ۇستىمىزدەگى جىلدىڭ 15 قاڭتارىنان بەرى استانا الەمنىڭ بىرقاتار مەگاپوليستەرى تاجىريبەسىنە سۇيەنىپ, اۆتوموبيلدەردىڭ اقىلى تۇراعى جۇيەسىن ومىرگە ەنگىزدى. ەلوردا تۇرعىندارى ءۇشىن جاڭا جۇيە بولعانىمەن, الەمنىڭ كوپتەگەن ەلدەرىندە ول ەرتەدەن بەرى كەلە جاتقان قىزمەت سالاسى بولىپ تابىلادى. بۇل ءۇشىن وتكەن جىلى دۇنيە جۇزىندەگى ەڭ العاشقى اقىلى اۆتوتۇراقتىڭ – اقش-تىڭ وكلاحوما شتاتىنداعى پاركينگتىڭ قاتارعا قوسىلعانىنا 82 جىل تولعانىن ايتساق تا جەتكىلىكتى.
مىنە, بيىلعى جىلدىڭ باسىندا اتالمىش جۇيە استانا قالاسىندا دا پايدا بولدى. وسىعان وراي ءبىز جاڭادان قۇرىلعان كاسىپورىن – «استانا اۆتوتۇراق كەڭىستىگى» جشس ديرەكتورى ارداق تۇرعانقۇلوۆپەن جولىعىپ, ءوزىمىزدى تولعاندىرعان بىرقاتار سۇراقتارعا جاۋاپ العان ەدىك.
جوبانىڭ جايى جىلدار بويى زەرتتەلدى
– ەڭ الدىمەن بۇل جوبانىڭ قالاي پايدا بولعانىن ايتىپ بەرسەڭىز…
– استانادا اۆتوتۇراق كەڭىستىگىن رەتتەپ وتىرۋ تۋرالى ماسەلە كوتەرىلىپ كەلە جاتقانىنا تالاي جىل بولدى. اسىرەسە, سوڭعى ەكى جىلدا قالا بيلىگى ونى ايرىقشا بەلسەنە زەرتتەي باستادى. سول كەزدە شاھاردا ءبىرىنشى كەزەكتە اۆتوتۇراق كەڭىستىگىنىڭ كەمدىگىنە كوز جەتتى. مۇنىڭ اقىرىندا استانا قالالىق اكىمدىگى مەن جولاۋشىلار كولىگى باسقارماسى بىرلەسە جۇمىس جاساي وتىرىپ, اقىلى تۇراقتار ەندىرۋ جوباسىن دۇنيەگە كەلتىردى. وسىنىڭ ناتيجەسىندە «استانا قالاسى اۆتوتۇراق كەڭىستىگى باسقارماسى» دەگەن جاڭا قۇرىلىم قۇرىلدى.
البەتتە, تىكەلەي قالا تۇرعىندارىنىڭ مۇددەسىن كوزدەيتىن مۇنداي سالماقتى جوبا ءبىر ساتتە پايدا بولا سالعان جوق. ناقتى شەشىم قابىلدانعانعا دەيىن دە ءبىراز زەرتتەۋ جۇمىستارى جۇرگىزىلدى. استاناداعى كولىك پروبلەماسىن شەشۋ جانە جولدارداعى تىعىزدىقتى ازايتۋ ماقساتىندا حالىقارالىق كونسۋلتانتتار دا تارتىلدى. ولار تۇراق كەڭىستىگىنىڭ تىعىزدىعى دەڭگەيىن انىقتاۋ ءۇشىن تۇرعىن ۇيلەر كەشەندەرىنە جاقىن جەرلەردەگى تۇراق ورىندارىنا تالداۋ جاسادى. زەرتتەۋ نىساندارىنا پاركينگتەردىڭ وزدەرى دە كىردى. بۇلاردان بولەك, تۇركىستان, دوستىق, ورىنبور كوشەلەرى مەن «نۇرجول» بۋلۆارى بويلارىنا ورنالاسقان تۇرعىن ۇيلەر كەشەندەرى جانىنداعى تەرريتوريالار زەرتتەلدى. مونيتورينگ ەلوردانىڭ مەيلىنشە كولىگى تىعىز ۋچاسكەلەرىندە تاڭەرتەڭگى ساعات 7.00-دەن تۇنگى 2.00-گە دەيىن جۇرگىزىلدى.
