كەشە ەلوردانىڭ «دوستىق» ۇيىندە تاۋەلسىزدىكتىڭ 30 جىلدىعىنا ارنالعان فوتوكورمە اشىلدى. ونلاين فورماتتا وتكەن شارادا نۇر-سۇلتان قالاسى قازاقستان حالقى اسسامبلەياسىنىڭ قالىپتاسۋ مەن دامۋ تاريحى, قالاداعى ەتنومادەني بىرلەستىكتەردىڭ جەتىستىكتەرى تۋرالى سىر شەرتەتىن فوتوسۋرەتتەر قويىلدى. كورمە قاتىسۋشىلارى بىرقاتار تاريحي جادىگەرلەرمەن دە تانىستى.
كورمەنى مەملەكەت جانە قوعام قايراتكەرى, قازاقستاننىڭ ورىس, سلاۆيان جانە كازاك ۇيىمدارى اسسوتسياتسياسىنىڭ توراعاسى ۆلاديمير بوجكو اشتى.
– 1991-1993 جىلدارى تاۋەلسىز ەلدىڭ الدىنان شىققان قيىندىقتاردى ەڭسەرىپ, جاڭا ەكونوميكانى قۇرا باستادىق. بارلىق سالادا رەفورمالار جۇرگىزىلدى. ەڭ باستىسى, وسى وتىز جىل ىشىندە ەلباسى نۇرسۇلتان نازارباەۆ الەمنىڭ ساياسي, ەكونوميكالىق كارتاسىنا تاۋەلسىز قازاقستاندى ەنگىزىپ, بۇكىل الەمگە تانىتتى. بۇل جىلدار بويى بەيبىتشىلىك پەن كەلىسىمدى ساقتاپ كەلە جاتىرمىز. بۇعان قازاقستان حالقى اسسامبلەياسى مەن ەتنومادەني بىرلەستىكتەر ۇلكەن ۇلەسىن قوستى, – دەدى ۆ.بوجكو.
بۇدان سوڭ ءسوز العان نۇر-سۇلتان قالاسى قازاقستان حالقى اسسامبلەياسى حاتشىلىعىنىڭ مەڭگەرۋشىسى ءلاززات قۇسايىنوۆا ەلوردالىق ۇيىمنىڭ ەلىمىزدىڭ دامۋىنا, تاتۋلىق پەن ىنتىماقتى ساقتاۋداعى ەڭبەگىنە توقتالدى.
