ەسكەن جەلدەي, كوشكەن سەلدەي ۋاقىت شىركىن ءوتىپ جاتىر. مىنە, مامىردىڭ العاشقى ونكۇندىگى دە وتە شىقتى. ەندى بۇل كۇندەردىڭ تورتكۇل دۇنيەنىڭ دۇبىرگە تولى وقيعالارىنىڭ كوزدەن كەتسە دە كوڭىلدە قالعان تۇستارىنا نازار سالساق, سولتۇستىك كورەيا مەن سيرياداعى احۋال بۇرىنعىسىنشا الەمدى الاڭداتقانىن اڭعارۋ قيىن ەمەس.
قحدر اينالاسىنداعى جاعدايدىڭ اقش پەن وڭتۇستىك كورەيانىڭ كەڭ اۋقىمدى اسكەري وقۋ-جاتتىعۋلارى اياسىندا جانە سوعىس بولا قالعان جاعدايدا پحەنيان باسشىلىعىنىڭ كوزىن جويۋ جونىندەگى شەشىمنەن كەيىن ۋشىعىپ كەتكەنى ءمالىم. بۇعان سولتۇستىك كورەيانىڭ جاپونيا, وڭتۇستىك كورەيا جانە اقش اۋماعىنداعى قارسىلاستاردىڭ سوعىس بازالارىنا كەز كەلگەن ۋاقىتتا سوققى بەرۋگە دايىن ەكەندىگىن ەسكەرتە وتىرا, بالليستيكالىق زىمىراندارعا سىناق جاساۋمەن جاۋاپ بەرگەنى دە بەلگىلى. اقىرى مۇنىڭ سوڭى كورەي تۇبەگىنە «كارل ۆينسون» اتومدىق اۆياتاسىمالداعىش باستاعان الەۋەتتى قارۋلى كۇشتەردىڭ توبىنىڭ كەلۋىمەن, ولاردىڭ كحدر جاعالاۋىندا ءبىر ايداي ايالدايتىنىمەن اياقتالدى. ءوز كەزەگىندە اقش پرەزيدەنتى دونالد ترامپ مۇندا سوعىس وتىنىڭ تۇتانىپ كەتۋىن جوققا شىعارماي وتىرا, ماسەلەنى بەيبىت جولمەن شەشۋگە جانە بۇل تۇستا قىتايعا كوپ ءۇمىت ارتاتىنىن مالىمدەدى. سونىمەن قاتار, ترامپ اكىمشىلىگى سولتۇستىك كورەيالىق يادرولىق باعدارلاما بويىنشا دەباتتا ءوز ەركىمەن يادرولىق قارۋدان باس تارتقان ءارى ونى تاراتپاۋعا كۇش سالىپ جۇرگەن قازاقستاننىڭ ۇلگىسىن پايدالانۋ قاجەت دەگەن پىكىرىن ءبىلدىردى.
سيريا ماسەلەسى بويىنشا استانادا ءتورتىنشى رەت وتكەن سامميت ناتيجەسى دە كوڭىلگە ۇلكەن ءۇمىت ۇيالاتقانىن ايتقان ءجون. كەلىسسوزدەر ارقاسىندا سيريادا دەەسكالاتسيا ايماعىن قۇرۋ تۋرالى مەموراندۋم قابىلدانىپ, وعان رەسەي, يران, تۇركيا مەملەكەتتەرىنىڭ رەسمي وكىلدەرى قولدارىن قويدى. بۇل شەشىم بۇۇ باس حاتشىسى انتونيۋ گۋتەرريش پەن ۇلىبريتانيا پرەمەر-ءمينيسترى تەرەزا مەي تاراپىنان قولداۋ تاۋىپ ءارى جوعارى باعالانىپ, قازاقستان استانا پروتسەسى اياسىندا جوعارى دەڭگەيلى كەلىسسوزدەردىڭ كەلەسى كەزەڭىن وتكىزۋ مارتەبەسىنە يە بولدى. ەندى شىلدەنىڭ ورتاسىنا جوسپارلانىپ وتىرعان استاناداعى بەسىنشى كەزدەسۋ سيريا سوعىسىن ءبىرجولاتا توقتاتۋعا مۇمكىندىك تۋعىزادى دەگەن سەنىم دە جوق ەمەس.
ال دونالد ترامپ پالەستينا باسشىسى ماحمۋد ابباسپەن كەزدەسكەننەن كەيىن پالەستينا جانە يزرايل ءوزارا بىتىمگە كەلۋگە جول اشىلعانىن, ءسويتىپ تاياۋ شىعىستا «ۇلى» بەيبىت كەلىسىمگە قول جەتكىزۋگە كۇش سالاتىنىن جەتكىزدى. سونداي-اق, رەسەي پرەزيدەنتى پۋتين مەن گەرمانيا كانتسلەرى انگەلا مەركەلدىڭ كەزدەسۋىندەگى ۋكرايناعا قاتىستى كەلىسپەۋشىلىكتەر, فرانتسيانىڭ پرەزيدەنتى بولىپ ەممانۋەل ماكروننىڭ باسىم داۋىسپەن سايلانۋى, Facebook جەلىسىنىڭ نەگىزىن قالاۋشى, ميللياردەر مارك تسۋكەربەرگتىڭ وگايودا تۇراتىن قاراپايىم امەريكاندىق وتباسىنا كەزدەيسوق كەلىپ, كەشكى استى بىرگە ىشكەنى ءتارىزدى دۇنيەلەر دە الەم نازارىن اۋدارعان وقيعالار بولدى.
كەنجەبولات جولدىباي,
ساياساتتانۋشى
