قر ۇكىمەتى قاۋلىسىمەن استانانىڭ 20 جىلدىعى اياسىندا وتەتىن 175 شارا بەكىتىلدى. بۇل شارالار حالىقارالىق, رەسپۋبليكالىق جانە وڭىرلىك دەڭگەيلەردە ۇيىمداستىرىلادى. ەلوردانىڭ مەرەيتويىنا ارنالعان شارالاردىڭ رەسپۋبليكالىق جوسپارمەن قاتار وڭىرلىك جوسپارى جاسالدى. وڭىرلەردە 1800-دەن اسا شارا وتكىزۋ كوزدەلۋدە. وسىلاي دەپ ورتالىق كوممۋنيكاتسيالار قىزمەتىنىڭ الاڭىندا وتكەن ءباسپاسوز ءماسليحاتى بارىسىندا قر مادەنيەت جانە سپورت مينيسترلىگىنىڭ مادەنيەت جانە ونەر ىستەرى دەپارتامەنتىنىڭ ديرەكتورى الماز نۇرازحان مالىمدەدى.
استانانىڭ 20 جىلدىعىن اتاپ ءوتۋ ءۇش كەزەڭنەن تۇراتىنى بەلگىلى. نەگىزگى كەزەڭ وتكەن جىلدىڭ 10 جەلتوقسانىندا باستالىپ, 6 شىلدەگە دەيىن جالعاسادى. وسىنى ەسكە سالعان الماز شايكەنۇلى مينيسترلىك ەلوردانىڭ مەرەيتويى اياسىنداعى شارالاردىڭ بىرىڭعاي باعدارلاماسىن ازىرلەگەنىن جەتكىزدى.
«ەكسپو-2017» كورمەسى كەزىندە حالىقتى تارتقان ەتنواۋىل ماۋسىم ايىندا قايتا اشىلىپ, قىركۇيەككە دەيىن جۇمىس ىستەيدى. وندا «الپامىس», «تراپەتسيا مەكتەبى» اتتى تەاترلاندىرىلعان تسيرك شوۋلارى ۇيىمداستىرىلادى. «استانالار شەرۋى» اتتى كولەمدى حالىقارالىق جوباعا ەرەكشە ءمان بەرىپ جاتىرمىز. وعان پاريج, بەرلين, لوندون, ماسكەۋ, سينگاپۋر, ت.ب وسى سياقتى الەمنىڭ 20 استانالارىنىڭ جەتەكشى شىعارماشىلىق ۇجىمدارى, تانىمال ارتىستەرى, داڭقتى سپورتشىلارى قاتىسادى» دەدى ول.
ونىڭ ايتۋىنشا, «Astana Musical» تەاترى الەمگە ايگىلى «Notre Dame de Paris» ميۋزيكلىنىڭ اۆتورلارى ريككاردو كوچچانتە مەن ليۋك پلاماندونمەن بىرگە اتالمىش تۋىندىنىڭ تۇساۋكەسەرىن وتكىزەدى. استاناعا گاسترولدەرمەن ماريا تەاترى, امەريكان بالەت تەاترى كەلەدى. سونداي-اق, «استانا» اتتى ءىى دۇنيەجۇزىلىك تەاتر فەستيۆالى وتەدى. قر ۇلتتىق مۋزەيىندە ماۋسىم-قاراشا ارالىعىندا حالىقارالىق كورمەلەرۇيىمداستىرىلادى. بيىل قازاقستاننىڭ ۇلىبريتانياداعى, جاپونياداعى, قىتايداعى كۇندەرى جانە وزبەكستاننىڭ, ازەربايجاننىڭ, رەسەيدىڭ قازاقستانداعى كۇندەرى وتەدى.قر ۇلتتىق اكادەميالىق كىتاپحاناسىنىڭ ديرەكتورى ءۇمىتحان مۇڭالباەۆا كىتاپ ورداسى استانا مەرەيتويىنا ارناپ الەمنىڭ تانىمال 20 كىتاپحاناسىنىڭ كورمەسىن وتكىزەتىنىن جەتكىزدى. 19 مەملەكەتتىڭ كىتاپحانالارىندا قازاقستاننىڭ ادەبي جانە مادەني ورتالىقتارىن اشقاندارىن مالىمدەگەن ول وسىنداي جيىرماسىنشى ورتالىق بيىل گەرمانيادا اشىلاتىنىن, وسىلاردىڭ ءبارى كورمەگە كەلەتىنىن ايتتى. «بىلتىر فرانتسيانىڭ BULAس اتتى ۇلكەن كىتاپحاناسىندا مۇستافا شوقايدىڭ قولجازبالارىن تاپتىق. كىتاپحانا بىزگە بۇل قولجازبالاردى تاپسىرۋعا دايىن» دەدى كىتاپحانا ديرەكتورى.
«استانا بالەت» تەاترىنىڭ ديرەكتورى ۆالەري كۇزەمباەۆتىڭ ايتۋىنشا, بيىل اتالمىش ونەر وشاعى استانا مەرەيتويىنا «جيزەل» بالەتىمەن قوسا قازاق ەرتەگىسى جەلىسىمەن قويىلاتىن بالەتتى تارتۋ ەتەدى. بۇل تۋىندىنىڭ ليبرەتتوسىن باقىت قايىربەكوۆ جازىپ جاتىر.
«استانا وپەرا» تەاترى ديرەكتورىنىڭ ورىنباسارى الەكساندر سوۆوستيانوۆتىڭ سوزىنشە, بيىل بۇل تەاتردىڭ «ءبىرجان-سارا» وپەراسىنىڭ پرەمەراسى اشىق اسپان استىندا وتەدى. كاستينگ جاريالانىپ, قازىرگى تاڭدا باس كەيىپكەرلەردى سومدايتىن ارتىستەر تاڭدالىپ جاتىر. بۇعان قوسا, «قوزى كورپەش-بايان سۇلۋ», «سەۆيليا شاشتارازى», «ەۆگەني ونەگين» وپەرالارى «كورسار» بالەتى قويىلادى. پەكيننىڭ ۇلتتىق وپەرا
تەاترىمەن بىرگە قويىلاتىن «تۋراندوت» وپەراسىن ساحنالاۋعا الەم مويىنداعان رەجيسسەر تيمۋر بەكمامبەتوۆ شاقىرىلىپ وتىر. قازىرگى تاڭدا ونىمەن كەلىسسوزدەر ءجۇرىپ جاتىر.
الماز نۇرازحاننىڭ ايتۋىنشا, استانا مەرەيتويىنا ارنالاتىن ايتۋلى
شارالارعا بيلەتتەر تەحنيكالىق سەبەپتەرگە بايلانىستى ەلەكتروندى ساتىلىمعا ءالى تۇسكەن جوق. «الداعى ناۋرىز ايىندا ساتىلا باستاۋى ءتيىس» دەدى ول.
امانعالي قالجانوۆ
