ەلوردا اكىمى التاي كولگىنوۆ بايقوڭىر اۋدانىنىڭ تۇرعىندارىمەن «اشىق ميكروفون» فورماتىندا كەزدەسۋ وتكىزدى. اباي قۇنانبايۇلى اتىنداعى №87 مەكتەپ-گيمنازياسىندا وتكەن بۇل شاراعا قوعامدىق كەڭەستىڭ مۇشەلەرى, قالالىق ءماسليحاتتىڭ دەپۋتاتتارى, قالا اكىمدىگىنىڭ, بايقوڭىر اۋدانى اكىمدىگىنىڭ, باسقارمالاردىڭ جاۋاپتى وكىلدەرى قاتىستى.
الدىمەن مەملەكەت باسشىسىنىڭ جولداۋىنداعى «حالىق ۇنىنە قۇلاق اساتىن مەملەكەت» دەگەن ءتۇيىننىڭ ءمان-ماڭىزىنا توقتالعان اكىم باس قالامىزدا تۇرعىندارمەن كەزدەسۋ, تۇرعىنداردى قالا باسشىلارىنىڭ قابىلداۋى ۇزبەي وتكىزىلىپ كەلە جاتقانىن جەتكىزدى. «جىل قورىتىندىسى بويىنشا بۇگىن ءبىز سىزدەرمەن كەزدەسۋ وتكىزىپ وتىرمىز. باستى ماقساتىمىز – سىزدەردىڭ ايتقاندارىڭىزدى تىڭداۋ. اۋدان تۇرعىندارىن نە تولعاندىراتىنىنا نازار اۋدارۋ. مەملەكەت باسشىسى العا قويعان تۇرعىندارمەن تىعىز بايلانىس ورناتۋ, حالىق ۇنىنە قۇلاق اسۋ ۇندەۋى – ءبىزدىڭ قىزمەتىمىزدىڭ نەگىزگى باعىتى. وسىنىڭ الدىندا ءبىز ۇكىمەت باسشىلارىمەن بىرگە دەنساۋلىق ساقتاۋ, الەۋمەتتىك ماسەلەلەر بويىنشا قالا تۇرعىندارىمەن كەزدەسۋ وتكىزدىك. كەشە ەسىل اۋدانىنىڭ تۇرعىندارىمەن كەزدەسسەك, بۇگىن مىنە, سىزدەرمەن جۇزدەسىپ وتىرمىز. الماتى, سارىارقا اۋدانىنىڭ تۇرعىندارىمەن دە وسىنداي كەزدەسۋلەر وتكىزىلەدى. دەمەك, سىزدەردى نە مازالايتىنىن, قانداي سۇراق, ۇسىنىستارىڭىز بار ەكەنىن بىلگىمىز كەلەدى. وسى ماقساتپەن الدارىڭىزعا كەلىپ وتىرمىز» دەدى التاي كولگىنوۆ.
وسىدان كەيىن بايقوڭىر اۋدانىنىڭ اكىمى اسقار ەسىلوۆ ءبىر جىلدىق قىزمەتتەن قىسقاشا قورىتىندى جاساعاننان كەيىن ءسوز كەزەگى تۇرعىندارعا بەرىلدى. ءوندىرىس تۇرعىندار الابى تۇرعىندارى اتىنان ءسوز العان گۇلميرا ساعىندىققىزى اتالعان اۋماقتا قازىر 104,24 اۆتوبۋستار جۇرەتىنىن, الايدا وسى قوعامدىق كولىكتەرگە تاڭەرتەڭ, كەشتە وتىرۋ وتە قيىن ەكەنىن, ادام سىعىلىسقان كەزدە ەسىگى جابىلماي قالاتىنىن ايتىپ, وسى باعىتتا تاعى ءبىر اۆتوبۋس قوسسا دەگەن ءوتىنىش ايتتى.
– قوعامدىق كولىك جايى – اسا ماڭىزدى ماسەلە. اسىرەسە, ارقا تورىندەگى استانامىزدا قوعامدىق كولىك ماسەلەسى دۇرىس شەشىلمەسە, سارى ايازدا تۇرعىندارعا وتە قولايسىزدىق اكەلەتىنى انىق. قوعامدىق كولىك ماسەلەسىنە بايلانىستى بۇگىن تۇسكەن سۇراۋلاردىڭ ءبارى ەسكەرۋسىز قالمايدى. بارلىعىن تەكسەرىپ, سول ماڭداعى جۇرگىنشىلەر اعىنىن نەگىزگە الا وتىرىپ, مارشرۋت قوسۋ كەرەك بولسا قوستىرامىز, – دەدى قالا اكىمى.
ەكى ساعاتقا سوزىلعان كەزدەسۋدە الەۋمەتتىك كومەك, الەۋمەتتىك نىسانداردىڭ قۇرىلىسى, شەت ايماقتاردى دامىتۋ, قوعامدىق كولىكتەردىڭ باعىتتارىن ارتتىرۋ, كوشەلەردى اباتتاندىرۋ, قالا ورتاسىن جاقسارتۋ جونىندە كوپتەگەن سۇراقتار قويىلىپ, وتىنىشتەر ايتىلدى. بۇل جولعى كەزدەسۋدەن ءبىر بايقاعانىمىز, تۇرعىندار وكپە, ءوتىنىش قانا ايتپاي, قالادا اتقارىلعان جۇمىستارعا ريزاشىلىقتارىن ءبىلدىرىپ, قالا, اۋدان باسشىلارىنا العىسىن دا جەتكىزدى.
سونىمەن قاتار قالا تۇرعىندارىنىڭ الەۋمەتتىك جاعدايىنا قاتىستى ماسەلەلەردى تالقىلاعان كەزدەسۋ كەشە كەشكە سارىارقا اۋدانىندا دا ءوتتى. بۇل جيىندا دا قالا باسشىسى بىرقاتار ماسەلەلەر بويىنشا اۋدان باسشىلىعىنا تاپسىرمالار جۇكتەدى.
بۇگىن ەلوردا اكىمى الماتى اۋدانى تۇرعىندارىمەن كەزدەسەدى.
