قر تاۋەلسىزدىگىنىڭ 25 جىلدىعىنا ارنالعان «قۋاتتى ءوڭىر – قۋاتتى قازاقستان» باعدارلاماسىنىڭ اياسىندا قازاننىڭ 29-30 جۇلدىزدارىندا استانادا اقمولا وبلىسىنىڭ كۇندەرى وتەدى. وسى اپتانىڭ اياعىندا ەلوردا تۇرعىندارى مەن قوناقتارى استانامەن ىرگەلەس ايماقتىڭ ەرەكشەلىكتەرىمەن تانىسىپ, اۋىل شارۋاشىلىعى ونىمدەرىن ساتىپ الا الادى. سونداي-اق, وبلىستان كەلەتىن مادەني وشاقتاردىڭ قويىلىمدارى مەن كورمەلەرىن تاماشالايدى.
الداعى سەنبى-جەكسەنبى كۇندەرى «حان شاتىر» ساۋدا-ويىن-ساۋىق ورتالىعىنىڭ الاڭىندا اقمولا وبلىسىنىڭ 19 اۋدانىنىڭ اۋىل شارۋاشىلىعى تاۋار وندىرۋشىلەرى مەن كاسىپورىندارىنىڭ جانە «ەسىل اكك» ۇك اق-نىڭ قاتىسۋىمەن جارمەڭكە وتەدى. ەلورداعا 60-تان استام ءونىم اتاۋلارى جەتكىزىلەدى. سونىڭ ىشىندە كورشى ەلدەرگە ەكسپورتقا جىبەرىلەتىن 605,2 توننا ەت جانە شۇجىق ونىمدەرى, 46,2 توننا ءسۇت ونىمدەرى, 218 توننا كوكونىس, 19,0 توننا بالىق پەن بالىق ونىمدەرى, 403,2 مىڭ دانا جۇمىرتقا, 200,0 توننا كارتوپ, 45 مىڭ ليتر وسىمدىك مايى جانە تاعى باسقا دا تاۋارلار بار.
جارمەڭكەدە باۋىرساق, ايران, قىمىز تەگىن تاراتىلىپ, اسىق اتۋ, اۋىر تاسۋ, ارمرەسلينگ, توعىزقۇمالاق, ارقان تارتۋ, «قوي شەشۋ» جانە باسقا ويىندار ۇيىمداستىرىلىپ, اڭشى قۇستار, تازى مەن توبەت تۇقىمدارىنىڭ كورمەسى وتەدى.
ساعات 16.00-دەن باستاپ جاستار اراسىندا تانىمال ۇزدىك جايدارمان توپتارى مادەني باعدارلاما ۇسىنادى.
29 قازاندا ساعات 19-00-دە ق. قۋانىشباەۆ اتىنداعى مەملەكەتتىك ااكادەميالىق قازاق مۋزىكالىق دراما تەاترىندا م. شاحانوۆتىڭ «شىڭعىسحان» قويىلىمى قويىلادى.
بەيبىتشىلىك جانە كەلىسىم سارايىندا اقىن, دراماتۋرگ, جازۋشى قۇدايبەرلى مىرزابەكتىڭ شىعارماشىلىق كەشى مەن قر تاۋەلسىزدىگىنىڭ 25-جىلدىعىنا ارنالعان اقمولا وبلىسىنىڭ الەۋمەتتىك-ەكونوميكالىق سالاداعى جەتىستىكتەر كورمەسى وتەدى. 30 قازاندا وبلىس اكىمى س. كۋلاگين ايماق دامۋىنا ۇلەس قوسقان ەڭبەك ارداگەرلەرىمەن كەزدەسەدى.
30 قازاندا ساعات 16.00-دە بەيبىتشىلىك جانە كەلىسىم سارايىنىڭ وپەرا زالىندا اقمولا وبلىستىق فيلارمونياسىنىڭ «جەر جۇماعى – كوكشەتاۋ, ەل تۇمارى – استانا» اتتى كونتسەرتتىك باعدارلاماسى مەن ساعات 18.30-دا م. گوركي اتىنداعى مەملەكەتتىك اكادەميالىق ورىس دراما تەاترىندا ش. قۇسايىنوۆ اتىنداعى اقمولا وبلىستىق قازاق مۋزىكالىق دراما تەاترىنىڭ ت. احمەتوۆتىڭ «شاكارىم» سپەكتاكلى قويىلادى.
امانعالي قالجانوۆ
