ورامالدى شىنارىم» ليريكالىق دراماسىمەن ساحناعا شىعاتىن ق.قۋانىشباەۆ اتىنداعى مەملەكەتتىك اكادەميالىق قازاق مۋزىكالىق دراما تەاترى قاتىسىپ جاتىر.
سونداي-اق, ەۋروپا مەن ازيانىڭ ۇجىمدارى – ا.پ.چەحوۆ اتىنداعى ماسكەۋ كوركەم تەاترى (رەسەي), يانكا كۋپالا اتىنداعى ۇلتتىق اكادەميالىق تەاترى (بەلارۋس), قىتاي ۇلتتىق تەاترى (قحر), داۋگاۆپيلس تەاترى (لاتۆيا), كورەي رەسپۋبليكاسىنىڭ «مۋلكيول» تەاترى (وڭتۇستىك كورەيا), شوتا رۋستاۆەلي اتىنداعى مەملەكەتتىك كاسىبي دراما تەاترى (گرۋزيا), بەرلين دراما تەاترى جانە ك.جانتوشەۆ اتىنداعى ىستىقكول وبلىستىق مۋزىكالىق دراما تەاترى (قىرعىزستان) كەلىپ قاتىسۋدا. قىرعىز باۋىرلارىمىز قازاق قالامگەرى, مەملەكەتتىك سىيلىقتىڭ لاۋرەاتى ءسابيت دوسانوۆتىڭ «ادامزاتتىڭ اناسى» شىعارماسىن الىپ كەلدى.
ال قازىلار القاسىنىڭ قۇرامىندا سيرەجول ماري-كريستين (فرانتسيا), ميلكوۆسكي توماش (پولشا), يسرافيل يسرافيلوۆ – ء(ازىربايجان), گەورگي پرياحين (رەسەي) جانە لاشا چحارتيشۆيلي (گرۋزيا) سىندى تەاتر ماماندارى بار. ال توراعا – ءاسانالى ءاشىموۆ.فەستيۆالدىڭ شىمىلدىعىن 26 ماۋسىم كۇنى «قازاقستان» ورتالىق كونتسەرت زالىندا وتەتىن مەرەيتوي يەسىنىڭ شىعارماشىلىق كەشى جابادى.
امانعالي قالجانوۆ,
قۇندىز قاناعاتقىزى