استانادا بۇكىلالەمدىك بوكس سەرياسىنىڭ شەشۋشى باسەكەسى ءوتتى. فينالعا دەيىن بارلىق قارسىلاستارىنان باسىم تۇسكەن قوس كوماندا – «Astana Arlans» پەن «Cuba Domadores» «قازاقستان» سپورت كەشەنىندە ءوزارا مىقتىلارىن انىقتادى. ناتيجەسىندە ارلاندار جەتىنشى ماۋسىمنىڭ جەڭىمپازى اتاندى.
نەگىزى قارسىلاستار 10 سالماق دارەجەسى بويىنشا جۇدىرىقتاستى. بىراق جەكپە-جەكتەردىڭ ەسەبى بويىنشا تارازى باسى تەڭ بولعاندىقتان, قوسىمشا تاعى ءبىر كەزدەسۋ ءوتتى.الدىمەن شارشى الاڭعا كوتەرىلگەن 49 كەلى سالماقتاعى تەمىرتاس ءجۇسىپوۆ يوحانۋس ارگيلاگوستان ايلاسىن اسىردى. ودان كەيىن 56 كەلىدە ءىلياس سۇلەيمەنوۆ حاۆەر يبانەستى جەڭىپ, كومانداسىن 2:0 ەسەبىمەن العا شىعاردى. ودان كەيىن قاتارىنان ءتورت بوكسشىمىز ەسە جىبەرىپ قويدى. اتاپ ايتساق, انتون پينچۋك (91 كگ) ەريسلاندي ساۆوننان, ءدىلمۇرات ءماجيتوۆ (64 كگ) ەندي كرۋزدان, ءابىلدان امانقۇل (75 كگ) ارلەن لوپەستەن, ارمان رىسبەك (81 كگ) حۋليو لا كرۋزدان ۇتىلىپ قالدى.
تارتىستى دودانىڭ ەكىنشى كەزەڭىندە «Astana Arlans» كاپيتانى ولجاس ساتتىباەۆ كۋبالىق يوسباني ۆەيتيادان جەڭىلىپ, كۋبالىقتار جالپى ەسەپتى بىردەن 2:5-كە جەتكىزدى. وسىدان كەيىن-اق قاتارىنان ويسىراي ۇتىلعان وتانداستارىمىزدا جەڭىستى جۇلىپ الاتىنداي جىگەر قالماعانداي كورىنگەن. بىراق ءالى دە مۇمكىندىك بارىن جاقسى سەزىنگەن ولجاس بوقاەۆ +91 كەلىدە تىسقاققان بوكسشى يواندري تويراكتان باسىم ءتۇسىپ, كومانداسىنىڭ رۋحىن كوتەرىپ قويدى. سودان كەيىن 60 كەلىدە زاكىر سافيۋللين لازارو الۆارەستى بەت قاراتپاي ۇتتى. ال «قازاقتىڭ سالماعى» اتانىپ كەتكەن 69 كەلىدە اسلانبەك شىمبەرگەنوۆ رونەل يگلەسياستى جەڭىپ, جالپى ەسەپتى تەڭەستىردى.
وسىدان كەيىن قوسىمشا تاعى ءبىر جەكپە-جەك ءوتىپ, جەڭىمپاز كوماندا انىقتالدى. ۇلكەن ءۇمىت كۇتكەن 52 كەلىدەگى ولجاس باينيازوۆ فرەنك زالديۆاردى قاپى قالدىرىپ, جەرلەستەرىنىڭ سەنىمىن اقتادى.
وسىلايشا, «Astana Arlans» كومانداسى بۇكىلالەمدىك بوكس سەرياسىنىڭ (WSB) ءۇش دۇركىن چەمپيونى اتاندى. ءبىزدىڭ كوماندا بۇعان دەيىن بۇل بەلەستى 2013 جانە 2015 جىلدارى باعىندىرعان بولاتىن. جالپى ارلاندار ءار جىلدارى جۇلدەگەرلەر قاتارىنان تۇسكەن ەمەس.
ورىنبەك وتەمۇرات