– زەرتتەۋلەر بارىسى نەگە كوز جەتكىزدى؟
– كەيىن ءبىرىنشى تۇراق سالىناتىن «نۇرجول» بۋلۆارىندا جۇرگىزىلگەن كوشە-جول جۇيەسى تالداۋى بۇل تەرريتورياعا كۇنى بويى قويىلعان 564 كولىكتىڭ 238-ءىنىڭ ونى ەرەجە بۇزۋ ارقىلى جاساعانىن انىقتادى. اتالمىش اۋماقتا جۇرگىزىلگەن مونيتورينگ جۇمىستىڭ قىزعان ساتىندە مۇندا 188 اۆتوكولىكتىڭ تۇرعانىن كورسەتتى. ءاربىر كولىكتىڭ ورتاشا تۇرۋ ۋاقىتى 2 ساعات 33 مينۋتتى, ورىندى پايدالانۋ مولشەرى 144 پايىزدى قامتىدى. وسىلايشا كولىك قويۋ ەرەجەسىنىڭ بۇزىلۋى 42 پايىزدى قۇرادى.
بۇدان باسقا, جالپى مالىمەتتەر نەگىزىندە, سونداي-اق استانا تۇرعىندارىنىڭ تۇراق كەڭىستىگى اراسىندا ۇيلەر جانىنداعى تەرريتوريالاردىڭ كوبىرەك سۇرانىسقا يە ەكەنى بەلگىلى بولدى. ولار 42 پايىزدى قۇرادى. ال پاركينگتى پايدالانۋشىلار قاتارى نەبارى 26 پايىزعا تەڭەلدى. كولىكتى قويۋ ءتارتىبىن بۇزۋشىلار 32 پايىزدان اسادى. بىلايشا ايتقاندا, جۇرتتىڭ كوبى پاركينگتى پايدالانۋدىڭ ورنىنا كولىكتەرىن ءۇيدىڭ جانىنا قويىپ كەتكەندى قولاي كورەتىن بولىپ شىقتى.
– اقىلى تۇراقتىڭ ءمانزىلى رەتىندە نەگە وسى جاقتاعى «نۇرجول» بۋلۆارى تاڭداپ الىندى؟
– بىزگە دە بۇل سۇراق ءجيى قويىلادى. جۇرتتىڭ كوبى ءبىزدىڭ نەگە تاپ وسى «نۇرجول» بۋلۆارىن تاڭداپ العانىمىزدى سۇراپ جاتادى. بۇعان مەنىڭ بەرەر جاۋابىم بىرەۋ-اق: ول استانانىڭ ەڭ حالىق تىعىز تۇراتىن ايماقتارىنىڭ بىرىنە جاتادى, بۇل ماڭعا كەلەتىن كولىكتەردىڭ دە سانى كوپ. بۇعان قوسا, بۇل اۋماق ەلوردانىڭ اكىمشىلىك عيماراتتارى, ءىرى ساۋدا-ساۋىق ورتالىقتارى ورنالاسقان اۋدان بولىپ تابىلادى. ۇكىمەت ءۇيى مەن باسقا دا مەملەكەتتىك ورگاندار عيماراتتارى وسى جەرگە ءتيىپ تۇر. سوندىقتان دا سول جاعالاۋداعى بۇل اتىراپتان تاڭەرتەڭگى 9-دان كەيىن كولىككە ورىن تابۋ ءىس جۇزىندە مۇمكىن ەمەس.
