استانادان الاكولگە تىكەلەي پويىز جۇرەدى

«تەمىرجول – ەلىمىزدىڭ تۋريزم سالاسىن دامىتۋدا ەرەكشە ءرول اتقارادى. بيىل الاكولگە استانا, الماتى, شىعىس قازاقستان جانە اباي وبلىسىنان تىكەلەي پويىز قاتىناي باستايدى. سونداي-اق, العاش رەت قىزىلوردادان 12 باعىت بويىنشا پويىزداردى ىسكە قوسقالى وتىرمىز. ونىڭ ىشىندە 10 باعىت بويىنشا «جولاۋشىلار تاسىمالى» اق پويىزدارى جانە ەكى باعىتقا جەكە تاسىمالداۋشىلاردىڭ پويىزى جۇرەدى», – دەدى جانىبەك تايجانوۆ ۆەدومستۆودا وتكەن بريفينگىدە.

ونىڭ ايتۋىنشا, پويىزداردىڭ سانى وتكەن جىلمەن سالىستىرعاندا 16 مىڭعا ارتقان. جازعى ماۋسىمدا جولاۋشىلاردىڭ ىڭعايلىلىعى ءۇشىن 270 مىڭ ۆاگون ورنىمەن قامتىماق.

«ۇلتتىق تاسىمالداۋشى ءوز پويىزدارىن اۋانى باپتاۋ جۇيەسىمەن جابدىقتايدى», – دەپ سەندىردى باسقارما باسشىسى.

«جولاۋشىلار تاسىمالى» اق-نىڭ بيىل ىسكە قوسىلاتىن باعىتتارى:
– № 254/253 «استانا-دوستىق»;
– №207/208, №221/222, №211/212 «الماتى-2-دوستىق»;
– №457/458 «سەمەي-دوستىق»;
– №459/460 «وسكەمەن-دوستىق»;
– №21/22, № 6942/6941 «الماتى-دوستىق»;
– №21/22, №6942/6941 «قىزىلوردا-دوستىق».

جەكە تاسىمالداۋشىلاردىڭ مارشرۋتتارى:

– №337/338 «الماتى-2-دوستىق» – «Vagon Service Alliance» جشس;
– №122/121, №6942/6941 «استانا-دوستىق» – «ارايترانس كز» جشس.

«الاكول باعىتىنداعى پويىزدار تۋريستەر اراسىندا تانىمال جالاڭاشكول, اقشي جانە بەسكول ستانتسيالارىندا توقتايدى. وندا جولاۋشىلاردىڭ جايلىلىعى مەن قاۋىپسىزدىگىن قامتاماسىز ەتۋ ءۇشىن قاجەتتى جاعدايلار جاسالعان. اتاپ ايتقاندا, پەرروندار ۇلعايتىلدى, كۇتۋ زالدارى مەن كاسسالار جوندەلدى. جولاۋشىلارعا ىڭعايلى بولۋ ءۇشىن ستانتسيالاردا كاسسيرلەردىڭ اۋىسىمدىق جۇمىسى ۇيىمداستىرىلدى», – دەدى ج. تايجانوۆ.