وتكەن جىلى استاناعا 1 ترل تەڭگەدەن استام ينۆەستيتسيا قۇيىلدى. بۇل – ەلوردا تاريحىنداعى رەكوردتى كورسەتكىش. وسىنى اتاپ وتكەن قالا باسشىسى بيىل دا ينۆەستيتسيالار ارتىپ جاتقانىن, سونىڭ ىشىندە ونەركاسىپ, دەنساۋلىق ساقتاۋ, ساۋدا, قىزمەت كورسەتۋ سالالارىندا ءوسۋ بايقالىپ وتىرعانىن جەتكىزدى.
– استانا شەتەلدىك كاپيتال ءۇشىن تارتىمدى بولا ءتۇستى. ينۆەستيتسيانىڭ جالپى كولەمىنىڭ شيرەگى – شەتەلدىك ينۆەستورلار ۇلەسىندە. قازىر 3 تريلليون تەڭگەنى قۇرايتىن 193 جوبامەن جۇمىس ىستەپ جاتىرمىز. سونىڭ 44-ىنە شەتەلدىك ينۆەستورلار مەن ترانسۇلتتىق كومپانيالار قاتىسىپ جاتىر, – دەدى ب.سۇلتانوۆ.
كوممۋنالدىق تاريفتەر تومەندەدى
مەملەكەت باسشىسى نۇرسۇلتان نازارباەۆ «قازاقستاندىقتاردىڭ ءال-اۋقاتىنىڭ ءوسۋى: تابىس پەن تۇرمىس ساپاسىن ارتتىرۋ» اتتى حالىققا جولداۋىندا كوممۋنالدىق قىزمەتتەر ءتاريفىن تومەندەتۋگە تاپسىرما بەرگەنىن اتاپ وتكەن باقىت سۇلتانوۆ اقپان ايىنىڭ تۇبىرتەگى كەلگەندە تۇرعىندار مۇنى اڭعارا الاتىنىن جەتكىزدى. اتاپ ايتقاندا, سۋمەن قامتاماسىز ەتۋ 10 پايىزعا, جىلۋمەن قامتاماسىز ەتۋ (ەسەپتەۋ قۇرالىمەن) 9 پايىزعا, ەلەكتر ەنەرگياسى 9 پايىزعا تومەندەگەنى بايقالادى.
– استانا الەمدەگى ەڭ سۋىق استانالاردىڭ قاتارىنا جاتاتىندىقتان, بۇل كورسەتكىش بويىنشا ۇلان باتور مەن وتتاۆانىڭ ورتاسىندا تۇرىپ, ەكىنشى ورىن الاتىندىقتان جىلۋمەن قامتاماسىز ەتۋگە ەڭ كوپ كوڭىل بولەمىز. قالا جىلۋ قۋاتتارىمەن جەتكىلىكتى دەڭگەيدە قامتاماسىز ەتىلدى, – دەگەن ب.سۇلتانوۆ جاڭا تۇتىنۋشىلاردى ورتالىق جىلۋ-ەلەكترەنەرگياسى جۇيەسىنە قوسۋ ماقساتىندا اتقارىلاتىن جۇمىستارعا توقتالدى.
ينجەنەرلىك جەلىلەر جاڭعىرتىلادى
قازىر 1-جەو-نى قايتا قۇرۋ جۇمىستارىن جىلدىڭ سوڭىنا دەيىن اياقتاۋ, سول مەرزىمگە دەيىن 2-جەو-عا قوسىمشا قۋاتتاردى قوسۋ جوسپارلانىپ جاتىر. بۇعان قوسا, «نۇرلى جول» باعدارلاماسىنىڭ اياسىندا سۋمەن قامتاماسىز ەتۋ جانە سۋ بۇرۋ جەلىلەرىنىڭ 24 شاقىرىمىن جاڭعىرتۋعا 3,4 ملرد تەڭگە ءبولىندى. وسى جىلى جەلىلەردىڭ 22 شاقىرىمىن جاڭعىرتۋ جوسپارلاندى.
«اقىلدى» قالانىڭ قادامدارى
استانادا «اقىلدى» قالا جوباسىنىڭ زاماناۋي تسيفرلى تەحنولوگيالارى ەنگىزىلىپ جاتىر. قازىرگى كەزدە سونىڭ ءىرى مالىمەتتەردى جيناۋ مەن تالداۋ جۇيەسى, «سەرگەك» بەينەباقىلاۋ جۇيەسى, Smart-ءبىلىم, Smart-مەديتسينا, ەلەكتروندى پيك, كوممۋنالدى-تۇرعىن ءۇي سالاسىن تسيفرلاندىرۋ سەكىلدى جوبالارى جۇزەگە اسىرىلىپ جاتىر. وسىعان توقتالعان ب.سۇلتانوۆ بيىل «اقىلدى جارىقتاندىرۋ» جوباسى باستالىپ, 31 مىڭ شام اۋىستىرىلاتىنىن جەتكىزدى. بۇل جۇمىس «زاتتار ينتەرنەتى» تەحنولوگياسىن قولدانۋ ارقىلى جۇرەدى.
– اتالعان تەحنولوگيا قوندىرعىلاردىڭ قوسىلۋىن, مالىمەتتەردىڭ جينالۋى مەن ساراپتامالىق اقپاراتتىڭ الىنۋىن قامتاماسىز ەتىپ, شىعىنداردى قىسقارتادى, جۇمىس ناتيجەلىگىن ارتتىرادى, – دەدى استانا اكىمى.
قولايلى يننوۆاتسيالىق ورتا ءىسىن جاڭا باستاپ جاتقان كاسىپكەرلەرگە جاڭا كەڭىستىكتەردى اشاتىنىن ايتقان قالا باسشىسى بۇل باعىتتاعى جوسپارلارمەن ءبولىستى. بيىلعى ءساۋىر ايىندا قالادا كاسىپكەرلەر مەن يننوۆاتورلاردىڭ باسىن بىرىكتىرەتىن يننوۆاتسيالىق الاڭ اشىلماق. بۇعان قوسا, وسى جىلى «ەكسپو» قالاشىعىنداعى پاۆيلونداردىڭ بىرىندە ۇزدىك شەشىمدەرگە ارنالعان «IDEA Park» اشۋ جوسپارلانۋدا. وندا «اقىلدى» قالا سالاسىنداعى وزىق تەحنولوگيالار قولدانىلادى.