مىنە, قالا بيلىگى ءبىرىنشى كەزەكتە تاپ وسى جەردە تەستىلىك رەجيمدەگى تۇراق كەڭىستىگىن باسقارۋ جۇيەسىن ەنگىزدى. تاعى دا تسيفرلارعا جۇگىنسەك, «نۇرجول» بۋلۆارىندا 472 تۇراقتىق ورىن بار. «كەرۋەن» ساۋدا-ساۋىق ورتالىعى جانىندا تۇراق تىعىزدىعى 175 پايىزدى قۇرايدى, ال كولىك قويۋ ەرەجەسىن بۇزۋشىلىق 61 پايىزعا دەيىن بارادى. سول سياقتى «نۇرسايا» تۇرعىن ءۇي كەشەنى جانىنداعى تىعىزدىق تا وسىعان جەتەقابىل, ول 154 پايىزبەن ولشەنسە, ەرەجەنى ساقتاماۋشىلىق 41 پايىزدى ماڭايلايدى.
ءتارتىپ بۇزۋشىلىق تالاي رەت جولدان قالدىرعان
– مۇنداي ءتارتىپ بۇزۋشىلىقتاردىڭ سەبەبى نەدە؟
– وسىنىڭ ءبارى اۆتوكولىك يەلەرى كوپشىلىگىنىڭ تۇراق ورىندارىن كوپ جاعدايدا ءوزىنىڭ «جەكە» مەكەنى رەتىندە پايدالاناتىندارىنان شىعىپ وتىر. ولاردىڭ داندايسىپ كەتكەندەرى سونشا, ماشينالارىن سول تۇرعان ورىندارىندا بىرنەشە كۇنگە دەيىن تاستاپ كەتەتىندەر دە ءجيى كەزدەسەدى. ءدال وسىنداي اركىمنىڭ وزىنە ورىن بەلگىلەپ الىپ, ونى جەكە مەنشىگىندەي كورەتىن جاعدايلارى بۇرىنىراقتا ماسكەۋدىڭ ورتالىعىندا ءجيى ۇشىراساتىن ەدى. بۇل قالا كوشەلەرىندەگى كەپتەلىس پەن تەجەلىستى تىم ۋشىقتىرىپ جىبەردى. سوندىقتان وندا اقىلى تۇراق ەنگىزۋگە تۋرا كەلدى. مۇنىڭ قولايلى ەكەنىنە كوپ ۇزاماي جۇرگىزۋشىلەر دە كوز جەتكىزە باستادى. بىرىنشىدەن, وسى ارقىلى وراسان زور ۋاقىت ۇنەمدەلەتىن بولدى. جۇرگىزۋشى ەندى تۇراتىن ورىندا بۇرىنعىداي ساعاتتاپ ىزدەپ جۇرمەيدى, قاي جەردە قانداي ورىن بار ەكەنىن كورسەتىپ تۇراتىن ارنايى جۇيەنىڭ كومەگىمەن بوس تۇرعان جەردە تەز تاۋىپ الىپ, ءوزىنىڭ شارۋاسىمەن كەتە بەرەدى. ەكىنشىدەن, اقىلى تۇراق جۇرگىزۋشىنى بارىنشا ءتارتىپتى بولۋعا ۇيرەتەدى. وسىنىڭ ارقاسىندا ول ماسەلەنى تەز جانە ءتيىمدى ەتىپ شەشىپ الۋعا قالىپتاسادى.
ەندى «نۇرجول» بۋلۆارىنا قاتىستى تاعى ءبىر ايتارىم, بۇل – اقىلى تۇراقتار ەنگىزۋ جۇيەسىنىڭ باستاپقى باسقىشى عانا. تاياۋ كەلەشەكتە اقىلى تۇراقتار ەلوردانىڭ بارلىق اۋداندارىندا پايدا بولادى. ازىرگە بۇل «العاشقى قارلىعاش» استانانىڭ اكىمشىلىك ورتالىعىندا قانات جايادى. بۋلۆاردىڭ بويىندا ءىرى مەملەكەتتىك ورگاندار مەن جەكە كومپانيالاردىڭ 15 عيماراتى تۇر.
