پرەزيدەنتىمىز قاسىم-جومارت توقاەۆتىڭ «سىندارلى قوعامدىق ديالوگ – قازاقستاننىڭ تۇراقتىلىعى مەن وركەندەۋىنىڭ نەگىزى» اتتى قازاقستان حالقىنا جولداۋى ەلىمىزدىڭ دامۋ تاريحىنىڭ جاڭا ساپالى كەزەڭىنە قادام باسقانىن بىلدىرەدى.
جولداۋدا حالقىمىزدى تولعاندىراتىن باستى ماسەلەلەر ايقىندالىپ, تاتۋلىق پەن تۇراقتىلىقتىڭ نەگىزىن قوعامدىق كەلىسىمنەن ىزدەۋ تاپسىرىلدى. ءجۇز وتىزدان اساتىن ەتنوس وكىلدەرىنىڭ باسىن قوسقان ءبىزدىڭ ەلدە وسى كۇنگە دەيىن قوعامنىڭ تۇراقتى بولۋى بۇرىنعى تمد ەلدەرىندە بولىپ جاتقان ۇلتارالىق جانە دىنارالىق كەلەڭسىز وقيعالاردىڭ بولماۋى بۇكىل قوعامنىڭ بىرلەسكەن ەڭبەگىنىڭ ناتيجەسى دەسەك تە, ونىڭ نەگىزىن مەملەكەت قۇرۋشى قازاق ۇلتىنىڭ ەل بىرلىگىن ساقتاۋعا دەگەن زور قۇلشىنىسىنىڭ ارقاسىندا ەكەنىن باسا ايتۋ قاجەت. كەي جاعدايدا قوعامدىق ومىردە ۇلتتىق مۇددەمىزگە زيانى ءتيىپ جاتقان وقيعالار بولسا دا, قازاق ۇلتى وزىنە جۇكتەلگەن جاۋاپتى مىندەتتى ابىرويمەن اتقارىپ كەلەدى, باسقا ەتنيكالىق توپتاردىڭ مۇددەسىنە زيان تيمەۋ جاعىن قاراستىرۋدا. شيرەك عاسىر بويى ءوزىمىزدىڭ ۇلتتىق مۇددەنى ويلاۋدان گورى ونى ەكىنشى قاتارعا ىسىرىپ, باسقا حالىقتىڭ جاعدايىن ويلادىق, ۇلتشىل بولۋدان ۇيالدىق, تايساقتادىق.
ءبىز سياقتى كەڭەس يدەولوگياسىنىڭ شىرماۋىندا بولعان باسقا ەلدەر, ءتىپتى وزىمىزبەن تۋىستاس كورشى ەلدەر مەملەكەتتىك ءتىلىنىڭ بەدەلىن ءوز دارەجەسىنە جەتكىزگەلى قاشان. وسىنداي جاعدايدا تاۋەلسىزدىگىمىز بەرىك قالانا باستادى دەگەن ۋاقىتتا انا ءتىلىمىزدىڭ بەيشارالىق كۇيى ۇلتجاندى ازاماتتاردىڭ شىدامىن تاۋىسا باستادى. كەزىندە ەلباسىمىز ن.ءا.نازارباەۆتىڭ «قازاق قازاقپەن قازاقشا سويلەسسىن» دەگەن تاپسىرماسى نەگە تولىق ورىندالماي قالدى دەگەن سۇراق تا كوكەيىمىزدەن كەتپەيدى. سەبەبى ءومىردىڭ ءوزى كورسەتكەندەي, ەلباسىنىڭ اۋىزشا ايتقان ءسوزىنىڭ ءوزى دە تولىق ورىندالۋى ءۇشىن ارناۋلى زاڭ شىعارۋدىڭ قاجەت ەكەندىگى دالەلدەنۋدە. بۇدان وتىز جىل بۇرىن قابىلدانعان «ءتىل تۋرالى» زاڭنىڭ سولقىلداق, ەكىۇشتى باپتارى بۇگىنگى مەملەكەتتىك ءتىلىمىزدىڭ رەسمي ءتىل كولەڭكەسىندە قالىپ قويۋىنا اكەلگەنىن بۇكىل جۇرتشىلىق مويىنداپ وتىر.
بيىلعى پرەزيدەنت جولداۋىنىڭ ەرەكشەلىگى تاۋەلسىز ەلىمىزدى دامىتۋدىڭ ۇزاقمەرزىمدى ستراتەگياسى ساباقتاستىعىن جالعاستىرا وتىرىپ, قازاق حالقىنىڭ مەملەكەت قۇراۋشى ۇلت رەتىندە ءرولىن بەكەمدەۋ ماسەلەسى كۇن تارتىبىنە ناقتى قويىلدى. «قازاق ءتىلىنىڭ مەملەكەتتىك ءتىل رەتىندەگى ءرولى كۇشەيىپ, ۇلتارالىق قاتىناس تىلىنە اينالاتىن كەزەڭى كەلەدى دەپ ەسەپتەيمىن» دەگەن پرەزيدەنتىمىزدىڭ ءسوزى ۇلتجاندى ازاماتتاردىڭ ەڭسەسىن قايتادان كوتەرىپ تاستادى. بۇل جولعى جولداۋدا ايتىلعان مەملەكەتتىك ءتىل تۋرالى تاپسىرما ءوز كۇشىنە ەنىپ, ورىندالاتىنىنا تولىق سەنىمىمىز بار. سونىمەن قاتار قاسىم-جومارت توقاەۆتىڭ باستاماسىمەن قۇرىلعان جاڭا قۇرىلىم – قوعامدىق ۇلتتىق كەڭەس ءتىل تۋرالى زاڭ بويىنشا ماسەلەنى كۇن تارتىبىنە قويىپ تالقىلاۋ وتكىزدى. قوعامدىق پىكىر ەلەنىپ, اشىق قوعامدىق ديالوگقا ەركىندىك بەرگەنىن ءبىز پرەزيدەنتتەن باستاپ بارلىق مەملەكەتتىك قىزمەتشىلەردىڭ زاماناۋي بايلانىس قۇرالى ەلەكتروندىق ينتەرنەت جۇيەسىمەن قوعامنىڭ بارلىق توپتارىمەن اشىق سويلەسە باستاۋى, سونىڭ ناتيجەسىندە حالىقتىڭ مۇڭ-مۇقتاجىنىڭ ەسكەرىلۋى – اشىق قوعام ورناتۋعا باعىتتالعان قادامنىڭ دالەلى. مەملەكەتتىك قىزمەتكەرلەردىڭ تازا مەملەكەتتىك تىلدە سويلەۋى جانە قۇجات تولتىرۋى, ولاردىڭ حالىقپەن كەزدەسۋىندە تەك مەملەكەتتىك تىلدە جۇرگىزىلۋ تالاپتارى جاڭا قابىلداناتىن ءتىل تۋرالى زاڭدا ورىن تاباتىنى كۇمان كەلتىرمەۋگە ءتيىس.
قاجىمۇرات ناسيەۆ,
مۇعالىم, ەڭبەك ارداگەرى
