استانا اكىمدىگىندە قالاارالىق باعدارلار سىزباسىن وزگەرتۋ جانە جاقىندا عانا اشىلعان «الاي-Astra» مەن كەنمارت – Astra» كولىك ورتالىقتارىنىڭ جۇمىسىنا ارنالعان ءباسپاسوز ءماسليحاتى ءوتتى. وعان ەلوردالىق جولاۋشىلار كولىگى باسقارماسىنىڭ باسشىسى بەكمىرزا يگەنبەردينوۆ, «استانا LRT» جشس جولاۋشىلار كولىگى ءبولىمىنىڭ باسشىسى بەيبىت ەسجانوۆ جانە وسى سەرىكتەستىكتىڭ جەتەكشى مامانى ءابدىحاميت تاماباەۆ قاتىستى.
كەيىنگى جىلدارى ەلورداداعى كولىك كەشەنىن جاڭعىرتۋ ماقساتىندا بىرقاتار جوبالار قولعا الىندى. ناتيجەسى دە جامان ەمەس. تاياۋدا استانادا «الاي-Astra» جانە كەنمارت – Astra» اتتى جولاۋشىلاردى قالاارالىق تاسىمالداۋدىڭ ەكى كولىك ورتالىعى پايدالانۋعا بەرىلدى. سول جايىندا جۋرناليستەرگە قالالىق جولاۋشىلار كولىگى باسقارماسىنىڭ باسشىسى بەكمىرزا يگەنبەردينوۆ كەڭىرەك بايانداپ بەردى. ونىڭ ايتۋىنشا, كولىك ورتالىعىنىڭ اۋماعى جولاۋشىلارعا ىڭعايلى جاسالعان. اۆتوبۋسقا ەركىن ءمىنىپ, تۇسە الاسىز. بيلەت كاسسالارى مەن كۇتۋ زالى جانە زات ساقتاۋ كامەراسى دا بۇگىنگى تالاپقا ساي جابدىقتالعان. ورتالىق اۋماعىندا 800 ماشيناعا ارنالعان ورىنتۇراق بار.
– ءبىز وسى ەكى كولىك ورتالىعىن پايدالانۋ ارقىلى ۇلكەن كوشەلەرگە تۇسەتىن جۇكتەمەنى جانە «استانا» تەمىرجول ۆوكزالى مەن «ساپارجاي» اۆتوبەكەتى جانىنداعى كولىك كەپتەلىستەردى ازايتامىز. ءبىر جاعىنان جۇرتشىلىق تەمىرجول ۆوكزالى ايماعىنان قالالىق باعدارلارعا ورىن اۋىستىرۋعا جۇمسايتىن ۋاقىتتى قىسقارتادى. قالاارالىق باعدارلار باعىتىنىڭ جاڭا سىزباسى قالاعا كىرمەي اينالما جولدارمەن وتەدى. بۇل الەمدىك تاجىريبەدە ىسكە اسقان جوبا, – دەدى جولاۋشىلار كولىگى باسقارماسىنىڭ باسشىسى.
ەندى جاڭا بوي كوتەرگەن ەكى اۆتوبەكەتكە كەلەيىك. «الاي-Astra» كولىك ورتالىعى س 316 كوشەسىندە ورنالاسقان. دالىرەك ايتقاندا, ورتالىق بازاردان كەيىن. ال «كەنمارت – Astra» بەكەتى استانا-قاراعاندى تاس جولىنداعى 45 عيمارات مەكەنجايىندا قونىس تەپكەن.
الداعى 22 شىلدەدەن «الاي-Astra» ورتالىعىنان پاۆلودارلىق باعىتتا جۇرەتىن قالاارالىق اۆتوبۋستار جولعا شىعادى. رەسمي قالاارالىق تاسىمالداۋشىلار كۇن سايىن 23 رەيسكە قىزمەت كورسەتەتىن 9 باعدارمەن جولاۋشىلاردى تاسىمالداسا, ءدال سول كۇنى «كەنمارت – Astra» بەكەتىنەن قاراعاندى باعىتى نەگىزىندە كۇن سايىن 41 رەيسكە قىزمەت كورسەتەتىن 8 باعداردى جۇزەگە اسىرادى. «ساپارجاي» ۆوكزالى 30 باعدارعا قىزمەت كورسەتەدى.
«الاي-Astra» كولىك ورتالىعىن قامتاماسىز ەتۋ ءۇشىن №7, 11, 34,38, 39, 41, 307, 503 جانە 7 قالالىق پەن 1 قالا ماڭى باعدارى جۇمىس ىستەيدى. وعان 61 اۆتوبۋس جۇكتەلگەن. «كەنمارت – Astra» اۆتوبەكەتىن قامتۋ ءۇشىن №9, 29, 80, 304, 315, 506 جانە 4 قالالىق پەن 2 قالا ماڭى باعدارى قىزمەت كورسەتەدى. وعان 65 اۆتوبۋس تارتىلعان. سونىمەن بىرگە ەل ازاماتتارى ءۇشىن «نۇرلى جول» تەمىرجول ۆوكزالى مەن «الاي-Astra» ورتالىعىن بايلانىستىراتىن №201 جاڭا تۇنگى ەكسپرەسس باعدارى ىسكە قوسىلماق. ايتا كەتەرلىك, ەكى كولىك ورتالىعىنان جۇرەتىن قالاارالىق رەيستەرگە بيلەتتەردى سول اۆتوبەكەتتەردىڭ وزىنەن نە بولماسا «ساپارجاي» اۆتوۆوكزالىنان ساتىپ الۋعا بولادى. الدىن الا ساتىپ الىنعان قالاارالىق جول بيلەتتەرى بارلىق اۆتوبەكەتتەردە جارامدى سانالادى.
سونداي-اق, ءباسپاسوز جيىنىندا اسىرەسە, جازدىڭ ىستىق كۇندەرىندە كەيبىر قوعامدىق كولىكتەردە سالقىنداتقىش جۇيەسى جۇمىس ىستەمەي, جولاۋشىلار تاراپىنان مازاسىزدىق تۋاتىندىعى ايتىلدى. وعان «استانا LRT» جشس جولاۋشىلار كولىگى ءبولىمىنىڭ باسشىسى بەيبىت ەسجانوۆ جاۋاپ بەردى. «قالاداعى جاڭا اۆتوبۋستاردىڭ بارىندە كليمات باقىلاۋ جۇيەسى ورناتىلعان. وندا كونديتسيونەر جۇمىس ىستەمەۋ مۇمكىن ەمەس. كەيدە قوعامدىق كولىككە مىنگەن انالار جاس بالاسىنا سۋىق ءتيىپ قالماسىن دەپ جۇرگىزۋشىگە سالقىنداتقىشتى وشىرۋگە ءوتىنىش جاسايدى. سونداي جاعدايدا بولماسا. ەكىنشىدەن, بارلىق اۆتوبۋس تاڭەرتەڭ جۇمىسقا شىعاردا تولىق تەحنيكالىق تەكسەرۋدەن وتەدى. ەگەر ول تالاپقا ساي كەلمەسە, جەلىگە جىبەرىلمەيدى. ءبىز بۇل جاعدايدى ءالى دە قاداعالايمىز» دەدى ول.
ءتۇيىپ ايتقاندا, ەندى ەلوردادان جان-جاققا باعىت الاتىن قالاارالىق تاسىمالدىڭ قارقىنى تاسقىنداماق.
ازامات ەسەنجول