جوبانىڭ باستى مىندەتى – تۇراق ورىندارىنىڭ قولجەتىمدىلىگىن قامتاماسىز ەتۋ. ءبىز ماشينالاردىڭ وفيس تەرەزەسى الدىندا ساعاتتاپ تۇرىپ قالماۋىنىڭ بارلىق مۇمكىندىكتەرىن جاسايمىز. اتالمىش ۋچاسكەدە 24 تۇراق مەكەنى جاسالدى, ولاردا 487 تۇراقتىق ورىن بار. قازىر تۇراق كەڭىستىگىن باسقارۋ جۇيەسىن پايدالانۋدىڭ تاجىريبەسى ءجۇرىپ جاتىر. ءبىز وسى اۋداندا تۇراققا قويىلعان بارلىق كولىكتەردى فوتوعا ءتۇسىرىپ الىپ تۇرامىز.
– اقىلى تۇراق ورىندارىن ۇيىمداستىرۋ قانشاعا ءتۇستى؟
– قازىرگى مەزەتتە ينۆەستور اتالمىش جوبا ءۇشىن 400 ميلليون تەڭگەدەن ارتىق اقشا سالىپ, ءوزىنىڭ مىندەتتەمەلەرىن تولىق ورىندادى دەۋىمىزگە بولادى. ءبىزدىڭ ەسەبىمىز بويىنشا, استاناداعى 9 700 تۇراق ورنى جوباسىنىڭ جالپى قۇنى 2 ميلليارد تەڭگەنىڭ شاماسىندا قارجى جاراتۋدى تالاپ ەتەدى. مۇندا جوبا جاساۋدىڭ وزىنە عانا 200 ميلليون تەڭگەگە جۋىق قاراجات جۇمسالادى.
– اقىلى اۆتوتۇراق جوباسى تابىس اكەلە مە؟ ول قاي كەزدە ءوزىن-ءوزى اقتايدى؟
– جوبا اۆتوتۇراق ورىندارىنىڭ ورتا ەسەپپەن 70 پايىزى تۇراقتى پايدالانىلىپ تۇرعان جاعدايدا ءوزى قىزمەتكە كىرىسكەن ءتورتىنشى جىلىندا تازا تابىس اكەلە باستايدى. ال ونىڭ ءوزىن- ءوزى اقتاۋ مەرزىمى ۇسىنىلعان تەحنولوگيالىق شەشىمنىڭ شەڭبەرىندە كەمىندە 20 جىل بولعان كەزدە عانا باستالادى. اتالمىش مەرزىمنىڭ قارجى مودەلىنە سايكەس, وسى ۋاقىت ىشىندە ولارداعى جابدىقتاردى تولىق اۋىستىرىپ شىعۋدى كوزدەيتىن 3 تەحنولوگيالىق رەنوۆاتسيا جۇرگىزۋ جوسپارلانىپ قويىلعان.
– قازىر جۇمىس جاساپ تۇرعان اقىلى تۇراقتار ايىنا قانشا سومادا قارجى جيناي الادى؟
– ايىنا تۇراقتار 100 پايىزدىق پايدالانىلۋ كوەففيتسيەنتىن كورسەتە العان جاعدايدا 12,5 ميلليون تەڭگەگە جۋىق اقشا ءتۇسىرىپ تۇرادى.
– بۇل قارجى قانداي ماقساتتارعا جاراتىلادى؟
– تۇراقتىڭ 1 ساعاتتىق باعاسى 100 تەڭگە تۇرادى. مۇنىڭ 12 تەڭگەسى – سالىققا, 9 تەڭگەسى تۇراق ايماعىن ۇستاپ تۇرۋعا ۇستالادى. تاعى 10 تەڭگەنى امورتيزاتسياعا بەرەمىز, 21 تەڭگەنى تۇراقتاردى پايدالانۋعا, تەحنيكالىق قىزمەت كورسەتۋگە, جوندەۋگە, باسقارۋ جۇيەسىنە تولەيمىز, 23 تەڭگە ينۆەستيتسيانى قايتارۋعا جۇمسالادى, 5 تەڭگە قىزمەتكەرلەردىڭ جالاقىسى بولسا, تاعى
5 تەڭگە تولەم اگەنتىنىڭ كوميسسياسىنا كەتەدى, 7 تەڭگە مەملەكەتتىك ارىپتەسكە ۇسىنىلادى, ال 8 تەڭگە جەكە ارىپتەستىڭ تازا تابىسى بولىپ تابىلادى.
