اسپانتايۇلىنىڭ رۋحى اسقاقتادى
استانادا ءۇش كۇن بويى ەلوردا تۇرعىندارىن قاسيەتتى قوبىز ۇنىمەن تەربەگەن تىلەپ اسپانتايۇلى اتىنداعى II حالىقارالىق قوبىزشىلار بايقاۋى ءوز مارەسىنە جەتتى.
بۇل ءدۇبىرلى سايىس ارۋاقتى قوبىزشى تىلەپ بابامىزدىڭ تۋعانىنا 260 جىل جانە ەلوردانىڭ 20 جىلدىعىنا وراي ۇيىمداستىرىلدى. حالىقارالىق شاراعا الەمنىڭ ون بەس ەلىنەن وتىزعا جۋىق قاتىسۋشى كەلدى. بايقاۋدىڭ اشىلۋىندا قوبىزشىنىڭ ۇرپاعى, مەتسەنات ساپار ىسقاق «ءبىزدىڭ ماقساتىمىز – قازاقتىڭ قارا قوبىزىن, مادەنيەتىن دۇنيە جۇزىنە تانىتۋ. قوبىز – وتە كونە مۋزىكالىق اسپاپ. ونىڭ تاريحى دا وتكەن عاسىرلارمەن ساباقتاسىپ جاتىر. ماسەلەن, موڭعوليانىڭ التاي باۋىرىنان VI عاسىردا ۇستالعان قوبىز تۋرالى بىلەسىزدەر. ءبىز وسى اسپاپتى «بابالار ىزىمەن» دەپ اتالعان تاريحي ەكسپەديتسيا اياسىندا ريم پاپاسىنا سىيلادىق. سونداي-اق, التايدىڭ بەرەلىنەن تابىلعان جاۋىنگەر سۇيەگىنىڭ جانىنان قىلىش پەن قوبىز تابىلدى. كونكۋرستىڭ شەكارالىق اۋماعى دا كەڭەيدى. بۇل مەنىڭ كوڭىلىمە قۋانىش سىيلادى» دەدى «تىلەپ» اتىنداعى قايىرىمدىلىق قورىنىڭ پرەزيدەنتى.
سايىس شارتى بويىنشا قوبىزشىلار العاشقى اينالىمدا اسپانتايۇلىنىڭ «باقسى», «تولعاۋ», «اللام جار» اتتى ءۇش كۇيىنىڭ ءبىرىن ورىنداسا, ەكىنشى اينالىمدا ءوز ەلدەرىنىڭ ءداستۇرلى تۋىندىسىن كوپشىلىككە تانىستىردى.
ءۇش كۇن بويى قوبىز سارايىنداعى اسپانتايۇلىنىڭ رۋحى اسقاقتاعان ونەر بايگەسىندە وتانداسىمىز, تالانتتى جاس ماقسات مەدەۋبەكتىڭ باعى جانىپ, باس جۇلدەنى جەڭىپ الدى. وعان 5000 اقش دوللارى مەن جەڭىمپاز ستاتۋەتكاسى بەرىلدى. ءبىرىنشى ورىندى ازەربايجاننان كەلگەن مادينا شاحگەلديەۆا يەلەندى. ەكىنشى ورىندى موڭعوليانىڭ تالانتتى تۇلەگى تۋمەنبايار سودنوم-يش قانجىعاسىنا بايلادى. ءۇشىنشى ورىن وزبەكستاندىق قوس ونەرپاز – مادجيد كاراباەۆ جانە يسلوم ابدۋلازيزوۆقا بۇيىردى. جۇلدەگەرلەردىڭ ءبارى باعالى سىيلىقتارمەن ماراپاتتالدى.