ەلوردادا 23 قازان – 3 قاراشا ارالىعىندا بوكستان جاسوسپىرىمدەر جانە جاستار اراسىنداعى ازيا چەمپيوناتى وتەدى. استانا قالاسى اكىمدىگىنىڭ, تۋريزم جانە سپورت مينيسترلىگىنىڭ قولداۋىمەن وتكىزىلەتىن جارىسقا 23 ەلدىڭ سپورتشىلارى قاتىسادى.
«Beeline Arena» سپورت كەشەنىندە كەرىلگەن شارشى الاڭدا وزبەكستان, قىتاي تايبەي, جاپونيا, فيليپپين, گونكونگ, وڭتۇستىك كورەيا, موڭعوليا, يران, قىرعىزستان, ءۇندىستان, ۆەتنام, تايلاند, بىرىككەن اراب امىرلىكتەرى, تاجىكستان, تۇرىكمەنستان, پالەستينا, پاكىستان, يەمەن, يراك, يوردانيا, كۋۆەيت, مالايزيا جانە قازاقستان بوكسشىلارى جەكپە-جەككە شىعادى.
وليمپيادالىق جۇيە بويىنشا وتەتىن چەمپيوناتتا 2007 جانە 2008 جىلدارى تۋعان جاسوسپىرىمدەر 13 سالماقتا, قىزدار 12 سالماقتا سىنعا تۇسەدى. 200 بوكسشى قولعاپ تۇيىستىرەدى.
ال جاستار اراسىنداعى بىرىنشىلىككە 2005 جانە 2006 جىلى تۋعاندار باق سىنايتىن بولادى.
ازيا چەمپيوناتى «Qazsport» تەلەارناسىنان تىكەلەي ەفيردە كورسەتىلەدى. فينالدىق جەكپە-جەكتەر 2-3 قاراشادا وتەدى.
جانكۇيەرلەر ءۇشىن جارىسقا كىرۋ تەگىن.
