استانادا 27 تامىز كۇنى وتەتىن شىۇ جانە اوسشك حالىقارالىق مارافونىنا ونلاين تىركەلۋ 15 شىلدەدە باستالادى. بۇل تۋرالى بەيجىڭدە وتكەن ءباسپاسوز ءماسليحاتىندا حابارلاندى.
«ەكسپو-2017» حالىقارالىق كورمەسىنىڭ اياسىندا ۇيىمداستىرىلاتىن ەڭ اۋقىمدى شارا ازياداعى ءوزارا ىقپالداستىق جانە سەنىم شارالارى جونىندەگى كەڭەسكە 25 جىل تولۋىمەن تۇسپا-تۇس كەلىپ وتىر. بۇل مارافوندى وتكىزۋ تۋرالى ەكىجاقتى كەلىسىمگە 22 مامىردا كەلگەن ەدى.
ءباسپاسوز جيىنىنا شىۇ باس حاتشىسى راشيد اليموۆ, اوسشك اتقارۋشى ديرەكتورى گۋان دجيۆانۆەي جانە قر مادەنيەت جانە سپورت مينيسترلىگى سپورت جانە دەنە شىنىقتىرۋ ىستەرى كوميتەتىنىڭ توراعاسى ەلسيار قاناعاتوۆ قاتىستى. وندا شىۇ مەن اوسشك قۇرامىنداعى ەلدەردىڭ ەلەمەنتتەرى بار مارافونشى بەينەلەنگەن لوگوتيپ تانىستىرىلدى. سونداي-اق, مارافون تاريحىنا قاتىستى بەينەروليك پەن استانا تۋرالى فيلم كورسەتىلدى.
«بۇل مارافون – «ەكسپو-2017» كورمەسى شەڭبەرىندە وتكىزىلەتىن ەڭ ماڭىزدى شارالاردىڭ ءبىرى. شانحاي ىنتىماقتاستىق ۇيىمىنىڭ تاريحىنداعى العاشقى مارافون 2016 جىلى ءساتتى وتكەن بولاتىن. وعان 15 600 سپورتشى قاتىسقان. ەندى استاناداعى جارىسقا 5000 ادام قاتىسادى دەپ كۇتىلۋدە» دەدى ەلسيار قاناعاتوۆ.
شىۇ جانە اوسشك حالىقارالىق مارافونى استانادا 27 تامىز كۇنى تاڭعى 08.00-دە باستالادى. جارىستار ءۇش قاشىقتىققا بولىنەدى: 42 كم 195 م, 10 كم جانە 2017 مەتر.
جارىس جولى ەلوردانىڭ سول جاعالاۋىنداعى كوشەلەردى قامتيدى. بۇعان شەت ەلدەردەن 1000-عا جۋىق سپورتشى كەلۋى مۇمكىن. ال وزىمىزدەن 4000-عا تارتا قازاقستاندىق قاتىسۋى جوسپارلانۋدا.
ونلاين تىركەۋ 15 شىلدەدەن باستاپ www.scomarathon2017.kz سايتى ارقىلى جۇزەگە اسادى.
ورىنبەك وتەمۇرات
