بەيسەنبى كۇنى كەشكە «قازاق ەلى» مونۋمەنتىنىڭ الدىنداعى الاڭدا Open Air, ياعني اشىق اسپان استىنداعى شوۋ-كونتسەرت ءوتتى. وعان قاتىسقان بىرقاتار قازاقستاندىق جانە شەتەلدىك بەلگىلى انشىلەر كۇندىز استانانىڭ الەۋمەتتىك مەكەمەلەرىنە بارىپ, وندا تاربيەلەنىپ جاتقان جەتكىنشەكتەردى بالالاردى قورعاۋدىڭ حالىقارالىق كۇنىمەن قۇتتىقتادى.
انشىلەر باس سۇققان العاشقى ورىن – كامەلەتكە تولماعانداردىڭ بەيىمدەۋ ورتالىعى بولدى. ورتالىقتىڭ اعا تاربيەشىسى ايگۇل بولاتحاننىڭ ايتۋىنشا, قازىر مۇندا 3-18 جاس ارالىعىنداعى 23 بالا تاربيەلەنۋدە. ولار «فورمات», «اسىل» توپتارىنىڭ, قايرات باەكەنوۆتىڭ سالعان اندەرىن قوسىلا شىرقادى. وزدەرى دە ونەردەن قۇرالاقان ەمەستىگىن تانىتتى. اسىرەسە, گۇلشات ەسىمدى تاربيەلەنۋشىنىڭ ونەرى قوناقتاردى ءتانتى ەتتى.
رينات مالتساگوۆ, ارتۋر تولەپوۆ جانە «پيتستسا» توبى ارنايى تۇزەتۋ مەكتەبىنە باردى. بۇل مەكەمەنىڭ ديرەكتورى باحريدەن كارىمجانوۆ وسىندا ءبىلىم الىپ جاتقان 408 بالانىڭ ارقايسىسى ءارتۇرلى دياگنوزبەن كەلىپ تۇسكەنىن جەتكىزدى. ارينە, دەنساۋلىقتارىندا كىنارات بولعاننان كەيىن كەيبىرەۋىندە وزىندىك كومپلەكستەرى دە بار.
«پيتستسا» توبىنىڭ ءانشىسى سەرگەي پريكازچيكوۆ ولاردى ەشتەڭەدەن قىسىلماۋعا شاقىردى. «بالا كەزىمدە مەن قاتتى ۇيالشاق ەدىم. ادامدارمەن ءتىل تابىسۋ تۇگىلى سويلەۋگە ۇيالاتىنمىن. الايدا سول كەزدەن ءانشى بولۋدى ارماندايتىنمىن. وسىنى ماقسات ەتىپ قويدىم دا, ارمانىمدى ورىنداۋ ءۇشىن اشىلا باستادىم. قازىر ساحنادا جۇرگەنىمدى كورىپ وتىرسىزدار. ادام ءوزى نە قالايتىنىن جاقسى ءبىلۋى كەرەك. وسىنى بىلگەن جاندى ارمان العا جەتەلەيدى. سوندىقتان قىسىلىپ-قىمتىرىلماڭىزدار. ارماندارىڭدى ورىنداۋعا اسىعىڭىزدار» دەدى ول.
موت, ناتان مەن جانار دۇعالوۆا SOS بالالار اۋىلىنا بارىپ, ونداعى تاربيەلەنۋشىلەردىڭ كوڭىلىن كوتەرىپ كەلدى. وسى كۇنى بۇل جەردەگى جەتكەنشەكتەر تاعى ءبىر قۋانىشقا كەنەلدى. «دەگدار» گۋمانيتارلىق قورى بالالارعا سپورتتىق-ويىن الاڭىن سىيلادى. ونىڭ سالتاناتتى اشىلۋى دا بالالار مەرەكەسىمەن سايكەس كەلدى.
بالالار اۋىلىنداعى تاربيەلەنۋشىلەر دە «بولاتىن بالالار» ەكەنىن تانىتتى. ماسەلەن, 8 جاسار ارتەم دۋۆانوۆ انشىلەردى كورگەن بەتتە سايراي جونەلدى. بيزنەسمەن بولعىسى كەلەتىنىن ايتقان ول سۇيىكتى ءپانى قازاق ءتىلى ەكەنىن ايتىپ ۇلگەردى.
وسىنداي مەرەكەنى بالالارعا جانە قالا جاستارىنا استانا قالاسى مادەنيەت, مۇراعات جانە قۇجاتتامالار باسقارماسى ۇيىمداستىردى. بالالار اۋىلىنا بارعان جانار دۇعالوۆا بالالارمەن كەزدەستىرگەنى ءۇشىن اتالمىش باسقارماعا العىسىن جەتكىزدى. شارانىڭ ءمان-ماڭىزىنا توقتالعان ءانشى بالالارعا باقىتتى بالالىق شاقتى تىلەدى.
ال Open Air, ياعني اشىق اسپان استىنداعى شوۋ-كونتسەرت ساعات 18.00-دە باستالدى. شارا وتكەن اۋماققا قاراقۇرىم حالىق جينالدى. كەشتى تۇرسىنبەك قاباتوۆ, ءمادينا سادۋاقاسوۆا, الەكسەي ۆوروبەۆ جانە LOBODA جۇرگىزدى. ال جاستاردىڭ كوڭىلىن قايرات نۇرتاس, گليۋكوزا, تورەعالي تورەالى, ماكس بارسكيح, موت, ناتان, جانار دۇعالوۆا, ايقىن, ءالي وقاپوۆ, اننا سەمەنوۆيچ, دجيگان, Kristina Si, «ۆينتاج», «فورمات», «Ninety one» توپتارى, Alekseev اتتى ۋكرايندىق ءانشى جانە وزگەلەر كوتەردى. «استانا ەكسپو-2017» حالىقارالىق مامانداندىرىلعان كورمەسىنە ارنالعان كونتسەرت ءتۇننىڭ ءبىر ۋاعىنا دەيىن جالعاستى.
امانعالي
قالجانوۆ
