4-5 ناۋرىز كۇندەرى ەلوردادا جالپىقالالىق سەنبىلىك وتەدى. كۇن جىلىنا باستاعاندا قىس بويى قولدارىنان كۇرەك تۇسپەگەن كوممۋنالدىق قىزمەتكەرلەردىڭ جۇمىسى ودان سايىن كۇردەلەنە تۇسەدى. بيىل ەلوردادا ادەتتەگىدەن تىم كوپ ءتۇسكەن قاردىڭ ەرۋى سۋ باسۋ قاۋپىن كۇشەيتەتىنى انىق.
بۇل جاعدايدىڭ الدىن الۋعا قالا تۇرعىندارىنىڭ دا بەيجاي قاراماعانى ماڭىزدى.
وسى ماقساتتا استانالىقتاردى اسارلاتىپ قار كۇرەۋگە شاقىرعان «كوكتەمگى استانا» اتتى جالپىقالالىق سەنبىلىگى ۇيىمداستىرىلادى.
قالا تۇرعىندارىن ورتاق ىسكە ۇيىستىراتىن شارا ەڭ الدىمەن سۋ تاسقىنىنىڭ الدىن الۋعا باعىتتالىپ وتىر. بۇل تۋرالى ەلوردا اكىمدىگىنىڭ ءباسپاسوز ورتالىعىندا وتكەن جيىندا كوممۋنالدىق شارۋاشىلىق باسقارماسىنىڭ باسشىسى نۇرلان سولتامبەكوۆ پەن «استانا تازالىق» جشس ديرەكتورى بورانباي بولاتبەكوۆ ەگجەي-تەگجەيلى ايتىپ بەردى.
بۇل سەنبىلىكتىڭ بۇرىنعىدان وزگەشەلىگى – شاھار جۇرتىنىڭ قىستان قالعان قوقسىقتى جيىپ-سىپىرۋعا عانا ەمەس, كۇرەلمەي قالعان كۇرتىك قاردى تازالاۋعا كۇش بىرىكتىرۋى. وسىلايشا تۇرعىنداردىڭ تىرلىگىمەن كوممۋنالدىق قىزمەتكەرلەردىڭ ءبىرشاما شارۋاسى تۇگەسىلىپ قالماق.
سەنبىلىك ەكى كەزەڭنەن تۇرادى. الدىمەن ەلوردالىقتاردىڭ قولعابىس ەتۋىمەن اۋلالاردىڭ قارى كۇرەلەدى. بۇل شارا ەكى كۇنگە سوزىلادى. ودان كەيىن قالعان شارۋانى قالانىڭ تازالىقشىلارى وزدەرى جايعاستىرادى. ياعني, جينالعان قار ىرگەدەگى پوليگوندارعا شىعارىلادى.
استانا قالاسىنىڭ كوممۋنالدىق شارۋاشىلىق باسقارماسىنىڭ باسشىسى نۇرلان سولتامبەكوۆتىڭ ايتۋىنشا, اتالمىش ىسكە 600-گە جۋىق جاستار اتسالىسۋعا نيەت ءبىلدىرىپ وتىر. ولار جالعىزىلىكتى قارتتاردىڭ, مۇمكىندىگى شەكتەۋلى جانداردىڭ, كومەككە مۇقتاج ادامداردىڭ ۇيىنە بارىپ, اۋلالارىن تازالاۋعا, جيناپ-رەتتەۋگە قول ۇشىن سوزادى.
ەلوردا اكىمدىگىنىڭ تاراپىنان بۇل شارۋاعا 180 ارناۋلى تەحنيكا تارتىلادى. ونىڭ 30-ى اۋلا ىشىندەگى قارلاردى جيناۋعا جەگىلسە, 150-ءى قاردى تيەپ, قالا سىرتىنا شىعارادى.
«استانا تازالىق» مەكەمەسىنىڭ باسشىسى بورانباي بولاتبەكوۆ قىس باستالعالى قالادا 4,4 ملن تەكشە مەتر قار جينالعانىن مالىمدەدى. بۇل – قار كۇرەۋ جۇمىستارىنىڭ وتكەن جىلمەن سالىستىرعاندا ەسەلەنە تۇسكەنىنىڭ ايعاعى. بىلتىر ءبىر قىستا جالپى 2,5 ملن تەكشە مەتر قار شىعارىلعان. ال بيىل جەردىڭ ءالى اعارىپ جاتقانىن ەسكەرسەك, تازالاناتىن قاردىڭ اۋقىمى 5,5 ملن تەكشە مەترگە دەيىن جەتۋى ىقتيمال.
جالپى قازىرگى ۋاقىتتا استانادا قار كۇرەۋ شارۋاسىنا 353 تەحنيكا مەن 25 مەردىگەرلىك ۇيىم جۇمىلدىرىلعان.
بۇگىندە استانادا كوكتەمگى سۋ تاسقىنىنا قارسى شارالاردىڭ كەشەندى جوسپارى ازىرلەنگەن. قازىر سۋ باسۋ قاۋپى بار 37 ايماق – باقىلاۋدا. اسىرەسە, كوكتال, يلينكا, ءوندىرىس, جەلەزنودوروجنىي, پريگورودنىي, وڭتۇستىك-شىعىس, جاڭا تەمىرجول ۆوكزالى, اۋەجاي, گاز اپپاراتۋراسىنىڭ ايماقتارى ايرىقشا قاداعالانۋدا.
اۋلالار تازالىعىن تارتىپكە كەلتىرەردە كاسىپورىن نىساندارىنىڭ ماڭىنداعى قاردىڭ كۇرەلۋىنە ءمان بەرىلەدى. ماسەلەن, سارىارقا اۋدانىنىڭ اكىمدىگى وتكەن اپتادا ەسىك الدىنداعى قارىن جيناماعانى ءۇشىن 500-گە جۋىق كاسىپكەرگە ەسكەرتۋ بەرگەن. ونىڭ ءبىرازىنا ايىپپۇل بەلگىلەنىپ, اكىمشىلىك جازاعا تارتىلعان. سوندىقتان بۇل سەنبىلىكتەن قالا تۇرعىندارىمەن قاتار, شاعىن جانە ورتا بيزنەس وكىلدەرىنىڭ قالىس قالماعانى ابزال.
ورىنبەك وتەمۇرات
