كەشە بەيبىتشىلىك جانە كەلىسىم سارايى الاڭىندا دجۋزەپپە ۆەرديدىڭ «ايدا» وپەراسى ۇسىنىلدى. ەلوردا كۇنىنە وراي ۇيىمداستىرىلعان شارا اشىق اسپان استىندا ءوتتى.
وسى جونىندە بۇرناعى كۇنى قر پرەزيدەنتى جانىنداعى ورتالىق كوممۋنيكاتسيالار قىزمەتىندە وتكەن ءباسپاسوز ءماسليحاتىندا «استانا وپەرا» مەملەكەتتىك وپەرا جانە بالەت تەاترىنىڭ ديرەكتورى تولەۋبەك الپيەۆ تولىعىراق مالىمەت بەردى. «بۇل سپەكتاكلدى ءبىز استانا كۇنىنە ارناپ وتىرمىز. اشىق اسپان استىنداعى قويىلىم – تەاترداعى ەرەكشە جانر. وندا تەاترالدىق الاڭنىڭ اۋقىمدىلىعى, ساحنانىڭ ەرەكشە ورنالاسۋى, ارتىستەردىڭ كەڭ قۇرامى, ۇلكەن اۋديتوريا, سونىمەن قاتار, ارناۋلى جارىق پەن بەينەاپپاراتۋرا سياقتى كوپتەگەن فاكتورلار ەسكەرىلەدى» دەدى ول.
جوباعا قازاقستاندا ءجۇرىپ بىرنەشە تاماشا قويىلىمدار جازعان, سونىڭ ىشىندە ەلوردالىق تەاتردىڭ ماڭدايالدى قويىلىمى – «ءبىرجان-سارا» وپەراسىنىڭ اۆتورى, تانىمال رەسەيلىك ءارتىس يۋري الەكساندروۆ جەتەكشىلىك ەتتى. ونىڭ ايتۋىنشا, قويىلىم بارىسىندا مىسىرلىق احۋال اۋانى تولىقتاي بەرىلىپ, ارنايى كوستيۋمدەر مەن دەكوراتسيالار ۇتىمدى قولدانىلدى. سونداي-اق, رەجيسسەر قاربالاسى مول جۇمىستىڭ بارلىعى استانالىق كورەرمەندەر ءۇشىن جاسالعانىن, اۋقىمى كەڭ قويىلىمدى اشىق اسپان استىندا ۇيىمداستىرۋ وڭايعا تۇسپەگەنىن ايتتى.
اتالعان سپەكتاكلدە رادامەستىڭ پارتياسىن ورىنداۋ ءۇشىن ارنايى بولگاريادان تەنور كامەن چانەۆ شاقىرىلدى. باستى رولدە «استانا وپەرا» تەاترىنىڭ جەتەكشى ءسوليسى جۇپار عابدۋللينا وينايدى. امنەريس پارتياسىن – قر ەڭبەك سىڭىرگەن قايراتكەرى دينا حامزينا, اموناسرونى قر ەڭبەك سىڭىرگەن قايراتكەرى تالعات مۇساباەۆ سومدادى. ال, ارمەنيانىڭ حالىق ءارتىسى بارسەگ تۋمانيان اعا ابىز رامفيس بولىپ شىعادى. قويىلىمعا سوليستەر, حور, بالەت پەن ميمانس ارتىستەرىن قوسقاندا ءۇش جۇزدەي ادام قاتىستى. ال ديريجەرلىق تىزگىن قر ەڭبەك سىڭىرگەن قايراتكەرى, ماەسترو ابزال مۇحيتدينوۆتىڭ قولىندا بولدى.
اسەم سازدىڭ سارىنىندا كورسەتىلگەن كوركەم كورىنىستەر, سالتاناتتى شەرۋ, بي مەن شيەلەنىسكەن قايشىلىقتارعا تولى دراما اشىق الاڭدا ويداعىداي ءوتىپ, كورەرمەن كوڭىلىنەن شىقتى.
كۇنايىم ساكەن
