ەلوردادا «ەكسپو-2017» حالىقارالىق مامانداندىرىلعان كورمەسى اياسىندا «تۋريزم جانە بولاشاق ەنەرگياسى: سو2 قالدىقتارىن ازايتۋ» اتتى دۇنيەجۇزىلىك كونفەرەنتسياسى ءوتتى. اۋقىمدى شارادا ءسوز سويلەگەن ماماندار استانانىڭ تۋريستىك الەۋەتىنە جاقسى باعا بەرىپ, بىرقاتارى ەلوردانىڭ 2020 جىلعا قاراي ەۋرازيا كەڭىستىگىندەگى ەڭ تارتىمدى قالالاردىڭ قاتارىنا ەنەتىنىنە سەنىم ءبىلدىردى.
كونفەرەنتسيا بۇۇ بۇكىلالەمدىك تۋريستىك ۇيىمىنىڭ حالىقارالىق تۋريزم جىلى اياسىندا وتكىزىلدى. وعان قر پرەمەر-ءمينيسترىنىڭ ءبىرىنشى ورىنباسارى اسقار مامين, «استانا ەكسپو-2017» ۇك» اق باسقارما توراعاسى احمەتجان ەسىموۆ, بۇكىلالەمدىك تۋريستىك ۇيىمنىڭ باس حاتشىسى تالەب ريفاي, قر مادەنيەت جانە سپورت ءمينيسترى ارىستانبەك مۇحامەديۇلى جانە استانا قالاسىنىڭ اكىمى اسەت يسەكەشەۆ قاتىستى.
باسقوسۋدىڭ قادىرمەندى قوناعى, بتۇ باس حاتشىسى تالەب ريفاي تۋريزم مەن بولاشاق ەنەرگياسى اراسىندا قانداي بايلانىس بار دەگەن سۇراققا بىلاي دەپ جاۋاپ بەردى:
– قورشاعان ورتانىڭ لاستانۋىنا تۋريزم 5 پايىز زيان كەلتىرەدى. بۇل – ۇلكەن كورسەتكىش. ونىڭ 3-4 پايىزى كولىك تاسىمالداۋمەن بايلانىستى بولسا, قالعانى قىزمەت كورسەتۋ سالاسىنىڭ اسەرىنەن بولىپ وتىر. ءبىزدىڭ مىندەت – كومىرتەك قالدىقتارىن ازايتۋدى ويلاستىرۋ, سەبەبى تۋريزم كليماتتىق وزگەرىستەرگە بەيىمدەلىپ وتىرۋى كەرەك. ماسەلەن, تۋريستەردىڭ سۇيىكتى دەمالاتىن ورنىنا اينالعان مالديۆ ارالدارى مەن ۆەنەتسيا سىندى قالالار كەلەشەكتە سۋ استىندا قالۋى عاجاپ ەمەس. بۇكىل الەم بولىپ وسىنداي ماڭىزدى ماسەلەلەردى ورتاعا سالىپ, ماماندارمەن شەشىمىن تابۋعا تىرىسىپ جاتىرمىز.
– ال قازاقستانعا كەلەتىن بولساق, ەلوردا – الەمدەگى ەڭ جاس استانا, بولاشاعى زور. ەلدىڭ تابيعاتى مەن تاريحى, مادەنيەتى مەن ءداستۇرى, ەلوردانىڭ تاڭداي قاقتىرارلىق ارحيتەكتۋراسى تۋريستىك مۇمكىندىكتەرگە جول اشادى. سول تۋريزم ەل ەكونوميكاسىن تۇزەپ, قازاقستاننىڭ ساياسي ساحنادا ءوز ورنىن ايقىنداپ الۋىنا كومەكتەسۋى ءتيىس. شەتەلدىكتەر قازاقستان جايلى كوپ مالىمەتتەردى بىلە بەرمەيدى.
سوندىقتان ەلدى برەندكە اينالدىرىپ, ونى بۇكىل الەمگە پاش ەتۋ سىزدەرگە جۇكتەلەدى, – دەپ تالەب ريفاي قازاقستان ءتۋريزمىنىڭ دامۋى جونىندە باعىت-باعدار بەردى.
ەكى كۇن قاتارىنان كونفەرەنتسيا اياسىندا قاتىسۋشىلار كومىرتەك قالدىقتارىن ازايتۋ, تۋريزم سالاسىنىڭ دامۋىنا ۇلەس قوسۋ جانە باسەكەگە قابىلەتتىلىگىن ارتتىرۋ سياقتى ماسەلەلەردى, سونداي-اق, بۇۇ-نىڭ كۇن تارتىبىندە قاراستىرىلعان 2030 جىلعا ارنالعان ءتۋريزمدى دامىتۋدىڭ باستى ماسەلەلەرىن تالقىلادى.
قالا باسشىسى اسەت يسەكەشەۆ ەلوردادا Forward كومپانياسىمەن بىرىگىپ ءتۋريزمدى دامىتۋ بويىنشا مەديا-جوسپار ازىرلەنگەنى تۋرالى جەتكىزدى. قۇجاتتا ءتۋريزمدى دامىتۋدىڭ 3 نەگىزگى باعىتى ايقىندالعان: MICE (Meetings, Incentives, Conferences, Exhibitions) – ىسكەرلىك تۋريزم, قالانىڭ رەكرەاتسيالىق ينفراقۇرىلىمى جانە مەديتسينالىق تۋريزم.
– ءبىزدىڭ الدىمىزدا 2020 جىلعا قاراي استانانى ەۋرازيا كەڭىستىگىندەگى تۋريستەر ءۇشىن ەڭ تارتىمدى قالا جاساۋ مىندەتى تۇر. استانا – ءتۇرلى فورۋمدار مەن سامميتتەر, ىسكەرلىك كەزدەسۋلەر مەن مادەني-سپورتتىق شارالاردى وتكىزەتىن باستى ورتالىقتىڭ بىرىنە اينالۋى ءتيىس. ول ءۇشىن قالادا بارلىق ينفراقۇرىلىم جاسالعان: اۋەجاي, تەمىرجول ۆوكزالى, قوناقۇيلەر مەن باسقا نىساندار قوناقتاردى قارسى الۋعا ساقاداي-ساي. شەتەلدىك تۋريستەر سانىن جىلىنا 1 ميلليونعا دەيىن, ال قازاقستاندىق قوناقتاردىڭ ۇلەسىن 2 ميلليونعا دەيىن جەتكىزۋدى جوسپارلاپ وتىرمىز.
ەلوردادا 10 سپورتتىق, 20 زاماناۋي مەديتسينالىق مەكەمەلەر جانە بىرقاتار بىرەگەي ساۋلەت كەشەندەرى سالىنعان. بۇل عيماراتتاردىڭ جوباسىن ازىرلەۋگە نورمان فوستەر, مانفرەدي نيكولەتتي سىندى الەمدىك ساۋلەتشىلەر تارتىلعان. ەلىمىزدىڭ تۋريستەرگە بارىنشا تارتىمدى بولۋى ءۇشىن سپورت كەشەندەرى مەن رۋحاني وردالاردىڭ كاسىبي باسقارۋ ۇلگىسىن ەنگىزۋدى قولعا الدىق. بۇل نىسانداردى جىلىنا ميلليونداعان تۋريستەر باراتىن مەكەنگە اينالدىراتىنىنا سەنەمىز, – دەدى اسەت يسەكەشەۆ.
گۇلدانا تالعاتقىزى
