جاقىندا «جاستار» سارايىندا حالىقتى جۇمىسپەن قامتۋ ورتالىعى كەزەكتى بوس ورىندار جارمەڭكەسىن ۇيىمداستىردى. ءبىلىم بەرۋ مەكەمەلەرى, دەنساۋلىق ساقتاۋ ۇيىمدارى, قۇرىلىس فيرمالارى, قوناق ءۇي, اۆتوپارك, ىشكى ىستەر ورگانى سەكىلدى 60-قا جۋىق جۇمىس بەرۋشى 1000-نان استام بوس جۇمىس ورنىن ۇسىندى.
وسىدان بۇرىن التى رەت وتكىزىلگەن جارمەڭكە قورىتىندىسى بويىنشا, 500-گە جۋىق ادام جۇمىسپەن قامتىلدى. ال جىل سوڭىنا دەيىن تاعى ەكى بوس ورىندار جارمەڭكەسىن وتكىزۋ جوسپارلاندى. سونداي-اق, بۇگىندە «سZ Astana» ءموبيلدى قوسىمشاسىنىڭ جاڭارتىلعان نۇسقاسى ىسكە قوسىلدى. ەندى جۇمىس بەرۋشىلەر بوس ورىندار تۋرالى مالىمەتتى, ال جۇمىس ىزدەگەندەر – ءوز تۇيىندەمەسىن قالدىرا الادى.
جارمەڭكەگە جۇمىس ىزدەپ بيىل عانا ەۇۋ-ءدىڭ جىلۋ ەنەرگەتيكاسى ماماندىعى بويىنشا ءبىلىم العان گۇلناز سارسەحان كەلدى. «ءساتتى قادام» جوباسى اياسىندا «سامۇرىق-قازىنا» سياقتى بەلدى كومپانيالارعا تۇيىندەمەمدى قالدىرىپ كەتتىم. باسىندا تاجىريبەدەن ءوتىپ, كەيىن ءوزىمدى جاقسى مامان رەتىندە كورسەتە بىلسەم, جۇمىسقا الاتىندارىن جاسىرمادى» دەيدى ول. «ستۋدەنت كەزىندە تاجىريبە جيناقتاۋعا تىرىسپادىڭىز با؟» دەپ سۇراپ كورىپ ەدىك, گۇلناز تەك داياشى بولىپ جۇمىس ىستەگەنىن ايتتى.
– ماماندىعىم وزىمە ۇنايدى, بۇگىندە ينجەنەرلەر سۇرانىسقا يە. جۇمىس تابۋعا ابدەن بولادى. ماگيستراتۋراعا دا تاپسىرىپ قويدىم, ەگەر باعىم جانىپ, وقۋعا تۇسكەن جاعدايدا جۇمىس پەن وقۋدى قاتار الىپ جۇرەمىن. نەگىزى, استانادا ۋنيۆەرسيتەتتى ەندى تامامداعان قىزمەتكەرگە 100 مىڭ تەڭگە جالاقى تاماقتانۋعا, قىدىرۋعا جانە جالداپ تۇرعان پاتەرگە تولەپ تۇرۋ ءۇشىن جەتكىلىكتى, – دەيدى استانالىق ارۋ.
ءوزىن ادىلەت حامزين دەپ تانىستىرعان 24 جاستاعى جىگىت «نۇربانكتىڭ» وكىلى رەتىندە جارمەڭكەگە قاتىستى. ءبىر قىزىعى, ادىلەتتىڭ ءوزى جۇمىستى ءدال وسى جارمەڭكەلەردىڭ بىرىندە تاپقان.
– شەتەلدە ءبىلىم الىپ كەلىپ, ماماندىق بويىنشا جۇمىس تابا المادىم. كوپتەگەن ۇيىمدارعا تۇيىندەمەمدى قالدىردىم, بارلىق جەردە ءبىر تالاپ – تاجىريبەنىڭ بولۋى. ال جاڭا عانا ءبىتىرىپ كەلگەن تۇلەكتە قانداي تاجىريبە بولسىن؟ جۇمىسقا تۇرعاننان كەيىن, ىنتاڭ بولسا, شارۋانى يگەرىپ كەتەسىڭ. كەز كەلگەن ىستە جاقسى جەتىستىكتەرگە جەتۋگە بولادى, ءبارى ادامنىڭ وزىنە بايلانىستى. ماسەلەن, مەن بانككە باستاپقىدا تاۋارلاردى نەسيەلەۋ اگەنتى بولىپ كىردىم, ءۇش ايدان كەيىن نەسيەلەۋ مامانى اتاندىم. ال ەكى ايدان كەيىن قارجىلىق نەسيە بولىمىنە اۋىستىم.
قازىرگى تاڭدا, بانكتىڭ باس كەڭسەسىندە جۇمىس ىستەيمىن. مىنە, قىزمەتتە جۇرگەنىمە جارتى جىل بولدى. تۇركيا, كەيىن مالايزيادا حالىقارالىق ىستەردى باقىلاۋ ماماندىعى بويىنشا ءبىلىم الدىم. ال قازىر قارجىگەرمىن. وقۋىم ءبىر بولەك, جۇمىسىم ءبىر بولەك. بىراق قانداي جاعداي بولماسىن, ادام قول قۋسىرىپ وتىرماي, العا جىلجۋ كەرەك. سوندا عانا سەنىڭ ەڭبەگىڭ ەلەنەدى, – دەپ ادىلەت باسىنان وتكەن وقيعامەن ءبولىستى. 65 مىڭ تەڭگەدەن باستاعان ول بۇگىندە 170 مىڭعا جۋىق جالاقى الىپ وتىر.
ال ەرلان سايدالين «دانىشپان» بالاباقشاسىنان جارمەڭكەگە قاتىسىپ وتىر. «ءبىر ساعاتتىڭ ىشىندە 20-عا جۋىق تۇيىندەمە كەلىپ ءتۇستى. كوبىسى – ەلورداعا جاڭادان قونىس اۋدارعاندار. جۇمىس تاجىريبەسى مەن ءبىلىمى سايكەس كەلسە, بالاباقشا مەڭگەرۋشىسى سۇحباتتاسۋعا شاقىرادى. تاربيەشىنىڭ جالاقىسى 110 مىڭ, ال بالا كۇتۋشىگە 75 مىڭعا جۋىق جالاقى تولەيمىز. بۇگىندە بالاباقشادا ءتورت بوس ورىندى ۇسىنا الامىز» دەپ بالاباقشا وكىلى مامانعا اسا ءزارۋ ەكەندىكتەرىن جەتكىزدى.
حالىقتى جۇمىسپەن قامتۋ ورتالىعىنىڭ مالىمەتىنە سايكەس, جىل باسىنان بەرى جۇمىس ىزدەپ مەكەمەگە 9242 ادام جۇگىنگەن. ولاردىڭ 3547-ءسى جۇمىسقا ورنالاسقان, ونىڭ ىشىندە 457 ادام جاستار پراكتيكاسىنا, ال 174 ادام الەۋمەتتىك جۇمىس ورىندارىنا جولداما العان. بۇدان بولەك, 1232 جۇمىس ىزدەۋشى ۋاقىتشا جۇمىسپەن قامتىلىپ, 313-ءى سۇرانىسقا يە ماماندىقتار بويىنشا قىسقامەرزىمدى كاسىپتىك وقۋ وقىپ جاتىر. جالپى, بۇگىندە ورتالىقتا 1125 جۇمىس بەرۋشىدەن 8 مىڭنان استام بوس جۇمىس ورنى بار.
گۇلدانا تالعاتقىزى
