استانادا قالاسىندا الماتى وبلىسىنىڭ كۇندەرى ءوتىپ جاتىر. «قۋاتتى ايماق – قۋاتتى قازاقستان» تاقىرىبى اياسىندا ءوتىپ جاتقان بۇل ەل تاۋەلسىزدىگىنىڭ 25 جىلدىعىنا ارنالىپ وتىر.
ەكى كۇنگە جوسپارلانعان كولەمدى شارا الماتى وبلىسىنىڭ اكىمى اماندىق باتالوۆتىڭ قازاق حالقىنىڭ ۇلى اقىنى, جىر جامپوزى جامبىل جاباەۆتىڭ ەسكەرتكىشىنە گۇل شوقتارىن قويۋ شاراسىمەن باستاۋ الدى. قازىرگى تاڭدا باۋىرجان مومىشۇلى كوشەسى بويىنداعى وقۋشىلار سارايىنىڭ جانىنداعى الاڭدا الماتى وبلىستىق تاۋار وندىرۋشىلەردىڭ اۋىل شارۋاشىلىق جارمەڭكەسى بولىپ جاتىر. جارمەڭكەگە وبلىستىڭ 16 اۋدانى, 3 قالاسىنىڭ شارۋالارى ءوزى ونىمدەرىن ۇسىنىپ وتىر.
استانا تۇرعىندارى مەن قالا قوناقتارىنا جالپى كولەمى 340 توننا اۋىل شارۋاشىلىعى ونىمدەرىنىڭ 38-دەن استام ءتۇرى ۇسىنىلدى. الماتى وبلىسىنان جەتكىزىلگەن تاۋارلاردىڭ جالپى قۇنى 160 ملن. تەڭگەنى قۇرادى.
ونىڭ ىشىندە: جىلقى ەتى – 1,8 توننا, قۇس ەتى – 7,0 توننا, بالىق ونىمدەرى – 11,8 توننا, كوكونىس – 100,2 توننا, الما, جەمىس-جيدەك – 30,5 توننا, كارتوپ – 47,0 توننا, ءسۇت ونىمدەرى – 13,8 توننا, شۇبات پەن قىمىز – 2,9 توننا, كۇرىش – 16,5 توننا, ۇن – 5,8 توننا, قانت –6,0 توننا, بال – 3,9 توننا, جۇمىرتقا – 16,0 مىڭ دانا, باكالەيا ونىمدەرى – 2,4 توننا جانە باسقا ءونىم تۇرلەرى 106,9 توننا.تاۋارلار قالاداعى بولشەك ساۋدا باعالارىنان 15-20 پايىزعا ارزانعا ساتىلىپ جاتىر. جارمەڭكەگە استانا قالاسىنىڭ اكىمى اسەت يسەكەشەۆ پەن الماتى وبلىسىنىڭ اكىمى اماندىق باتالوۆ قاتىستى.
سونىمەن قاتار, اكتسيا اياسىندا كىتاپ پەن ساندىك-قولدانبالى ونەر كورمەلەرى, ءوڭىر ارتىستەرىنىڭ قاتىسۋىمەن مەرەكەلىك كونتسەرتتەر وتۋدە. قالا تۇرعىندارى مەن قوناقتارى بۇگىن الماتى وبلىسىنىڭ اقىندارى مەن جازۋشىلارىنىڭ «جەرۇيىق مەكەن – جەتىسۋ» اتتى كىتاپ كورمەسى, سونداي-اق, ساندىك-قولدانبالى ونەر شەبەرلەرى مەن مۋزەي ەكسپوناتتارىنىڭ, «التىن ادام مەكەنى» كوركەمسۋرەت گالەرەياسى سۋرەتشىلەرىنىڭ كورمەسى وتەدى. وسى كۇنى قالا تۇرعىندارى مەن قوناقتارى ساعات 18:30 «جاستار» تەاترىندا «كەرەي – جانىبەك» سپەكتاكلىن تاماشالاي الادى.
مادەني شارالار مۇنىمەن شەكتەلىپ قالمايدى. ۇيىمداستىرۋشىلاردىڭ ايتۋىنشا, ەكى كۇنگە سوزىلاتىن مادەني شارا بارىسىندا كونگرەسس-حوللدا «تالدىقورعان – كەشە, بۇگىن, ەرتەڭ» كورمەسى مەن الماتى وبلىسى شىعارماشىلىق ۇجىمدارىنىڭ «جەتىسۋ – جۇماق مەكەنىم» اتتى گالا-كونتسەرتى وتەدى دەپ جوسپارلانىپ وتىر.
