«استانا» راديوسى قالا كۇنىنە وراي مۋزىكالىق فەستيۆال ۇيىمداستىردى. اشىق اسپان استىنداعى «Astana FM ON AIR» مۋزىكالىق كونتسەرتى «بايتەرەك» مونۋمەنتىنىڭ جانىندا ءوتتى.
ساحنادا بەيبىت قورعان, دوس, ارگونيا, گۇلسىم مىرزابەكوۆا, ايري, ەڭلىك, رۋحيا, ايسۇلتان, تەمىرلان مەن ەرنات, «الداسپان» توبى جانە ەلىمىزدىڭ باسقا دا ەسترادا جۇلدىزدارى ونەر كورسەتىپ, قالىڭ تىڭدارمانعا بەلگىلى تۋىندىلارىمەن جاڭا اندەرىن تارتۋ ەتتى. كەشتى اتالمىش راديو ديدجەيلەرى جۇرگىزدى.ساحنادا, نەگىزىنەن, ەلوردامىزدىڭ باستى راديوسىندا قويىلىپ جۇرگەن اندەر شىرقالدى.
– ءداستۇرلى جوبا بۇعان دەيىن ەلوردامىزدا جىلدا تۇراقتى تۇردە ۇيىمداستىرىلىپ تۇراتىن. الايدا پاندەميا سالدارىنان ءۇزىلىس الۋعا ءماجبۇر بولعان ەدىك. ەندى, مىنە, جاڭا لەپپەن قايتا جاڭعىرتىپ وتىرمىز. ەلىمىزدەگى بىرەگەي كونتسەرتتىڭ ءبىرى سانالاتىن بۇل شاراعا ەلوردالىقتار مەن قالا قوناقتارى جوعارى باعاسىن بەردى, – دەدى «استانا» راديوسىنىڭ ديرەكتورى سىمبات تاناشەۆا.
مەرەكەلىك ءىس-شارا نۇر-سۇلتان قالاسى مادەنيەت باسقارماسىنىڭ قولداۋىمەن ءوتتى.
