ەلورداداعى «قالامگەرلەر» اللەياسىندا قالا اكىمدىگى مەن قازاقستان جازۋشىلار وداعىنىڭ استانا قالالىق فيليالى ۇيىتقى بولۋىمەن «استانا – شابىت ارقاۋى» اتتى رۋحاني-مادەني ءىس-شارا ءوتتى.
اقىن-جازۋشىلارمەن كەزدەسۋ تسيكلىنىڭ ماقساتى – باس قالانىڭ رۋحاني كەلبەتىن, الەم الدىنداعى بەدەلىن قالىپتاستىرۋدا ەڭبەك ءسىڭىرىپ جۇرگەن قالامگەرلەرگە رۋحاني قولداۋ كورسەتۋ, شىعارمالارىن وقىرمانعا كەڭىنەن ناسيحاتتاۋ.
كەزدەسۋدە العى ءسوز سويلەگەن استانا قالاسى اكىمىنىڭ ورىنباسارى ەسەت بايكەن:
– ەلوردادا قالامگەرلەردىڭ اعا بۋىنى قالىپتاسىپ, ۇلت رۋحانياتىنا ۇلەس قوسىپ كەلەدى. بۇگىندە استانادا قازاقستان جازۋشىلار وداعىنىڭ 160-تان استام مۇشەسى تۇرادى. جاس اقىن-جازۋشىلاردى رۋحاني قولداۋعا ءمان بەرىلۋدە. ونىڭ دالەلى ەكى جىل بۇرىن جاس قالامگەرلەردىڭ 30-دان استام كىتابى جارىققا شىقتى. مۇنداي يگى باستاما جالعاسىن تابا بەرەدى. بۇگىن وزدەرىڭىزگە ريزاشىلىعىمىزدى, سىي-قۇرمەتىمىزدى كورسەتەيىك دەپ جينادىق» دەدى.
استانا قالاسىنىڭ 25 جىلدىعى اياسىندا وتكەن رۋحاني جيىندا تولەن ابدىك, قويشىعارا سالعاراۇلى, عاريفوللا ەسىم, الىبەك اسقار, سەرىك تۇرعىنبەكۇلى, الدان سمايىل, التىنشاش جاعانوۆا, ءشاربانۋ بەيسەنوۆا, تۇرسىن جۇرتباي جانە تاعى باسقا قالامگەرلەرگە ەلوردا اكىمىنىڭ 500 مىڭ تەڭگەلىك سىياقى سەرتيفيكاتى تابىستالدى.
مادەني ءىس-شارادا اقىن- جازۋشىلار قولتاڭبا سەسسياسىن, كىتاپتار تۇساۋكەسەرىن وتكىزدى.
كورنەكتى جازۋشى تولەن ابدىك پەن تاريحشى-جازۋشى قويشىعارا سالعارا استانانىڭ ەل دامۋىنداعى ماڭىزىنا توقتالىپ, اقىن-جازۋشىلاردى قولداۋ ماڭىزدى مىندەتتىڭ ءبىرى ەكەنىن ايتىپ, اقجارما باتاسىن بەردى.
«اقىن-جازۋشىلار ەلدىكتىڭ ەڭسەسىن تىكتەۋگە ۇلەس قوسىپ, بيلىك پەن حالىق اراسىندا التىن كوپىر بولىپ ءجۇر. استانا قالاسى اكىمدىگىنىڭ قولداۋىمەن اقىن-جازۋشىلاردى قۇرمەتتەۋ ماقساتىندا 80 قالامگەرگە سىياقى بەرىلەدى» دەدى اقىن, جازۋشىلار وداعىنىڭ ەلورداداعى باسشىسى داۋلەتكەرەي كاپۇلى.
