قازپوشتا – حات-حابار تاراتۋ قىزمەتىمەن بىرگە, ۋاقىت تالاپ ەتەتىن بانكتىك, اگەنتتىك جانە ساندىق قىزمەت تۇرلەرىن جىلدام ءارى ساپالى اتقاراتىن كومپانيا. كۇن سايىن حالىقپەن تىعىز جۇمىس ىستەيتىن الەۋمەتتىك قۇرىلىمعا 30 جىل تولدى. ءبىز ەلدەگى ۇلتتىق وپەراتوردىڭ استانا قالاسىنداعى فيليالىنا بارىپ, جۇمىسىمەن تانىستىق.
قازپوشتانىڭ باستى عيماراتىنان ءبىزدى فيليال باسشىسى باقىتجان ماليكوۆا كۇتىپ الىپ, جول باستاپ, جۇمىسىمەن تانىستىردى.
– استانا قالاسى بويىنشا 17 وبلىستىق جانە 5 مامانداندىرىلعان فيليالى بار. 700-دەن استام ادام تۇراقتى جۇمىس ىستەيدى. ورتاشا جالاقى 276 مىڭ تەڭگەنى قۇرايدى, – دەدى ول.
بۇگىندە پوشتا تورابى زاماناۋي تالاپ-مىندەتتەردى ۇشتاستىرىپ, قىزمەت اياسىن كەڭەيتىپ كەلەدى. ماسەلەن, ەلەكتروندى پوشتا ارقىلى حات-حابارلاردى قابىلداپ, جونەلتەتىن گيبريدتى پوشتا, سالەمدەمە مەن حالىقارالىق اقشا اۋدارىمىن جۇزەگە اسىراتىن «يۋنيستريم», جەدەلدەتىلگەن حاتتى قابىلداپ, جەتكىزەتىن – ەمS, جەدەلدەتىلگەن اقشا اۋدارىمىن ىسكە اسىراتىن «سالەم تەڭگە» سىندى جاڭا قىزمەت تۇرلەرى ىسكە قوسىلدى.
– بۇرىن پوشتا فيليالدارىندا ۇزىن-سونار كەزەك بولاتىن بولسا, ترانسفورماتسيا باعدارلاماسىن بيزنەس-ۇدەرىستى وڭتايلاندىرۋعا, قىزمەت كورسەتۋ سالاسىن جاڭا تەحنولوگيا ارقىلى اۆتوماتتاندىرۋعا جانە ادام رەسۋرسىنىڭ ساپالى وزگەرۋىنە باعىتتاپ, ناتيجەسىندە ادامداردىڭ كەزەككە تۇرۋى قىسقاردى. بۇعان ونلاين قىزمەت تۇرلەرىنىڭ دە ىسكە قوسىلۋى دا اسەر ەتتى. بۇگىندە ەلەكتروندى ساۋدا مەن لوگيستيكالىق قىزمەت ءتۇرىن دامىتۋدىڭ امالىن جان-جاقتى قاراستىرىپ, يننوۆاتسيالىق جانە جوعارى تەحنولوگيالى كومپانياعا اينالۋ باعىتىندا جۇيەلى جۇمىستار جۇرگىزىلۋدە. ياعني حالىققا اقىل-كەڭەس بەرەتىن, سەرۆيستىك قىزمەت كورسەتەتىن, كروسس-ساتىلىم جۇرگىزەتىن بىرەگەي ورتالىققا اينالادى, – دەدى باقىتجان ماليكوۆا.
