فۋتبولدان قازاقستان بىرىنشىلىگى مارەسىنە جەتتى. «استانا» ءتورتىنشى رەت قاتارىنان ەل چەمپيونى اتاعىن جەڭىپ الدى. پرەمەر-ليگانىڭ جەڭىمپازى بيىل دا سوڭعى تۋردا شەشىلدى.
سوڭعى ويىنعا دەيىن كوش باسىنداعى «استانا» مەن «قايرات» كوماندالارى اراسىن ءبىر-اق ۇپاي ءبولىپ تۇردى. ەكەۋىنە دە جەڭىلۋگە, تىپتەن تەڭ تۇسۋگە دە بولمايدى. سۇرىنگەنى كۇمىستى قاناعات تۇتادى. ال ەكەۋى دە جەڭسە, «استانا» جەڭىس تۇعىرىنىڭ ەڭ بيىك ساتىسىنا كوتەرىلەتىنى بەلگىلى ەدى. سونىمەن, ەلوردادا – «استانا» مەن «اقجايىق», الماتىدا «قايرات» پەن «اقتوبە» اراسىنداعى تاعدىرشەشتى ويىندار باستالىپ كەتتى.
«ەكى مايداندا», ياعني ەۋروپا ليگاسى مەن قازاقستان چەمپيوناتىندا قاتار جۇرگەن «استانا» سوڭعى ويىنعا بار كۇشىن سالدى. مىقتى ويىنشىلاردىڭ ءبارى الاڭعا شىقتى. ويتكەنى ەلوردالىقتار ءۇشىن ۇلتتىق بىرىنشىلىكتى ۇتۋ دا ماۋسىم الدىنداعى ماقسات بولعان.
«اقجايىق» ءبىرىنشى تايمدا ءتاپ-ءتاۋىر قارسىلىق كورسەتتى. «استانا» قانشا شابۋىلداعانىمەن, قارسىلاستىڭ قاقپاسىن دوپ دارىتا المادى. ءسويتىپ, ءبىرىنشى تايم 0:0 ەسەبىمەن اياقتالدى.
ەكىنشى تايم باستالىسىمەن الاڭ يەلەرى ەكپىندى كۇشەيتتى. ناتيجەسىندە ويىننىڭ 50-مينۋتىندا دجۋنيور كابانانگا ەسەپ اشتى. كونگولىق سۇرمەرگەن ويىننىڭ سوڭىندا تاعى ءبىر رەت «اقجايىق» قاقپاسىنان ساڭىلاۋ تاپتى. وسىلايشا, «استانا» 2:0 ەسەبىمەن جەڭىسكە جەتىپ, ءتورتىنشى مارتە قاتارىنان قازاقستان چەمپيونى اتاعىن جەڭىپ الدى.
ماتچ اياقتالىسىمەن قازاقستاننىڭ كاسىپقوي فۋتبول ليگاسىنىڭ پرەزيدەنتى ازامات ايتحوجين «استانا» كاپيتانى نەناد ەريچكە چەمپيوندىق توندونى تابىس ەتتى. ال التىن مەدالدار كەيىنىرەك سالتاناتتى جاعدايدا تاپسىرىلاتىن بولادى.
«اقتوبە» كومانداسىن 3:2 ەسەبىمەن ۇتقان «قايرات» بيىل دا كۇمىس جۇلدەنى قاناعات تۇتتى. قولا جۇلدە شىمكەنتتىڭ «ورداباسى» كومانداسىنا بۇيىردى.
پرەمەر-ليگادان «تاراز» جانە «وقجەتپەس» كوماندالارى شىعىپ قالدى. ال ءبىرىنشى ليگادا ءبىرىنشى جانە ەكىنشى ورىن العان تالدىقورعاندىق «جەتىسۋ» مەن پەتروپاۆلدىق «قىزىلجار» الداعى جىلى پرەمەر-ليگادا ونەر كورسەتەدى. «اقجايىق» پەن ءبىرىنشى ليگادا ءۇشىنشى ورىن العان «ماقتاارال» پرەمەر-ليگادا ويناۋعا قۇقىق بەرەتىن ويىندا كەزدەسەتىن بولادى. بۇل ماتچ 9 قاراشا كۇنى «استانا ارەنا» ستاديونىندا وتەدى.
قارسىلاستار قاقپاسىنا 20 گول سوققان «قايرات» شابۋىلشىسى جەرار گوۋ چەمپيوناتتىڭ سۇرمەرگەنى, ال «استانا» شابۋىلشىسى دجۋنيور كابانانگا 22 گولدىڭ اۆتورى اتاندى.
جاقىن ارادا چەمپيوناتتىڭ ۇزدىك ويىنشىلارى, باپكەرلەرى جانە مەنەدجەرلەرى انىقتالاتىن بولادى.
عالىم قوجابەكوۆ
