استانادا ناۋرىز مەرەكەسىنە ارنالعان حالىقتىق سەرۋەن ءوتتى (فوتو, ۆيدەو)
ەلوردادا ناۋرىز مەيرامىنا وراي حالىقتىق سەرۋەندەر ءوتىپ جاتىر. مەرەكە ەكى كۇن بويى تويلانادى.
باستى شارالاردىڭ ءبىرى «قازاق ەلى» مونۋمەنتى الدىنداعى الاڭدا ءوتتى. ادەتتەگىدەي, كيىز ۇيلەر تىگىلىپ, سپورت جارىستارى ۇيىمداستىرىلدى, التىباقان ورناتىلىپ, كونتسەرتتىك باعدارلاما كوپشىلىك نازارىنا ۇسىنىلدى.
– جىل سايىن كيىز ۇيلەر تىگىپ, باۋىرساق تاراتامىز, ناۋرىز كوجە مەن قىمىز ۇسىنامىز. كيىز ۇيلەردە داستارحاندار جايىلدى. ەڭ باستى مەرەكەلەردىڭ ءبىرى – گۇلدەنۋ مەن حالىق بىرىگەتىن كۇن. بۇگىن قوناقتاردى تاڭعى ساعات 8-دەن باستاپ قارسى الۋدامىز. ۇلكەن-كىشىنىڭ بارلىعى كەپ جاتىر, – دەدى قالالىق باسقارمالاردىڭ وكىلدەرىنىڭ ءبىرى ايمان شىنباەۆا.
حالىق اراسىندا كۇرەس, گىر سپورتى, ارمرەستلينگ, ارقان تارتۋ, اسىق اتۋ جارىستارى وتكىزىلدى. قالالىق مادەنيەت مەكەمەلەرى ادامدارعا مەرەكەلىك كوڭىل كۇي سىيلاۋدا. جاس تەاتر ارتىستەرى استانالىقتاردىڭ نازارىنا تاقىرىپتىق كورىنىستەر ۇسىنۋدا, – دەپ حابارلايدى ەلوردا اكىمدىگىنىڭ سايتى.
مەرەكەلىك شارالار «بايتەرەك» مونۋمەنتىنىڭ الدىنداعى الاڭدا, سونداي-اق, قالالىق الاڭدا دا ءوتىپ جاتىر. قالالىق قىزمەتتەر كيىز ۇيلەر تىگىپ, ءتاتتى-دامدىلەر تاراتىپ, ساندىك بۇيىمداردى كوپشىلىككە كورسەتۋدە.
اشىق اسپان اياسىندا ءوتىپ جاتقان مەرەكەگە ەلىمىزدىڭ باسقا وڭىرلەرىنەن جانە شەت ەلدەردەن كەلگەن قوناقتار دا قاتىسۋدا. اق جاۋلىقتى اجەمىز قازاقستان حالقىنا ىزگى تىلەگىن ءبىلدىردى.
– كوكتەمنىڭ شۋاقتى كۇنىمەن بىرگە ءوزىمىزدىڭ ۇلتتىق, بۇكىل الەم مۇسىلماندارى تويلايتىن ءاز-ناۋرىز مەرەكەسى كەلىپ, بۇكىل ەل, بۇكىل حالىق شاتتانۋدا. ۇلىستىڭ ۇلى كۇنى وڭ بولسىن. اق مول بولسىن. زامانىمىز تىنىش بولىپ, بەيبىتشىلىك زامان بولسىن.
(ۆيدەو: قازاقپارات)
حالىقتىق سەرۋەندى تاماشالاعان ارمانبەك كۇنتۋعانۇلى دا ەلوردا تۇرعىندارى مەن قوناقتارىن ناۋرىز مەيرامىمەن قۇتتىقتادى.
– قازاقستان حالقىن ناۋرىز مەرەكەسىمەن قۇتتىقتايمىن, بەرەكە-بىرلىكتە تويلاي بەرەيىك. اسپانىمىز اشىق, ەلىمىز تىنىش بولسىن, – دەيدى ول.
ايتا كەتەيىك, ەلوردادا حالىقتىق سەرۋەن ەرتەڭ دە وتەدى. مەرەكەلىك شارالار «ستۋدەنتتىك» جانە «جەرۇيىق» پاركتەرىندە, «استانا-ارەنا» ستاديونى جانىنداعى ەتنواۋىلدا, قالالىق الاڭدا, قازاق ەلى مونۋمەنتىنىڭ جانە بايتەرەك مونۋمەنتىنىڭ جانىنداعى الاڭداردا ۇيىمداستىرىلادى.
astana-akshamy.kz
