ءابۋ-دابيدە بيىل 13-15 مامىر ارالىعىندا وتكەن «Abu-Dhabi Healthcare Global Week» اۋقىمدى حالىقارالىق كورمەسىندە استاناداعى قازاقستاننىڭ جەتەكشى كلينيكالارىنىڭ مەديتسينالىق الەۋەتى تانىستىرىلدى.
«Abu-Dhabi Healthcare Global Week» – ءابۋ-دابي دەنساۋلىق ساقتاۋ دەپارتامەنتى ءابۋ-دابي تاق مۇراگەرى شەيح حالەد بەن موحامەد بەن زايد ءال ناحاياننىڭ جوعارى قامقورلىعىمەن ۇيىمداستىرعان ەڭ ءىرى ۇكىمەتتىك كورمە. ءىس-شارادا دەنساۋلىق ساقتاۋ جۇيەسىن جاقسارتۋعا باعىتتالعان يننوۆاتسيالار مەن ىنتىماقتاستىقتى تالقىلاۋ ءۇشىن سالانىڭ جەتەكشى وكىلدەرى جينالدى. اتالعان كورمەگە الەمنىڭ ءتۇرلى ەلىنەن 5000-نان استام ادام, 100 ەكسپونەنت, 200 سپيكەر-ساراپشى جانە 1000 كونفەرەنتسيا دەلەگاتى قاتىستى.
ەلوردا مەديتسيناسىنىڭ الەۋەتىن كورسەتۋ ءۇشىن استانا قالاسىنىڭ مەديتسينالىق ءتۋريزمىن دامىتۋعا ىقپال ەتەتىن «استانا دامۋ ورتالىعى» جشس, قازاقستاننىڭ مەديتسينالىق تۋريزم قاۋىمداستىعى جانە دە قالانىڭ جەتەكشى كلينيكالارىنان قۇرالعان استانا قالاسىنىڭ دەلەگاتسياسى باردى. قاتىسۋشىلار اراسىندا «University Medical Center» كورپوراتيۆتىك قورى, «ءۇمىت» حالىقارالىق توموتەراپيا ونكولوگيا ورتالىعى, «ۇلتتىق عىلىمي ونكولوگيا ورتالىعى» جشس, «Doctor Dent» ستوماتولوگيا كلينيكاسى, «اقجان LTD» جشس لازەر مەديتسيناسى كلينيكاسى, «Callisto Beauty Clinic» مەديتسينا ورتالىعى سياقتى استانا قالاسىنىڭ جەتەكشى مەكەمەلەرى بار. كورمە اياسىندا ەلورداعا ەمدەلۋ ماقساتىندا كەلەتىن تۋريستەردى قىزىقتىراتىن نەيروحيرۋرگيا, ونكولوگيا, ستوماتولوگيا, پلاستيكالىق حيرۋرگيا, كارديوحيرۋرگيا سياقتى باسىم باعىتتار بويىنشا استانا قالاسى مەديتسيناسىنىڭ الەۋەتى تانىستىرىلدى. سونىمەن قاتار ءىس-شارادا قازاقستانداعى مەديتسينا ءتۋريزمى قاۋىمداستىعى بىرىككەن اراب امىرلىگىنىڭ Best Med جانە Stemar سياقتى ءىرى مەديتسينا كومپانيالارىمەن ىنتىماقتاستىق جونىندەگى مەموراندۋمعا قول قويدى. بۇل شارا استانا مەديتسيناسىنىڭ الەۋەتىن شەتەلدىك نارىققا تانىستىرۋعا, ەلورداعا ەمدەلۋ ماقساتىندا كەلەتىن تۋريستەر سانىن ارتتىرۋعا سەپتىگىن تيگىزەدى. ايتا كەتەيىك, استانا قالاسىندا الەمدىك مەديتسينا سالاسىندا «التىن ستاندارت» سانالاتىن JCI حالىقارالىق سەرتيفيكاتىنا يە 7 مەديتسينا ورتالىعى جۇمىس ىستەيدى.
