كەشە لوندوندا قازاقستاننىڭ باس شاھارىنداعى كولىك جەلىسىن جاڭعىرتۋ ماقساتىندا ەلوردا اكىمدىگى مەن وعان قاراستى «استانا LRT» جشس جانە ەقدب اراسىنداعى ۇشجاقتى كەلىسىمشارتقا قول قويىلدى.
وسى كەلىسىمشارتقا سايكەس ەۋروپالىق قايتا قۇرۋ جانە دامۋ بانكى بولگەن قارجى ەسەبىنەن 2016-2017 جىلدار ارالىعىندا استاناعا سوڭعى ۇلگىدەگى 200 اۆتوبۋس اكەلىنبەك. جاڭعىرتۋ تالاپتارى بويىنشا ساتىلىپ الىناتىن كولىكتىڭ بۇل ءتۇرى اقپاراتتاندىرۋدىڭ, جولاۋشىلاردى ساناۋدىڭ, بەينەباقىلاۋدىڭ, سالوندى سالقىنداتۋ مەن جىلىتۋدىڭ زاماناۋي جۇيەسىمەن جابدىقتالۋعا ءتيىس. قارجىلاندىرۋ شارتتارىندا قاراستىرىلعان ايرىقشا نازار اۋدارارلىق تاعى ءبىر ماسەلە – جاڭا اۆتوبۋستار مۇمكىندىگى شەكتەۋلى ادامداردىڭ ءمىنىپ-تۇسۋىنە قولايلى بولۋى قاجەت.
مۇنداي ۋاعدالاستىققا قول جەتكىزۋ استانانىڭ ينۆەستيتسيالىق تارتىمدىلىعى ارتقانىن اڭعارتادى. ەقدب ساراپشىلارىنىڭ پىكىرىنشە, استانا اكىمدىگى قالانىڭ كولىكتىك كەشەنىن دامىتۋ مەن جاڭعىرتۋ ىسىندە دۇرىس باعىت ۇستانىپ وتىر.
بۇل كەلىسىمشارت استانا اكىمدىگى مەن ەۋروپالىق قايتا قۇرۋ جانە دامۋ بانكى اراسىنداعى ىنتىماقتاستىققا سونى سەرپىن بەرەدى. بانك ينۆەستيتسياسى ەلوردا تۇرعىندارى مەن قوناقتارىنىڭ ومىرىنە وڭ اسەرىن تيگىزەتىن يننوۆاتسيالىق جاڭالىقتار ەنگىزۋگە جول اشادى, – دەدى سالتاناتتى راسىمدە ءسوز سويلەگەن استانا اكىمى ادىلبەك جاقسىبەكوۆ.
بۇعان دەيىن اۆتوبۋستار جەتىسپەۋشىلىگى پروبلەماسىن شەشۋ ماقساتىندا استانا قالالىق جولاۋشىلار كولىگى جانە اۆتوموبيل جولدارى باسقارماسى مەن «استانا LRT» جشس بىرلەسىپ, جىلجىمالى قۇرامدى جاڭارتۋدى كوزدەيتىن ءۇش كەزەڭدىك «City bus» باعدارلاماسىن بەلگىلەگەن بولاتىن. سول جوبانىڭ العاشقى ساتىسىن جۇزەگە اسىرۋ اياسىندا الەمدىك ستاندارتتارعا تولىقتاي ساي كەلەتىن IVECO CITELIS ماركالى 358 اۆتوبۋس الۋ جونىندە كەلىسىمشارت جاسالىندى.
