«استانا حاب» بولاشاققا جەتەلەيدى
ەلباسى «استانا حاب» ءىت-ستارتاپتار حالىقارالىق تەحنولوگيالىق پاركىنىڭ رەسمي اشىلۋ راسىمىنە قاتىستى. مەملەكەت باسشىسى ءىس-شارا باستالار الدىندا قازاقستاندىق ستارتاپ-كومپانيالاردىڭ جوبالارىمەن تانىسىپ, عىلىمي-زەرتتەۋ زەرتحانالارىن ارالاپ كوردى, سونداي-اق IT-ۋنيۆەرسيتەتتىڭ الداعى جۇمىسى مەن «تسيفرلىق قازاقستان» مەملەكەتتىك باعدارلاماسىنىڭ ىسكە اسىرىلۋ بارىسى جونىندەگى باياندامالاردى تىڭدادى.
نۇرسۇلتان نازارباەۆ سالتاناتتى اشىلۋ ءراسىمىندەگى قۇتتىقتاۋ ءسوزىندە «استانا حاب» ءىت-ستارتاپتار حالىقارالىق تەحنولوگيالىق پاركىن رەسمي تۇردە ىسكە قوسۋ شاراسىنا قاتىسۋشىلارعا ريزاشىلىق ءبىلدىردى.
قازاقستان پرەزيدەنتى ەلىمىز بەن قوعامىمىزدى ودان ءارى دامىتۋ ىسىندە تسيفرلاندىرۋ ۇدەرىسىنىڭ ءمانى زور ەكەنىن اتاپ ءوتتى.
– زاتتار ينتەرنەتى, جاساندى ينتەللەكت, 3D-باسپا تەحنولوگيالارى جانە بلوكچەين ادامزات ءومىرىنىڭ بۇكىل سالاسىنا بەلسەندى تۇردە ەنىپ كەلەدى. بۇل – قازىرگى زاماننىڭ نەگىزگى ءۇردىسى. تسيفرلاندىرۋ مەملەكەتتەردىڭ دامۋى مەن باسەكەگە قابىلەتتىلىگىنىڭ ماڭىزدى فاكتورلارىنىڭ بىرىنە اينالدى. بۇگىندە الەمنىڭ جەتەكشى ەلدەرى, سونداي-اق ولاردىڭ G-20 جانە ەۋروپا وداعى سياقتى بىرلەستىكتەرى وزدەرىنىڭ تسيفرلاندىرۋ جونىندەگى ستراتەگيالىق قۇجاتتارىن قابىلدادى, – دەدى مەملەكەت باسشىسى.
نۇرسۇلتان نازارباەۆ ەلىمىزدەگى تسيفرلاندىرۋ باعدارلاماسىنىڭ جۇزەگە اسىرىلۋ ۇدەرىسى مەن وسى باعىتتا قول جەتكىزىلگەن ناتيجەلەرگە ارنايى توقتالدى.
– قازاقستان – تمد-دا مەملەكەتتىك قىزمەت كورسەتۋ ءىسىن ەلەكتروندى فورماتقا كوشىرۋدى ءبىرىنشى بولىپ باستاعان ەلدەردىڭ ءبىرى. بىلتىر قازاقستاننىڭ ءۇشىنشى جاڭعىرۋىنا قادام باستىق. ناقتى جەتىستىكتەرىمىز دە بار, – دەدى ەلباسى.
قازاقستان پرەزيدەنتى «استانا حاب» ءىت-ستارتاپتار حالىقارالىق تەحنولوگيالىق پاركى قازىرگى يننوۆاتسيالىق ەكوجۇيەنىڭ وزەگىنە اينالۋعا ءتيىس ەكەنىن ايتتى.
– تەحنوپاركتىڭ جۇمىسىنا قاتىسۋشىلار جەڭىلدەتىلگەن ۆيزا جانە ەڭبەك رەجىمدەرىن پايدالانا الادى, سونداي-اق ولارعا سالىق جانە باسقا دا جەڭىلدىكتەر بەرىلەدى. تەحنوپارك بازاسىندا تالىمگەرلىك ينستيتۋتى قۇرىلدى. ونىڭ اياسىندا ساراپشىلار ستارتاپ-كوماندالارعا قامقورلىق جاسايتىن بولادى, – دەدى مەملەكەت باسشىسى.
سونىمەن قاتار, نۇرسۇلتان نازارباەۆ ءىت-تەحنولوگيالاردى دامىتۋعا تارتىلعان دارىندى جاستاردى قولداۋ قاجەتتىگىنە باسا نازار اۋداردى.
سونداي-اق, ەلباسى قازاقستاندا بيزنەستى جەبەۋشىلەر كلۋبىن (QazAngels), ۆەنچۋرلىك كاپيتاليستەر قاۋىمداستىعىن جانە بىرلەسە ينۆەستيتسيالاۋ قورىن قۇرۋ ماسەلەسى جونىندە ايتتى.
سوڭىندا نۇرسۇلتان نازارباەۆ بارشا جۇرتتى يننوۆاتسيالار مەن تسيفرلىق تەحنولوگيالاردى دامىتۋ ىسىنە بەلسەنە اتسالىسۋعا شاقىرىپ, بۇل سالانى ىلگەرىلەتۋ ءۇشىن زور مۇمكىندىكتەر بار ەكەنىن اتاپ ءوتتى.