تۇراقتاعى باعالار تۇراقتى بولادى
– تۇراقتىڭ باعالارى تۇراقتى قالىپ ۇستاي ما؟
– قالالىق اكىمدىك تۇراق ءتاريفىن بەلگىلەپ بەرگەن. ونىڭ, بەكىتىلگەن قاۋلىعا سايكەس, ءار ساعاتتىق باعا 100 تەڭگە تۇراتىنىن جاڭا ايتتىم. سوندىقتان جاقىن ارادا باعا تۋرالى قايتا اڭگىمە بولۋى مۇمكىن ەمەس.
– سوندا ورتا دەڭگەيلى كولىك يەسى تۇراق ءۇشىن ايىنا قانشا تولەيدى؟ مەن بۇل جەردە «نۇرجول» بۋلۆارىنا جاقىن جەردە جۇمىس جاسايتىن نەمەسە سول ماڭدا تۇراتىن تۇراقتى كليەنتكە قاتىستى ءسوز قوزعاپ وتىرمىن.
– اقىلى تۇراقتار جوباسىنىڭ پايدا بولعانىنا ايدان ەندى عانا استى. ستاتيستيكا بولسا, كۇن سايىن وزگەرىپ جاتىر. سول سەبەپتى تۇراقتى كليەنتتەر تۋرالى دا ازىرگە ەشتەڭە ايتا المايمىن. بۇعان ءالى ەرتە. دەگەنمەن, ءبىزدىڭ جۇيەدە تاۋلىگىنە 1200 تەڭگە تولەگەندەر كەزدەسىپ قالۋدا. بۇل بەلگىلى اۆتوكولىك يەسىنىڭ تۇراق مەكەنىن 12 ساعات پايدالانعانىن كورسەتەدى.
– كەيبىر مەيرامحانالاردا الدەقانداي ءبىر وقيعالارعا بايلانىستى كەش ۇيىمداستىرىلىپ جاتادى. مۇنداي كليەنتتەرگە كورسەتىلەتىن جەڭىلدىكتەر بار ما؟
– ەگەر ولار تۇراقتى كليەنتتەر بولسا, ءبىزدىڭ نازارىمىزدان تىس قالمايدى. بالكي, تەگىن ابونەمەنتتەر دە بولىپ قالار. قالاي دەگەندە, وسىعان ۇقساس اكتسيالاردىڭ بولاتىنى انىق. بىراق ونىڭ جاي-جاپسارىن قازىر تولىق اشىپ ايتا المايمىن. ايتپەسە, ونىڭ نەسى توسىن سىي بولماق؟
– تۇراق تولەمى قالاي تولەنەدى؟
– پاركينگ ءۇشىن اقى تولەۋ «اكتيۆ» جانە «بيلاين» ءموبيلدى وپەراتورلارىنا ارنالعان sms كومەگىمەن پاركومات ارقىلى ءجۇرگىزىلەدى. ول تەڭگە تاستاۋ نەمەسە بانك كارتاسى جولىمەن جاسالادى. بۇل ءۇشىن Android جانە iOS ءموبيلدى قوسىمشالارىن پايدالانۋ كەرەك. بۇدان بولەك, تولەمدى www.2888.kz سايتىنداعى جەكە
كابينەتتەن جاساۋعا دا بولادى. سول سياقتى 9 اقپاننان بەرى بارلىق ءموبيلدى وپەراتورلاردىڭ ابونەنتتەرى «كاسسا 24» تەرمينالىن پايدالانا باستادى.
