اباتتانعان اۋلا شاھارداعى تۇرعىن ۇيلەردىڭ شىرايىن اشىپ, تىنىسىن كەڭەيتتى. جاڭاشا تۇرگە ەنگەن ويىن الاڭدارى ءۇي الدىن دۋمانعا بولەپ, بالالاردىڭ مەرەيىن تاسىتتى, كورشىلەردىڭ بىرلىگىن ارتتىردى.
ەلوردادا بارلىق قاجەتتى قۇرالدارمەن جابدىقتالعان اۋلالار از ەمەس. ونداعى ءارتۇرلى جاستاعى بالالارعا ارنالعان ويناۋ الاڭى مەن فۋتبول الاڭى – جاسوسپىرىمدەر قۇزىرىندا. بۇلدىرشىندەر اتكەنشەك تەۋىپ, ءتۇرلى ويىننىڭ قىزىعىنا باتقاندا, بالاسىن ويناتۋعا شىققان اتا-انا دا بوسقا تۇرماي, جاتتىعۋ جاسايدى. تاياعىنا سۇيەنگەن قاريالار دا قاۋقىلداسىپ, ابىر-سابىر اڭگىمە-دۇكەن قۇرادى. سول سياقتى بەلتەمىر مەن قوسسىرىق ماڭىن تورۋىلداۋشىلار دا استە ازايمايدى. سونىمەن قاتار, ورىندىقتار مەن قوقىس جاشىكتەرى دە كوپتەپ قاراستىرىلعان اۋلالار قالادا جەتىپ ارتىلادى.
ەڭبەكتەگەن بالادان ەڭكەيگەن قارتقا دەيىن جۇرەتىن مۇنداي اۋلالاردىڭ تىرشىلىگى قاۋىرت. وسىنداي اۋلالاردا دەمالۋدىڭ ءوزى ءبىر عانيبەت ەكەنىن ايتادى تۇرعىندار. بىراق بەس ساۋساق سياقتى شاھارداعى بارلىق اۋلالار بىردەي دەڭگەيدە ەمەس. ولاردىڭ اراسىندا جوندەۋدى جاڭعىرتۋدى قاجەت ەتەتىندەرى دە بار.
جالپى, استاناداعى اۋلالار سانى 1500-دەن اسادى. ونىڭ 387-ءسى الماتى اۋدانىنا تيەسىلى. بۇل اۋلالاردىڭ 147-ءسى اباتتاندىرىلعان. بيىل اتالمىش اۋدانداعى 203 اۋلاعا جوندەۋ جۇرگىزىلمەك. ال بايقوڭىر اۋدانىندا 234 اۋلانىڭ 110-ى جوندەۋدى قاجەت ەتەدى ەكەن. جوسپار بويىنشا بيىل سونىڭ 53-ءى جوندەلمەك.
ەسىل اۋدانىنىڭ ەنشىسىندەگى 268 اۋلانىڭ 58-ءى 2012-2016 جىلدار ارالىعىندا اباتتاندىرىلىپ, 42 سپورت الاڭى سالىنىپتى. بۇل اتالمىش اۋدانداعى 118 كوپ قاباتتى تۇرعىن ءۇيدى قامتيدى ەكەن. سونىمەن قاتار, وتكەن جىلى 11 تۇرعىن ءۇيدى قامتيتىن 5 اۋلاعا قالىپقا كەلتىرۋ, جوندەۋ جۇمىستارى جۇرگىزىلىپ, وندا 5 بالالار جانە 4 سپورت الاڭى قويىلعان. ەندى بۇل اۋدانداعى 40 اۋلاعا جوندەۋ جۇرگىزىلىپ, ونىڭ 15-ىنە پاندۋس سالىنۋدا.
استاناداعى ەڭ اۋلاسى كوپ اۋدان – ول سارىارقا. ونداعى 540 اۋلانىڭ تازالىعىنا 16 مەردىگەرلىك ۇيىم قىزمەت كورسەتەدى. بۇل اۋداندا بىلتىر جاسامپاز جوبالاردى جۇزەگە اسىرۋ اياسىندا 22 مەكەنجاي بويىنشا تۇرعىن ۇيلەردىڭ ىشكى ورامدىق اۋلالارىن اباتتاندىرۋ جۇمىستارى جۇرگىزىلگەن. ياعني اسفالت توسەلىپ, بالالاردىڭ ويىن الاڭدارى, توبەشىك, اتكەنشەك, قۇمسالعىش, شاعىن ساۋلەت پىشىندەرى قويىلعان. سونىمەن قاتار, فۋتبول جانە باسكەتبول الاڭدارىمەن قوسا, 61 جاتتىعۋ قۇرىلعىسى بار التى جاتتىعۋ الاڭى سالىنعان. سول سياقتى اۋدان اۋماعىنداعى 63 مەكەنجايدىڭ ىشكى ورامدىق اۋلالارى مەن وتپە جولدارىنا جوندەۋ جۇمىستارى جۇرگىزىلگەن.
