بيىل استاناداعى جىلى ايالدامالاردىڭ سانى ون ەسەگە كوبەيەتىن بولدى. ياعني 27-دەن بولەك, ەلوردادا تاعى 200 جابىق ايالداما سالىنباق. بۇل تۋرالى استانا قالاسىنىڭ اكىمى اسەت يسەكەشەۆ اكىمدىكتە وتكەن اپپاراتتىڭ كەزەكتى اپتالىق وتىرىسىندا مالىمدەدى. قالا باسشىسى اۋدان اكىمدەرىنە ءبىلىم, دەنساۋلىق ساقتاۋ جانە الەۋمەتتىك قورعاۋ باسقارمالارىمەن بىرلەسىپ, جىلى ايالداما سالۋدىڭ جوسپارىن جاساۋ كەرەكتىگىن ايتتى.
استانا الەمدەگى ەڭ سۋىق باس قالالاردىڭ ءبىرى ەكەن. سوندىقتان وسىعان سايكەس شارالار قولدانۋ قاجەتتىگى گازەتىمىزدە جازىلعان ەدى. مۇندا جىلى ايالدامالاردىڭ كوپتەپ قاجەت ەكەنى دە بىرنەشە مارتە قالامىمىزعا ارقاۋ بولدى.
ەستەرىڭىزدە بولسا, وتكەن ايدىڭ سوڭىندا «جىلى ايالدامالار جىرى», ال اقپاننىڭ ورتاسىندا «جىلى ايالدامالاردىڭ ءجونى بولەك» دەگەن تاقىرىپپەن «استانا اقشامى» گازەتىندە قوس ماقالا جارىق كوردى. «جىلى ايالدامالار جىرى» ماقالاسىندا استاناداعى مىڭعا جۋىق ايالدامانىڭ تەك 27-ءسى عانا جىلى ايالدامالار ەكەنى, «Astana» اكك» ۇك» اق-تىڭ بيىل 100 جابىق ايالداما سالۋدى جوسپارلاپ وتىرعانى تۋرالى اقپاراتتار قامتىلعان بولاتىن. سونىمەن قاتار, ءباسپاسوز ارقىلى قۇزىرلى مەكەمەلەرگە الداعى ۋاقىتتا سالىناتىن جابىق ايالدامالار بالاباقشا مەن مەكتەپ, اۋرۋحانا سياقتى الەۋمەتتىك نىسانداردىڭ ماڭىندا, سول سياقتى ۇيلەرى ايالداماعا وقشاۋ ورنالاسقان قالانىڭ قيىر شەتىندەگى ىقشام اۋدانداردا ورناتىلسا دەگەن ۇسىنىس-تىلەك تە جولدانعان-دى. ال «جىلى ايالدامالاردىڭ ءجونى بولەك» دەگەن ماقالادا لوندون, حەلسينكي, ستوكگولم سياقتى شەتەلدىك ۇلكەن قالالارداعى بارلىق جاعدايى قاراستىرىلعان جىلى ايالدامالاردىڭ تاجىريبەسىمەن بولىسكەن بولاتىنبىز. البەتتە, شەتەلدىك وزىق ايالدامالار تۋرالى اقپاراتقا كوز جۇگىرتكەندە, ەرىكسىز تاڭداي قاعاسىڭ. بىزدە دە سولاي بولعانىن قالايسىڭ, ارينە. دەگەنمەن بيىل استاناداعى جىلى ايالدامالار سانى ارتاتىن بولدى.
– ەڭ الدىمەن جىلى ايالدامالار مۇمكىندىگى شەكتەۋلى جاندار مەن بالالارعا قولايلى, ياعني مەكتەپ, اۋرۋحانا سياقتى باسقا دا الەۋمەتتىك نىساندارعا جاقىن بولۋى كەرەك. وسى جىلى قاجەتتى دەگەن ورىندارعا 200 ايالدامانى كۇز-قىس ايلارى جاقىنداعانشا ورناتىپ ۇلگەرۋگە ءتيىسپىز, – دەگەن اسەت يسەكەشەۆ جاۋاپتى ماماندارعا بولاشاق جىلى ايالدامالار ءتىزىمىن استانا اكىمدىگىنىڭ رەسمي سايتىندا جاريالاپ, قالا تۇرعىندارىمەن بىرىگىپ تالقىلاۋ كەرەكتىگىن تاپسىردى.
اتالمىش تاقىرىپ الدا دا تىلشىلەردىڭ نازارىنان تىس قالمايتىن بولادى.
نۇرداۋلەت كاكىشەۆ