– كولىك تۇراقتا اقى تولەنگەن ۋاقىتىنان كوبىرەك تۇرىپ قالعان جاعدايدا نە ىستەۋ كەرەك؟
– سول تاۋلىك اياقتالعانشا, ياعني ساعات ءتىلى 24:00 سوققانعا دەيىن مىندەتتى تۇردە قالعان سوما ەسەپشوت ارقىلى تولەنۋگە ءتيىس. كولىك يەسى سايتقا تىركەلگەن كەزدە ەسەپشوت اۆتوماتتى تۇردە ءوزى اشىلادى. ولاي ەتپەگەن جاعدايدا ول تۇراق تولەمىن تولەۋدەن جالتارعان بولىپ سانالىپ, 3 ەڭ تومەنگى ەسەپتى جالاقى مولشەرىندە ايىپپۇل سالىنادى.
– بۇدان باسقا, اۆتوموبيل يەلەرىنە قاتىستى تاعى قانداي ايىپپۇلدار نەمەسە وزگە اسەر ەتۋ شارالارى قاراستىرىلعان؟
– تۇراق ءۇشىن اقى تولەۋدەن باس تارتۋشىلىققا قانداي شارا قولدانىلاتىنىن جوعارىدا ايتتىم. جىل كولەمىندە بۇل جاعداي ەكىنشى رەت قايتالانعان جاعدايدا بۇعان كىنالى كولىك يەسى 5 ەڭ تومەنگى ەسەپتى جالاقى مولشەرىندە ايىپپۇل تولەيتىن بولادى. مۇنىڭ ءبارى اكىمشىلىك قۇقىق بۇزۋشىلىق كودەكسىنەن الىنىپ وتىر. بىراق ايىپپۇل سالۋ ءبىزدىڭ قۇزىرىمىزعا كىرمەيدى, ونى استانا قالالىق ىشكى ىستەر دەپارتامەنتىنە قاراستى اكىمشىلىك پوليتسياسى باسقارماسى جاسايدى.
– بەلگىلەنىپ قويىلعان پاركوماتتاردىڭ ءبارى دۇرىس جۇمىس ىستەپ تۇر ما؟ ولاردى الدەكىمدەردىڭ سىرتتان بۇزعىسى كەلگەن ارەكەتتەرى بايقالعان جوق پا؟
– ءيا, قازىرگى بارلىق پاركوماتتار قالىپتى جاعدايدا جۇمىس جاسايدى. ءبىز ولاردى قوسىمشالار ارقىلى ۇدايى باقىلاۋدا ۇستاپ وتىرمىز. وسىعان ارنالعان باعدارلاما پاركوماتتاردىڭ تەحنيكالىق جاعدايىنان, ونداعى اككۋمۋلياتوردىڭ زاريادى, ترانزاكتسيالار سانى, اقاۋلىعى جانە باسقا جاعداياتى جونىنەن حابار بەرىپ تۇرادى. ءبىزدىڭ تەحنيكالىق قىزمەتىمىز ولاردى ۇنەمى ارالاپ شىعىپ, رەگلامەنتتى جۇمىستار جۇرگىزىپ تۇرادى. ازىرگە الگىندەي بۇزاقىلىق-توناۋشىلىق ارەكەتتەرى كەزدەسكەن جوق.
مەگاپوليستەر ءۇشىن اۋاداي كەرەك جۇيە
– جوبا ءوزىن-ءوزى اقتاي ما؟ وسىمەن قالاداعى اۆتوتۇراق پروبلەماسى تولىق شەشىلە مە؟
– ەلوردا ءۇشىن مۇنداي جوبانىڭ كەرەك ەكەنى ەش كۇمان تۋعىزبايدى. قازىرگى زامانعى مەگاپوليستەر ءۇشىن ول اۋاداي قاجەت نارسە. استانادا تەك كولىك يەلەرى عانا ەمەس, سونىمەن بىرگە جاياۋ جۇرگىنشىلەر دە تۇرادى. وسىعان وراي
ءبىز ەكى جاقتىڭ دا مۇددەلەرىن ەسكەرۋىمىز كەرەك. بىراق قازىرگى تاڭداعى استانانىڭ ەڭ باستى پروبلەماسى كۇندەلىكتى بولىپ جاتاتىن قالا ورتالىعىنداعى كەپتەلىستەر مەن تەجەلىستەر بولىپ تۇر. سول ماسەلەنى شەشۋ بۇگىنگى كۇننىڭ باستى مىندەتتەرىنىڭ بىرىنە اينالىپ وتىر.
