استانادا تۇڭعىش رەت «استانا جۇلدىزى» رەسپۋبليكالىق ءتۋرنيرى ءوتتى
ەلوردانىڭ ىرگەسىندەگى «قازانات» اتشابارىندا العاش رەت «استانا جۇلدىزى» رەسپۋبليكالىق ءتۋرنيرى ءوتتى. تاۋەلسىزدىكتىڭ 25 جىلدىعىنا ارنالعان ءدۇبىرلى دودانى استانا قالاسىنىڭ اكىمى اسەت يسەكەشەۆ سالتاناتتى تۇردە اشتى.
ۇلتتىق سپورت تۇرلەرىنەن وتكەن تۋرنيرگە ەلىمىزدىڭ 14 وبلىسىنان جانە استانا مەن الماتى قالالارىنان كوماندالار كەلدى.
– ۇلتتىق سپورت تۇرلەرى ءبىزدىڭ تەرەڭ تاريحىمىز بەن مادەنيەتىمىزدىڭ اجىراماس بولىگى. استانا قالاسىنىڭ اكىمدىگى ۇلتتىق سپورت ويىندارىنىڭ جاندانۋىنا, بۇقارالىق سپورتتى دامىتۋعا جانە سالاۋاتتى ءومىر سالتىن قالىپتاستىرۋعا ۇنەمى قولداۋ كورسەتىپ كەلەدى. وسى ماقساتتا جىل سايىن قالامىزدا ۇلتتىق ويىندار مەن جارىستار بويىنشا 200-دەن اسا ءىس-شارا وتكىزىلۋدە. ەندى مىنە, تاعى ءبىر جوبانى ىسكە اسىرىپ وتىرمىز. بۇگىنگى فەستيۆال ءداستۇرلى سپورت ويىندارى مەن ۇلتتىق سالت-ءداستۇرىمىزدى جاڭعىرتقان, حالىققا رۋح بەرگەن, تاۋەلسىزدىك مەرەيتويىنا ارنالعان كەرەمەت شارا. ەلوردا اكىمدىگى الداعى ۋاقىتتا دا وسىنداي جوبالاردى قولداپ, ۇلتتىق سپورت تۇرلەرى مەن سالت-داستۇرلەرىمىزدى ناسيحاتتاۋعا كوڭىل بولەتىن بولادى. ەلباسىمىزدىڭ باستاماسىمەن وسى «قازانات» اتشابارىندا جالپى كوپشىلىكتى ۇلتتىق سپورت تۇرلەرىنە باۋليتىن ارنايى ورتالىق اشۋدى جوسپارلاپ وتىرمىز.
قۇداي قالاسا, مۇندا قاراپايىم حالىققا اتقا ءمىنۋدى ۇيرەنۋگە, اۋدارىسپاق, اسىق اتۋ, توعىزقۇمالاق ويناۋعا جانە وزگە دە ۇلتتىق سپورت تۇرلەرىن ۇيرەنۋگە جاعداي جاسالادى. پرەزيدەنتىمىز 2020 جىلعا دەيىن حالىقتىڭ 30 پايىزىن دەنە شىنىقتىرۋ مەن سپورتقا تارتۋ تۋرالى تاپسىرما بەرگەنىن بىلەسىزدەر. وسى رەتتە, استانا قالاسىنىڭ اكىمدىگى الداعى ەكى جىلدا بۇقارالىق سپورتتى دامىتۋ ماقساتىندا قالا بويىنشا 22 سپورت الاڭىن سالۋدى جوسپارلاۋدا, – دەدى ەلوردا باسشىسى اسەت يسەكەشەۆ.
ات شاپتىرىم جەردە حالىق الدىمەن تەڭگە ءىلۋ سايىسىن تاماشالادى. ودان كەيىن قىز قۋ كوپتىڭ كوڭىلىنەن شىقتى. ال بىلەكتىلەر اۋدارىسپاقتا ات ۇستىندە الىستى. ءۇش كۇنگە جالعاسقان تۋرنيردە كوكپارشىلاردىڭ ىشىنەن استانا قۇراماسى مەن اقمولا وبلىسىنىڭ كومانداسى فينالدا سىنعا ءتۇستى.
دۋماندى شارا بارىسىندا «قازاناتقا» قازاق اۋىلى قوندى. مۇندا 13 كيىز ءۇي تىگىلىپ, جينالعان جۇرتقا ۇلتتىق تاعامداردان ءدام ۇسىنىلدى. سونداي-اق جاستار ءۇشىن التىباقان قۇرىلىپ, بالالار اسىق ويناپ, لاڭگى تەپتى.
سونىمەن, «التىن جۇلدىزى» رەسپۋبليكالىق ءتۋرنيرىنىڭ باس جۇلدەسىنە استانا اكىمى اسەت يسەكەشەۆ اۆتوكولىك تىكتى. بۇل جۇلدەنىڭ يەگەرى ورتا قاشىقتىقتاعى جۇيرىكتەر بايگەسىندە انىقتالدى.
