فۋتبولدان بيىلعى ۇلتتىق بىرىنشىلىك تە وتە تارتىستى ءوتتى. وتكەن جىلداعىداي قازاقستان چەمپيونى سوڭعى تۋردا انىقتالدى. بۇل اتاققا ەكىنشى رەت قاتارىنان «استانا» فۋتبول كومانداسى يە بولدى.
ەرتە كوكتەمدە باستالعان چەمپيوناتتىڭ ءبىرىنشى جانە ەكىنشى كەزەڭىندە دە «استانا» مەن «قايرات» قۇيرىق تىستەسىپ, سوڭعى تۋرعا دەيىن باسەكە كورىگىن قىزدىرىپ كەلدى. سول سوڭعى تۋر الدىندا «استانادا» 43 ۇپاي, ال «قايراتتا» 42 ۇپاي بولدى. سوندىقتان جەكسەنبى كۇنى وتكەن ماتچ ەكى كوماندا ءۇشىن دە وتە-موتە ماڭىزدى بولعانى ءسوزسىز. ەكەۋىنە دە جەڭىلۋگە بولمايتىن ەدى.
سوڭعى تۋردا «استانا» ءوز الاڭىندا ەلىمىزدىڭ بەس دۇركىن چەمپيونى «اقتوبە» كومانداسىن قابىلدادى. ال الماتىدا ەلىمىزدىڭ ەكى دۇركىن چەمپيونى «قايرات»پەن «ورداباسى» كەزدەستى. بۇل كۇنگى ويىندار ءبىر مەزگىلدە باستالدى.
«استانا ارەنا» ستاديونىندا وتكەن ويىندا «اقتوبە» الاڭ يەلەرىنە كەرەمەت قارسىلىق كورسەتتى. ستانيمير ستويلوۆ جىگىتتەرى ءۇستى-ۇستىنە شابۋىل جاساپ باقتى. الايدا, قوناقتاردىڭ جاس قاقپاشىسى جانكەشتىلىك تانىتتى. تالاي سوققىنىڭ بەتىن قايتارا ءبىلدى. ءسويتىپ, ءبىرىنشى تايم اياقتالىپ, تابلوداعى كورسەتكىش وزگەرمەي قالدى. ال ەكىنشى تايم سول ۇردىسپەن باستالدى. ورتادان تانات نوسەرباەۆ پەن رودجەر كانياس, سول قاپتالدان باۋىرجان دجولچيەۆ, وق قاناتتان فوكسي قايتا-قايتا قاۋىپ توندىرگەنىمەن, قوناقتار قاقپاسىنىڭ قۇلپى اشىلماي قويدى. باس باپكەر ويىنشىلاردى اۋىستىرۋدى ءجون سانادى. شابۋىل شەبىنە ششەتكين مەن كابانانگا شىقتى. ۋاقىت زىمىراپ ءوتىپ جاتتى. وسى تۇستا ستاديونداعى ديكتور «قايرات» 2:0 ەسەبىمەن جەڭىپ جاتقانىن حابارلادى. استانا فۋتبولشىلارى ودان سايىن العا ۇمتىلدى.
ويىننىڭ 85-مينۋتىندا قوناقتار ويىنشىسى سانتانا مەن حيجنيچەنكو ءوزارا جاعا جىرتىسىپ قالدى. قىزبالىقپەن كوماندالاسىنا قول جۇمساپ جىبەرگەن قازاقستان قۇراماسىنىڭ شابۋىلشىسى الاڭنان قۋىلدى. ال كەرىسىنشە باپكەرلەر نۇسقاۋىن ورىنداۋعا اسا ءمان بەرىپ ويناعان «استانا» ويىنشىلارى ماتچتىڭ 88-مينۋتىندا قارسىلاستار قاقپاسىنان ساڭىلاۋ تاپتى. سەرىكجان مۋجيكوۆتىڭ ادەمى پاسىن كونگولىق لەگيونەرىمىز جۋنيور كابانانگا «اقتوبە» قاقپاسىنا تۋلاتىپ ءتۇسىردى. وسى ساتتە ستاديون ىشىندەگى جانكۇيەرلەر ايقايىنان قۇلاق تۇندى. ەسەپ 1:0! وسى ەسەپ ويىن سوڭىنا دەيىن ساقتالىپ قالدى.
سونىمەن «استانا» فۋتبول كومانداسى ەكىنشى رەت قاتارىنان قازاقستان چەمپيونى اتاعىن جەڭىپ الدى.
ال «قايرات» پەن «استانا» اراسىنداعى باسەكە ءالى اياقتالعان جوق. ەلىمىزدىڭ ۇزدىك كوماندالارى 21 قاراشا كۇنى قازاقستان كۋبوگىنىڭ فينالىندا كەزدەسەدى.
ال ەلىمىزدىڭ ەكى دۇركىن چەمپيونى ۋەفا چەمپيوندار ليگاسىنىڭ توپتىق تۋرنيرىندەگى كەزەكتى ويىنىن استانا تورىندە 25 قاراشا كۇنى «بەنفيكا» كومانداسىمەن وتكىزەدى.