ءبىزدىڭ اتالمىش جوبانى ىسكە قوسقانىمىزعا ايدان ەندى عانا اسىپ بارادى. سوندىقتان ونىڭ ءوزىن-ءوزى اقتاعانى نەمەسە اقتاماعانى تۋرالى كەسىمدى پىكىر بىلدىرۋگە ەرتە. جالپى جوباداعى 9 700 تۇراقتىق ورىن جىلدىڭ سوڭىنا دەيىن تولىق دايىندالۋى ءتيىس. ازىرگە ءبىز وسىعان قاتىستى بارلىق مالىمەتتەردى جيناستىرىپ جاتىرمىز. مۇنىڭ ستاتيستيكالىق كورسەتكىشتەرىن ينفوگرافيكا تۇرىندە كورسەتەتىن ۋاقىت تا قاشىق ەمەس.
– اقىلى اۆتوتۇراقتاردى ۇيىمداستىرۋدا استانا مەن الماتىنىڭ اراسىندا قانداي ايىرماشىلىق بار؟ قاي جاقتا ول ىڭعايلىراق جاسالىپ جاتىر؟
– شىنتۋايتىنا كەلگەندە, بۇكىل الەمدە اۆتوتۇراقتار جۇيەسىنىڭ تەحنيكالىق شەشىمى ءىس جۇزىندە ءبىر-بىرلەرىنە ۇقساس كەلەدى. ءبىزدىڭ جاعدايىمىزدا دا سولاي. ەكى جاقتىڭ بەلگىلەپ وتىرعان باعالارى دا بىردەي. تولەم جولدارىندا دا ايىرما جوق. ءبىز تەك جۇيەنى كەيىنىرەك ىسكە قوستىق. سونىڭ ناتيجەسىندە ارىپتەستەرىمىزدەن ۇيرەنىپ, ولاردىڭ جىبەرگەن ولقىلىقتارىنا جول بەرمەۋگە كۇش سالدىق. ءسويتىپ, اۆتوموبيل يەلەرىنىڭ رەنىشىن تۋعىزاتىن جاقتاردان ساقتاندىق.
– تاياۋدا بولعان قاتتى ايازدار كەزىندە الماتىداعى پاركوماتتار توقتاپ قالعان ەكەن. استانادا ونداي جاعداي بولماي ما؟
– ەلوردا كليماتىنىڭ قاتال ەكەنىنەن قاراماستان, بىزدەگى پاركوماتتار وزدەرىن وتە جاقسى قىرىنان كورسەتتى. تەڭگە قابىلدايتىن ۇياشىقتار اقاۋسىز جۇمىس ىستەپ تۇردى. ال ايرىقشا اياز بولعان كۇندەرى قالا اكىمى اسەت يسەكەشەۆتىڭ باستاماشىلىعىمەن ءبىز تۇراق ءۇشىن اقى دا العان جوقپىز.
– جاڭا اقىلى تۇراقتار قايدا جانە قاشان قاتارعا قوسىلادى؟
– بيىلعى جىلدىڭ ءبىرىنشى توقسانى ىشىندە قوناەۆ, سارايشىق, سىعاناق كوشەلەرىندە, ماڭگىلىك ەل, جانە قابانباي باتىر داڭعىلدارى اۋداندارىندا اقىلى تۇراقتار جاسالادى. جىلدىڭ سوڭىنا دەيىن اقىلى تۇراقتار ايماعى وڭ جاعالاۋداعى ءۋاليحانوۆ, باراەۆ كوشەلەرى مەن سارىارقا, بوگەنباي باتىر, رەسپۋبليكا داڭعىلدارى اۋداندارىنداعى ۋچاسكەلەر ەسەبىنەن كەڭەيە تۇسەدى.
سۇحباتتاسقان
سەرىك ءپىرنازار
