استانا كۇنىندە الامان بايگە وتەدى
![](https://astana-akshamy.kz/wp-content/uploads/2023/02/dsc_5987-780x470.jpg)
استانا قالاسىنىڭ كوممۋنيكاتسيالار ورتالىعىندا وليمپيادالىق ات سپورتى تۇرلەرى بويىنشا مەملەكەتتىك جاتتىقتىرۋشى امانجول حاسەنوۆ بريفينگكە قاتىستى. ال «ارعىماق» ات-سپورتتىق ساۋىقتىرۋ كەشەنى باسشىسى ارمان ءمۇسىپوۆ كوپسالالى كەشەننىڭ جۇمىسى تۋرالى باياندادى.
بريفينگتە استانا قالاسىندا ات سپورتى تۇرلەرى بويىنشا وتەتىن جارىستاردىڭ ماڭىزىن بىلدىك.
– 26 اقپاندا ەلورداداعى «ارعىماق» ات-ساۋىقتىرۋ سپورت كەشەنىنىڭ كۋبوگى وتەدى. بۇل جارىستىڭ جۇلدە قورى – 12000000 تەڭگە. جارىس «بالالار ساناتى» بويىنشا بيىكتىگى 110 سم-گە دەيىن كەدەرگىدەن سەكىرۋ, 4 جاستاعى جاس اتتار 100 سانتيمەترگە دەيىنگى كەدەرگىدەن سەكىرۋ, 5 جاستاعى 120 سانتيمەترگە دەيىنگى كەدەرگىدەن سەكىرۋ, 6 جاستاعى 125 سانتيمەترگە دەيىنگى كەدەرگىدەن سەكىرۋ جانە «كاتەگوريا اشىق كلاسس» بويىنشا بيىكتىگى 130 سانتيمەترگە سەكىرۋ باعدارلاماسى بويىنشا وتەدى, – دەدى ا.حاسەنوۆ.
حالىقارالىق ايەلدەر مەرەكەسى قارساڭىندا ايەلدەر اراسىندا دا جارىس وتەدى ەكەن. وعان 30-عا جۋىق شاباندوز قاتىسادى. جارىستىڭ جالپى جۇلدە قورى 6 ميلليون تەڭگەنى قۇرايتىنىن بىلدىك.
ناۋرىز مەرەكەسىندە قاراعاندى, پاۆلودار, پەتروپاۆل, قوستاناي, اقمولا وبلىسى مەن استانا قالاسىنىڭ كومانداسى «قازانات» يپپودرومىندا باس قوسىپ, كوكپار تارتادى. بۇل شارانىڭ جۇلدە قورى – 19,5 ميلليون تەڭگە (1-ورىن – 10 ميلليون تەڭگە, 2-ورىن – 6 ميلليون تەڭگە, 3-ورىن – 3,5 ميلليون تەڭگە).
استانا كۇنىندە الامان بايگە ۇيىمداستىرۋ جوسپارلانىپ وتىر ەكەن.
– ات سپورتى جارىسىنىڭ وزىندىك ەرەكشەلىگى مەن ماقساتى بار. ماسەلەن, جارىسقا كەلەتىن جىلقىلاردىڭ دەنساۋلىعىنا قويىلاتىن ۆەتەرينارلىق تالاپتار قولدانىستاعى ۆەتەرينارلىق زاڭناما مەن ەرەجەلەرگە سايكەس كەلەدى. بارلىق جىلقىلار قازاقستان ات سپورتى فەدەراتسياسىندا تىركەلۋى, ۇلتتىق جىلقى پاسپورتى بولۋى كەرەك, – دەدى مەملەكەتتىك جاتتىقتىرۋشى.
سپيكەردىڭ سوزىنشە, ناۋرىز ايىندا تۇلپار تۇياعىمەن ۇلى دالا ءدۇبىرى جاڭعىرىپ, ۇلتتىق رۋحتى كوتەرەدى.
«ارعىماق» ات-سپورتتىق ساۋىقتىرۋ كەشەنى 3 بلوكتان تۇرادى. ءبىرىنشىسى – ەمدىك اتقا ءمىنۋ (يپپوتەراپيا). ەكىنشىسى – بالالار مەن ەرەسەكتەردى اتقا مىنۋگە ۇيرەتۋ, ءتۇرلى دەڭگەيدەگى سپورت ءىس-شارالارىن ۇيىمداستىرۋدى قامتيدى. ءۇشىنشىسى – سپورتتىق-بۇقارالىق جانە ويىن-ساۋىق ءىس-شارالارىن وتكىزۋ.
– ات-سپورتتىق ساۋىقتىرۋ كەشەنىنىڭ جابىق مانەج الاڭى بار. ونىڭ بيىكتىگى – 12 مەتر, اۋماعى – 40ح80 مەتر. وندا 50 باس جىلقىعا ارنالعان ارنايى ورىن بار. كەشەندە مۋلتيمەديالىق قۇرىلعىلارى بار 150 ادامدىق كونفەرەنتس-زال, اكىمشىلىك بولمەلەر ورنالاسقان, – دەدى ارمان ءمۇسىپوۆ.
اشىق كونكۋر الاڭىندا 70ح100 مەتر بولاتىن 1232 ادامعا ارنالعان تريبۋنا تورەشىلەر ورنى جانە تاعى باسقاسى قامتىلعان. ودان بولەك, 50 اتقا ەسەپتەلگەن 2 ات قورا بار.
«ارعىماقتا» اتتاردى ۇيرەتۋ, ونىڭ ىشىندە اساۋ اتقا باس ءبىلدىرۋ, اتتاردى ارنايى دايىنداۋ جانە كۇتۋ, ۆەتەرينارلىق باقىلاۋ, تاعى باسقا جۇمىستار جۇرگىزىلەدى.
قىسقاسى, «ارعىماق» كەشەنى – قالا تۇرعىندارى مەن قوناقتارىنا ويىن-ساۋىق قىزمەتىن ۇسىناتىن جانە بوس ۋاقىتىن بەلسەندى وتكىزۋگە تاپتىرمايتىن ورىن.