جيىرما جىل – ادامزات تاريحى ءۇشىن ءبىر ءسات, ال بىزدەر, استانا تۇرعىندارى, ءۇشىن بۇل مەرزىم تاريحتىڭ ءبىر بەت پاراعى ىسپەتتەس.
ءبىزدىڭ ۇرپاققا بۇيىرعان تاريحتىڭ ۇمىتىلماس نەسىبەسى – بۇل بابالارىمىز ارمانداپ وتكەن ەل تاۋەلسىزدىگى مەن ونىڭ باس شاھارى – استانانىڭ عاجاپ قۇرىلىسى جانە ونىڭ الەمدەگى اسەم قالاعا اينالۋى. بۇگىندە ءبىز بارشامىز كەۋدەمىزدى كەرىپ تۇرىپ ماقتانا الامىز: ءبىز اسەم استانانىڭ تۇرعىندارىمىز دەپ. كەيبىرەۋلەر ءۇشىن ەرتەگى بولىپ كورىنەتىن كورىنىس قالاي باستالىپ ەدى جانە سول كەزدە ۇلى كوشتىڭ باسىندا كىمدەر تۇردى دەگەن ساۋال قويىلۋى مۇمكىن. مەن سونىڭ كۋاسى بولعاندىقتان كورگەن-بىلگەندەرىمدى وقىرماندارمەن بولىسەيىن.
ەل استاناسىن الماتىدان ەسىل وڭىرىنە كوشىرۋ كەزىندە مەن قالاداعى №8 اقمولا پەدۋچيليششەسىنىڭ ديرەكتورى بولاتىنمىن. اقوردانى الماتىدان اقمولاعا كوشىرۋ كەزىندە ءبىزدىڭ پەدۋچيليششە ۇجىمى ەرەكشە كوزگە ءتۇستى. ياعني ءبىز الماتىدان كوشىپ كەلىپ جاتقان مەملەكەت قىزمەتكەرلەرىنىڭ ءبارىن ۆوكزالدان, اۋەجايدان قارسى الۋ بىزگە وڭايعا تۇسكەن جوق. ءبىر جاعىنان ۋچيليششە تۇلەكتەرىنىڭ ساباقتاردان قالماۋىن ەسكەرسەك, ەكىنشى جاعىنان ارقاعا كەلىپ جاتقان قىزمەتكەرلەردىڭ كوڭىل كۇيىنە قاياۋ تۇسىرمەۋ جاعىن دا ويلاستىرۋ كەرەك بولدى. سول كەزدە بىزگە قول ۇشىن بەرىپ, جۇمىسىمىزدى جەڭىلدەتۋگە جاردەم كورسەتكەن, بۇگىندە ەسىمدەرى بۇكىل ەلگە تانىمال ازاماتتار – ادىلبەك جاقسىبەكوۆ, سانسىزباي ەسىلوۆ, سۆەتلانا جالماعامبەتوۆالاردىڭ جۇمىستارىن ەرەكشە اتاعىم كەلەدى.
ەكىنشى ماڭىزدى ماسەلە – كەلگەن ادامداردى ورنالاستىرۋ. بۇل ماسەلەنىڭ شەشىلۋىنە ءبىز دە ءبىر كىسىدەي اتسالىستىق. 360 ورىندىق ۇلكەن جاتاقحانانى تۇگەلدەي, ەكىنشى جاتاقحانانىڭ ەكى قاباتىن ءبىلىم مينيسترلىگىنىڭ قىزمەتكەرلەرى جاتاتىن ءۇي رەتىندە بوساتىپ بەردىك. وسىنداي جاۋاپتى جۇمىس اتقارعانىمدى ماقتان ەتەم. ويتكەنى كوشىپ كەلىپ جاتقان ادامدار بوتەندەر ەمەس, ءوزىمىزدىڭ قانداستارىمىز, ەل تاۋەلسىزدىگى مەن ونىڭ استاناسىن كوركەيتىپ, نىعايتۋ ءۇشىن كەلگەن ازاماتتار بولاتىن. ولارعا وسىنداي قىزمەت كورسەتۋدى وزىمە پارىز سانايمىن.
