15 ناۋرىز كۇنى اسكەرگە شاقىرىلۋشىلاردىڭ العاشقى توبى قر ۇقك شەكارا قىزمەتىنىڭ كاسپي تەڭىزىندەگى اسكەري بولىمىنە اتتاندى.
استانا قالاسى قورعانىس ىستەرى جونىندەگى دەپارتامەنتىنىڭ باستىعى, پولكوۆنيك ارداق كۋكاتوۆ اسكەرگە شاقىرىلۋشىلار قاتاڭ تەكسەرىستەن وتەتىنىن اتاپ ءوتتى.
– تەكسەرۋدىڭ ماڭىزدى كەزەڭدەرىنىڭ ءبىرى – اسكەرگە شاقىرىلۋشىنىڭ وزىمەن جانە ونىڭ اتا-اناسىمەن, وقۋ ورنىنىڭ وكىلدەرىمەن جەكە اڭگىمەلەسۋ. جەكە اڭگىمەلەسۋ بارىسىندا ولاردىڭ دەنساۋلىق جاعدايىنا, ءبىلىم دەڭگەيىنە, مورالدىق-پسيحولوگيالىق جاي-كۇيىنە جانە وتباسى جاعدايىنا ەرەكشە كوڭىل بولىنەدى. سونىمەن قاتار, بولاشاق ساربازدى زەرتتەۋ اسكەرگە شاقىرىلۋشىنىڭ قۇجاتتارىن قاداعالاپ, ءارى جاس جىگىتتىڭ وزىمەن تاجىريبەلىك جۇمىس جۇرگىزۋ ءادىسى ارقىلى جۇزەگە اسادى. سونداي-اق, پسيحولوگ ماماندار ولاردى «اق سۇڭقار» پسيحودياگنوستيكالىق امبەباپ جۇيەسى ارقىلى پسيحولوگيالىق تەستىلەۋدەن وتكىزەدى, – دەيدى پولكوۆنيك كۋكاتوۆ.
ال دەپارتامەنت باستىعىنىڭ ورىنباسارى, قىجد كەلىسىمشارت جانە شاقىرىلۋ بويىنشا اسكەري قىزمەتشىلەردى جيناقتاۋ باسقارماسىنىڭ باستىعى, پولكوۆنيك عاني ارتىقوۆتىڭ مالىمەتىنە سۇيەنسەك, شەكارا قىزمەتى, مەملەكەتتىك كۇزەت قىزمەتى جانە ۇلتتىق ۇلان سياقتى قارۋلى كۇشتەرگە بيىلعى كوكتەمدە استانادان 800-دەن استام جاستاردى اتتاندىرۋ جوسپارلانىپ وتىر ەكەن.
– كەشەگى بوزبالا شاقىرىلۋشى اسكەردەن ۇيىنە اپتال ازامات ءارى ناعىز وتان قورعاۋشى بولىپ ورالادى. سوندىقتان جاستاردى اسكەرگە شىعارىپ سالۋ دا ماڭىزدى وقيعا. بۇل تۇرعىدا اتالمىش شارا سالتاناتتى جاعدايدا وتكىزىلەدى. وعان بولاشاق ساربازداردىڭ تۋىستارى مەن دوستارى, قالانىڭ باسشىلىق قۇرامى, ارداگەرلەر ۇيىمدارىنىڭ وكىلدەرى قاتىسادى, – دەيدى ول.
نۇرداۋلەت كاكىشەۆ
