نۇر-سۇلتان قالاسى قازاقستان حالقى اسسامبلەياسىنىڭ «تاڭ» تاتار-باشقۇرت مادەني ورتالىعى وكىلدەرى قالالىق ءماسليحات دەپۋتاتتىعىنا ۇمىتكەرلەرمەن ZOOM ارقىلى كەزدەسىپ, ءماجىلىس قۇردى.
سپيكەر اسەل سارسەمباەۆا الداعى 10 قاڭتاردا وتەتىن ۇلكەن ساياسي وقيعانىڭ ماڭىزىنا توقتالىپ, جيىنعا قاتىسۋشىلاردىڭ اشىق ويلارىن, تالاپ-تىلەكتەرىن ايتۋىنا مۇمكىندىك بەرىپ, اشىق اڭگىمەگە شاقىردى.
بيىل سايلاۋ ناۋقانىنىڭ ەرەكشەلىگى – ۇمىتكەر جاستار Nur Otan پارتياسى اتىنان ۇگىت-ناسيحات جۇمىستارىن جۇرگىزۋدە. بۇل رەتتە پارتيانىڭ وسى كۇنگە دەيىنگى جەتىستىكتەرىن ايتا كەلە, الداعى سايلاۋالدى باعدارلاماسىندا كورىنىس تاپقان باستى باعىتتارىنا توقتالدى. وسى باعدارلامانىڭ ەڭ وزەكتى ماسەلەسىنىڭ ءبىرى حالىقتى الەۋمەتتىك جاعىنان قولداۋ بولىپ وتىر.
بۇل تۇرعىدا «تاڭ» تاتار-باشقۇرت مادەني ورتالىعى جەتەكشىلەرىنىڭ ءبىرى يانات نيزامۋتدينوۆا وتباسى ينستيتۋتىنا قاتىستى پىكىرىن ايتىپ, ۇمىتكەرلەرگە ءوز سۇراعىن قويدى.
– Nur Otan پارتياسىنىڭ باعدارلاماسى – بولاشاقتى بولجاعان, بارلىق كۇشىن حالىقتىڭ ءال-قۋاتىنىڭ وسۋىنە باعىتتاعان كۇشتى پارتيا. ونىڭ قاتارىندا تاتار-باشقۇرت مادەني ورتالىعىنان دا قاتىسىپ, ۇلكەن ساياسي دوداعا تۇسۋگە باعىن سىناپ وتىر. ارقايسىسىنا اق تىلەگىمىزدى ايتىپ, حالىققا قىزمەتتە جولدارىڭىزدان جاڭىلماي, ادىلەتتىكتىڭ تۋىن جىقپاڭىزدار دەمەكپىن. نۇر-سۇلتان قالاسىندا تۇرىپ جاتقانىما ەلۋ جىلدان اسىپ قالدى. قالامەن بىرگە وستىك, وركەندەپ, كوركەيدىك. قالانىڭ قالاي ءوسىپ, كەرەگەسىن كەڭ جايعانى كوزىمىزدىڭ الدىندا ءوتىپ جاتىر. باس شاھارىمىزدىڭ بولاشاعى ۇلكەن. جىلدان-جىلعا قالانىڭ كوركى اسىپ, اۋلالار اباتتاندىرىلىپ جاتىر. دەگەنمەن جاڭادان سالىنعان تۇرعىن ءۇي كەشەندەرىنىڭ قۇرىلىسى بىتكەنمەن, بالالار كلۋبى, سپورت ايماقتارى سياقتى ماڭىزدى بولىگى ەسكەرىلمەيدى. مۇنداي ورتالىقتاردىڭ ۇيمەن قاتار سالىنىپ, بىرگە بەرىلگەنىن قالار ەدىك. بولاشاق ءماسليحات دەپۋتاتتارى وسى ماسەلەنى نازارىندا ۇستاۋى ءتيىس. ەكىنشى ماسەلە – ءبىر-ەكى بالا تاربيەلەپ وتىرعان جالعىزباستى انالارعا قاتىستى. كوپبالالى انالاردىڭ جاعدايى ءبىرشاما شەشىلىپ, الەۋمەتتىك قولداۋ كورسەتىلىپ جاتقانىن بىلەمىز. جۇمىسىنان دا قالماي, قوعامعا قىزمەت ەتىپ, بالالارىن دا ءوسىرىپ وتىرعان وسىنداي جاندار الەۋمەتتىك باعدارلامالاردان شەت قالماعانى دۇرىس. ولاردىڭ دا تۇرعىن ءۇي ماسەلەسىنىڭ شەشىلۋىنە جاعداي بولسا ەكەن, – دەدى.