ەلوردانىڭ ءوسىپ-وركەندەۋى ءبىزدىڭ ۋچيليششەنىڭ دامۋىنا دا ىقپال ەتتى. بۇرىنعى پەدۋچيليششەنىڭ دارەجەسى وزگەرىپ, ول ەندى رەسپۋبليكا مەكتەپتەرى مەن ليتسەيلەرىنىڭ باستاۋىش سىنىپتارىنا پەداگوگ ماماندار دايارلاۋداعى بىردە-ءبىر وزىق ءبىلىم بەرۋ وشاعى – گۋمانيتارلىق كوللەدجگە اينالدى.
ەلوردانى الماتىدان ەسىل وڭىرىنە كوشىرۋ كەزىندە پەداگوگيكالىق ۇجىم بۇل شاراعا بەلسەنە قاتىستى.وزىق ۇلگىمەن سالىنعان ۋچيليششە جاتاقحانالارى الماتىدان تسەلينوگرادقا كوشىپ كەلگەن مەملەكەتتىك قىزمەتكەرلەردىڭ باسپاناسى بولعانىن قازىردە ەكىنىڭ ءبىرى بىلە بەرمەيدى.
سول كەزدە قر ۇكىمەتىنىڭ قاۋلىسىمەن جاڭا استاناعا كوشىپ كەلىپ جاتقان مەملەكەتتىك قىزمەتكەرلەر ءۇشىن نە كەڭسە, نە لايىقتى باسپانا جوقتىڭ قاسى ەدى. سوندىقتان قازاقشا ايتقاندا, قيىننان قيىستىرۋدان باسقا امال بولمادى. جانە بۇل تاريحي كوشتىڭ ءبىر ەرەكشەلىگى – ول بۇرىنعى اتام زامانعى قازاقي كوشتەن وزگەشەلىگى – ول قازاق ەلىنىڭ بولاشاعى مەن قازاق حالقىنىڭ ەرتەڭگى كۇنىنە الاڭداماي, بولاشاق ۇرپاقتىڭ اتا-بابالاردىڭ سان عاسىرلار بويى ەل ەگەمەندىگىن اڭساپ,ارمانداعان وسيەتىن جۇزەگە اسىرۋدىڭ قامى بولاتىن. مەن ءوزىم سونداي ۇلى وقيعانىڭ ءارى كۋاسى, ءارى سوعان قاتىستى بولعانىمدى ماقتان تۇتام. ءبىلىم جانە عىلىم مينيسترلىگى دە كوپ جىلعى ۇستازدىق ەڭبەگىمدى باعالاپ, مەنىڭ اتىما ارناپ كوللەدج عيماراتىندا اۋديتوريا اشتى. وندا ءار كەزدە تاعىلىمى مەن تاربيەلىك ماڭىزى بار ساباقتار مەن كەزدەسۋلەر وتكىزىلەدى.
ءيا, بۇگىنگى استانانى تىڭ يگەرۋگە دەيىنگى اڭىزاق دالاداعى اقمولامەن, سول ناۋقان كەزىندە قۇرىلىستارى قالاي بولسا سولاي تالعامسىز سالىنعان تسەلينوگرادپەن ءتىپتى دە سالىستىرۋعا كەلمەيدى. استانا وسى زامانعى ساۋلەتى مەن داۋلەتى قاتار دامىعان اسەم قالاعا اينالدى. ءبىز ەندى استانانى ماڭگىلىك ەل ورداسى دەپ ماقتانىشپەن بۇكىل الەمگە جار سالا الامىز!
وتىزباي سۇيىندىكوۆ,
رەسپۋبليكاعا ەڭبەگى سىڭگەن ۇستاز
