استانا – ابۋ-دابي: ىسكەرلىك بايلانىس كۇشەيدى
ابۋ-دابي قالاسىنىڭ مەرى باستاعان ءباا دەلەگاتسياسىنىڭ رەسمي ساپارى باعدارلاماسىندا قازاقستان – ەميرات بيزنەس فورۋمى ءوتتى. شارا بارىسىندا استانا قالاسىنىڭ اكىمى اسەت يسەكەشەۆ ابۋ-دابي قالاسىنىڭ مەرى اۆايدا مۋرشەد ءال مارارمەن كەزدەستى.
فورۋمدا استانا قالاسىنىڭ ينۆەستيتسيالىق مۇمكىندىكتەرى مەن جوبالارى تالقىلاندى. استانا مەن ابۋ-دابي قالالارىنىڭ باسشىلارى اراسىندا ىنتىماقتاستىق كەلىسىم تۋرالى مەموراندۋمعا دا قول قويىلدى. ەكى جاق ءوز مۇمكىندىكتەرىن بىرلەسە جۇزەگە اسىرۋدى قولعا الىپ, جاڭا جوبالاردى ىسكە اسىرۋ جولىندا ايماقارالىق ارىپتەستىكتى دامىتۋدى اڭگىمەگە ارقاۋ ەتتى.
بۇگىندە ەلىمىز بەن بىرىككەن اراب امىرلىكتەرى مەملەكەتتەرىنىڭ باسشىلارى اراسىنداعى كەلىسىم بويىنشا «ابۋ-دابي پلازا» جوباسى جۇزەگە اسىرىلۋدا. وعان ارابتار تاراپىنان تىكەلەي ينۆەستيتسيا ارقىلى 1,7 ملرد اقش دوللارى تارتىلعان.
قوس تاراپ تۋريزم سالاسىنا, جىلجىمايتىن مۇلىك, دەنساۋلىق, ءبىلىم, سپورت, قالا قاۋىپسىزدىگى, اقىلدى تەحنولوگيا جانە وزگە دە سالالارعا ينۆەستيتسيا قۇيۋ جوسپارىن دا كەڭىنەن تالقىلادى.
– ەكى استانا اراسىنداعى ىنتىماقتاستىق كەلىسىم قالىپتاسقان. بۇل مەموراندۋم سەرىكتەستەر رەتىندە ەكى اراداعى قارىم-قاتىناستى دامىتادى, – دەدى ەلوردا اكىمى.
كەزدەسۋ سوڭىندا ەكى تاراپ بىرگە اتقاراتىن ناقتى جۇمىستاردىڭ جوسپارى بەكىتىلدى.