قازاقستاندا جاس دارىنداردى قولداۋ ماقساتىندا «اشىق ساحنا» بايقاۋى وتەدى. بۇل بايقاۋ ونەر سالاسىنداعى 18 بەن 45 جاس ارالىعىنداعى دارىندارعا قولداۋ كورسەتۋ ماقساتىندا ۇيىمداستىرىلۋدا. بايقاۋ وتەتىن مەرزىم – 2022 جىلدىڭ جەلتوقسان ايى – 2023 جىلدىڭ مامىرى. جۇلدە قورى – 4 000 000 تەڭگە.
«اشىق ساحنا» رەسپۋبليكالىق بايقاۋى بەس ىرىكتەۋ كەزەڭنەن تۇرادى. «حورەوگرافيا», «ليبرەتتو», «مۋزىكا», «ستسەنوگرافيا» اتالىمدارى بويىنشا جەڭىمپازدار انىقتالادى. ءبىرىنشى كەزەڭ ونلاين فورماتتا وتەدى. ءار اتالىم بويىنشا جەڭىمپازعا 1 000 000 تەڭگە كولەمىندە قارجىلاي جۇلدەمەن قاتار, «استانا بالەت» تەاترىنىڭ رەپەرتۋارىنا قوسىلاتىن تولىققاندى حورەوگرافيالىق تۋىندى شىعارۋعا مۇمكىندىك بەرىلەدى.
بايقاۋدىڭ قازىلار القاسىنىڭ قۇرامىندا «استانا بالەت» تەاترىنىڭ باسشىلىعى مەن ەلىمىزدىڭ مادەنيەت جانە ونەر سالاسىنداعى ەڭبەك سىڭىرگەن قايراتكەرلەر بار.
بايقاۋعا قاتىسۋ تۋرالى ءوتىنىشتى 2022 جىلعى 1-31 جەلتوقسان ارالىعىندا ashyq_sakhna@astanaballet.kz ەلەكتروندى پوشتاسىنا جولداۋ كەرەك. «استانا بالەت» تەاترىنىڭ سايتىندا ءار اتالىم بويىنشا بايقاۋدىڭ رەگلامەنتى جانە شارتتارىمەن تانىسۋعا بولادى.
قورىتىندى شىعارىپ, جەڭىمپازداردى ماراپاتتاۋ ءراسىمى 2023 جىلعى 1-مامىرىندا «استانا بالەت» تەاترىنىڭ ساحناسىندا وتەدى. سونداي-اق وسى كۇنى «اشىق ساحنا» بايقاۋىنىڭ جەڭىمپازدارى قويعان حورەوگرافيالىق تۋىندىنىڭ پرەمەراسى بولادى.