«قازپوشتا» اق-نىڭ ايتۋلى جاڭالىعىنىڭ ءبىرى – پوستامات. بۇل – اۆتوماتتاندىرىلعان
پوشتا ستانتسياسى. ارتىقشىلىعى 24/7 رەجيمىندە جۇمىس ىستەيدى. سالەمدەمە نەمەسە باندەرول الۋشىعا پوشتا بولىمشەسىنە بارىپ, كۋرەردى كۇتۋ قاجەت ەمەس. سەبەبى سالەمدەمە پوستامات ارقىلى ءتيىستى تۇلعاعا اۆتوماتتى تۇردە جەتكىزىلەدى. بۇل قىزمەت ءتۇرىن كوبىنەسە تاۋاردى ينتەرنەت ارقىلى ساتىپ الۋشىلار پايدالانادى. كومپانيا عالامتورسىز, كومپيۋتەرسىز, سمارتفونسىز اقشا اۋدارىمىن ۇسىنادى. ياعني «Salem, Mobile» تولەم قىزمەتىن قولدانعىسى كەلگەن ادامدا «قازپوشتاعا» جانە قارجى قىزمەتىنە قوسىلعان بانك كارتاسى بولۋى كەرەك. كليەنت تولەمدى كەز كەلگەن ۇلگىدەگى ۇيالى تەلەفونمەن ورىنداي الادى.
– ارينە, ءبىز ءۇشىن ەڭ ماڭىزدىسى – تۇتىنۋشىلارعا ساپالى قىزمەت كورسەتۋ. قازىر تۇرعىندار 1499 نومىرىنە حابارلاسىپ, جەدەل اقپارات الىپ, ۇسىنىسى مەن تالاپ-تىلەگىن جەتكىزۋگە مۇمكىندىگى بار – دەدى فيليال باسشىسى.
فيليالدىڭ ساتۋ ءبولىمىنىڭ باسشىسى ءلاززات قوناقباەۆا تاۋلىگىنە 24 ساعات بويى جۇمىس ىستەيتىن ارنايى بولىمگە اپاردى. ونداعى قىز-كەلىنشەكتەر تاڭعى 7.00-دە جينالىپ, گازەتتى كوشە-كوشە بويىنشا سۇرىپتاپ, ءتيىستى اۋماعىنا گازەتتى جەتكىزۋگە اسىعىپ جاتىر ەكەن. ەلدىڭ باستى گازەتتەرى – «ەگەمەن قازاقستان», «كازپراۆدا», «اقىن», «ليدەر», «تۇركىستان» بار. ونىڭ ىشىندە, ءوزىمىزدىڭ «استانا اقشامى» مەن «ۆەچەرنيايا استانا» باسىلىمى كوزىمىزگە وتتاي باسىلدى.
3 جىلدان بەرى گازەت پەن حاتتاردى سۇرىپتاۋعا ماماندانعان ەلۆيرا عازيزوۆانىڭ سوزىنشە, تۇنگى ۋاقىتتان تاڭ اتقانشا جۇمىس قىزا تۇسەدى. سۇرىپتاۋشىلار گازەتتى سۇرىپتايدى, سوسىن تاراتۋشىلار ءتيىستى مەكەنجايعا اسىعادى. ويتكەنى ءاربىر پوشتاشىنىڭ مىندەتى – باسپادان كەلگەن گازەت-جۋرنالدى ۋاقىتىلى وقىرمانعا جەتكىزۋ.
– گازەت پەن حاتتاردى سۇرىپتاپ, يەسىنە جەتكىزۋ – جاۋاپتى ءىس. ءتىپتى ادام اماناتىن ارقالايتىن, رۋحاني جاۋاپكەرشىلىگى اۋىر مىندەت دەۋگە كەلەدى. كۇن سايىن مىڭداعان گازەتتى ءبولىپ, ءۇي-ۇيگە جەتكىزۋ وڭاي شارۋا ەمەس. ءوزىڭىز جاقسى بىلەسىز, استانانىڭ اۋا رايى قۇبىلمالى: ءبىر كۇندەرى اڭىزاق جەل بولسا, بىردە قاتتى ىستىق بولادى, كەيدە ومبى قارعا مالتىعىپ ءجۇرىپ گازەت تاراتامىز. سولاي بولا تۇرا, «اماناتتى» ءتيىستى ادرەسكە جەتكىزىپ, ءوزىمىزدىڭ ورتاق چاتقا سۋرەتىن جىبەرىپ, ارىپتەستەرىم قىزمەتتى ادال اتقارىپ ءجۇر, – دەدى باس قالانىڭ وڭتۇستىك-شىعىس ايماعىنا گازەت-جۋرنال تاراتاتىن شولپان سىزدىقوۆا.
