پرەمەر-مينيستر ءاليحان سمايىلوۆ ەلىمىزگە جۇمىس ساپارىمەن كەلگەن گەرمانيانىڭ سىرتقى ىستەر ءمينيسترى اننالەنا بەربوكپەن كەزدەستى. تاراپتار ءوزارا تاۋار اينالىمىن كەڭەيتۋ, جاڭارتىلاتىن ەنەرگيا كوزدەرى مەن لوگيستيكالىق ينفراقۇرىلىمدى دامىتۋ, ينۆەستيتسيالىق ارىپتەستىك ماسەلەلەرىن تالقىلادى, سونداي-اق حالىقارالىق كۇن تارتىبىندەگى وزەكتى ماسەلەلەر بويىنشا اڭگىمە ءوربىتتى.
پرەمەر-مينيستر گەرمانيا قازاقستاننىڭ ەۋروپالىق وداقتاعى ماڭىزدى ساۋدا-ەكونوميكالىق جانە ينۆەستيتسيالىق سەرىكتەسى ەكەنىن اتاپ ءوتتى. وسىعان بايلانىستى استانا, الەمدىك ەكونوميكاداعى جاعىمسىز فاكتورلارعا قاراماستان, بەرلينمەن ءوزارا ءىس-قيمىلدىڭ جوعارى دەڭگەيىن ساقتاپ, ءارى قاراي نىعايتۋعا نيەتتى. ءاليحان سمايىلوۆتىڭ مالىمدەۋىنشە, وتكەن جىلى قازاقستان ەكونوميكاسىنا تىكەلەي نەمىس ينۆەستيتسيالارىنىڭ كولەمى 25%-عا ارتىپ, $320 ملن-نان استى. سونداي-اق وتكەن جىلى ەكى ەل اراسىنداعى تاۋار اينالىمى دا 6%-دان استامعا ءوسىپ, $2,2 ملرد-تى قۇرادى. بيىل دا بۇل كورسەتكىشتەر ءوسىپ كەلەدى.
«ينۆەستيتسيالىق ىنتىماقتاستىقتى ارتتىرۋ جانە ءوزارا ساۋدا كولەمىن ۇلعايتۋ بويىنشا ايتارلىقتاي الەۋەتىمىز بار» دەدى ءاليحان سمايىلوۆ.
ونىڭ ايتۋىنشا, ەكى ەل اراسىنداعى ىنتىماقتاستىقتىڭ ناتيجەسى رەتىندە جالپى قۋاتى 45 گۆت جەل جانە كۇن ەلەكتر ستانتسيالارى مەن «جاسىل» سۋتەگى وندىرەتىن ەنەرگەتيكالىق كەشەن سالۋ بويىنشا جوسپارلانعان جوبالاردى ايتۋعا بولادى.
«بۇگىنگى تاڭدا بۇل – الەمدەگى ءىرى جوبا, الايدا قازاقستان بۇل جوبامەن شەكتەلىپ قالمايدى. ەلىمىزدىڭ الەمدىك ماسشتابتا «جاسىل» سۋتەگى ءوندىرىسىنىڭ جەتەكشى ورتالىقتارىنىڭ قاتارىنا كىرۋ ءۇشىن بارلىق مۇمكىندىكتەرى بار دەپ سانايمىن» دەدى ءاليحان سمايىلوۆ.
سونىمەن قاتار پرەمەر-مينيستر نەمىس تارابىنىڭ استانادا گەرمانيا حالىقارالىق ىنتىماقتاستىق قوعامىنىڭ قامقورلىعىمەن سۋتەگى ديپلوماتياسى كەڭسەسىن اشۋ باستاماسىنىڭ ماڭىزىن اتاپ ءوتتى.
«ول ەكى ەلدىڭ ۇكىمەتتىك جانە ساراپتامالىق توپتارى اراسىنداعى جاڭارتىلاتىن ەنەرگيا كوزدەرى سالاسىنداعى ەكىجاقتى ءوزارا ءىس-قيمىلدى نىعايتۋعا زور ۇلەس قوساتىنىنا سەنىمدىمىن» دەدى ءاليحان سمايىلوۆ.
ءوز كەزەگىندە اننالەنا بەربوك قازاقستاننىڭ سوڭعى جىلدارى ەكونوميكالىق جانە قوعامدىق-ساياسي سالالارداعى ەلەۋلى پروگرەسىن اتاپ ءوتتى. ول قازاقستان مەن گەرمانيانىڭ كوپتەگەن باعىت بويىنشا, سونىڭ ىشىندە ەنەرگەتيكا مەن ونەركاسىپتە ەكونوميكالىق ءوزارا ءىس-قيمىلدى ودان ءارى دامىتۋ بويىنشا زور الەۋەتى بار ەكەنىن ايتتى.
