ۇلتتىق بىرىڭعاي تەست تاپسىرۋ كەزىندە تۇلەكتەر قاپەرگە الۋعا ءتيىستى بىرقاتار ەرەجەلەر بار. وسى رەتتە ۇبت وتكىزۋ تارتىپتەرى تۋرالى پاراقشالار قالاداعى بارلىق مەكتەپ تۇلەكتەرىنە تاراتىلدى. سونىمەن بىرگە اتا-انالارىنا دا ۇبت تاپسىرۋدى ۇيىمداستىرۋ تۇبىرتەكتەرى ۇلەستىرىلدى. بۇل تۋرالى ءبىلىم باسقارماسى استانا قالاسى اكىمى اپپاراتىنىڭ ءباسپاسوز قىزمەتى ارقىلى مالىمدەدى.
ۇبت كەزىندە تۇلەكتەرگە قارا جانە كوك ءتۇستى قالام, قارىنداش جانە وشىرگىش قولدانۋعا رۇقسات ەتىلەدى. ال قويۋ گەلدى قالام پايدالانۋعا, ەمتيحان ماتەريالىن رۇقساتسىز اشۋعا جانە ايىرباستاۋعا, ورىن اۋىستىرۋعا, وقۋلىق, اۋديتورياعا شپارگالكا كىرگىزۋگە جانە پايدالانۋعا, كوشىرۋگە, ەلەكتروندى قۇرىلعىلاردى(كالكۋلياتور, ۇيالى تەلەفون), تۇزەتۋ سۇيىقتىقتارىن پايدالانۋعا تىيىم سالىنادى.
ەرەجە بۇزىلعان جاعدايدا تىيىم سالىنعان زاتتاردى تابۋ اكتىسى جاسالىپ, تۇلەك اۋديتوريادان شىعارىلادى. ەستەرىڭىزگە سالا كەتەيىك, ۇبت جالپى ورتا ءبىلىم بەرۋدەگى وقىتۋ پاندەرى نەگىزىندە ۇلتتىق تەستىلەۋ ورتالىعى جاساعان تەست تاپسىرمالارىنان تۇرادى. ءار ءپان بويىنشا 25 تەست تاپسىرماسى بار. ۇبت تاپسىرۋعا ءار تۇلەككە 3,5 ساعات ۋاقىت بەرىلەدى. ۇبت-نى قايتا تاپسىرۋعا جول بەرىلمەيدى. ال ناتيجەلەرى 125 بالدىق ەسەپپەن جانە جالپى ورتا ءبىلىم بەرۋ اتتەستاتىن الۋ ءۇشىن بەس بالدىق جۇيەدە باعالانادى.
ەگەر ۇبت ناتيجەسى تەستىلەۋ قاتىسۋشىلارىن قاناعاتتاندىرماسا, ولار اپپەلياتسياعا بەرە الادى. اپپەلياتسياعا بەرۋ ءتارتىبى مەن ۋاقىتى اتا-انالار مەن تۇلەكتەرگە تاراتىلعان پاراقشالاردا كورسەتىلگەن.
وتكەن جىلدارداعى تاجىريبە بويىنشا اتا-انالار مەن قاتىسۋشىلاردى كۇنى بۇرىن ۇبت وتكىزۋ تارتىپتەرىمەن تانىستىرۋ داۋلى سۇراقتاردىڭ الدىن الادى جانە مەيلىنشە سەنىمدى كىرىسۋگە ءارى دايىندالۋعا مۇمكىندىك بەرەدى.
