استانا قالالىق اكىمدىگىنىڭ الدىندا «قورعاۋشى اتاعىنا لايىق بول!» دەگەن اتپەن جاس ساربازداردى اسكەرگە شىعارىپ سالۋ ءراسىمى ءوتتى. قازاقستان رەسپۋبليكاسى قارۋلى كۇشتەرىنىڭ 25 جىلدىعىنا وراي ۇيىمداستىرىلعان شارادا ساربازداردى جىگەرلەندىرەتىن سوزدەر ايتىلىپ, پاتريوتتىق اندەر شىرقالدى.
سالتاناتتى شاراعا قالا اكىمىنىڭ ورىنباسارى اندرەي لۋكين, قر قورعانىس مينيسترلىگى ۇيىمداستىرۋ-جۇمىلدىرۋ دەپارتامەنتىنىڭ باسشىسى, گەنەرال-مايور ءمۇسىلىم دايىروۆ, اقمولا گارنيزونىنىڭ اسكەري پروكۋرورى, ادىلەت پولكوۆنيگى دانيار جۇمادىلداەۆ باستاعان اسكەري قىزمەتكەرلەر قاتىستى. سونداي-اق, جاس ساربازداردى مەكتەپ وقۋشىلارى مەن ورتا جانە جوعارى وقۋ ورىندارىنىڭ ستۋدەنتتەرى شىعارىپ سالدى. ەڭ ءبىرىنشى بولىپ اندرەي لۋكين ءسوز الىپ, ساربازدارعا ءسات-ساپار تىلەدى.
– اسكەري قىزمەت ەر-ازاماتتىڭ ومىرىندەگى ەڭ ماڭىزدى مىندەت بولىپ سانالادى. ءويتكەنى سىزدەر وتان الدىنداعى بورىشتارىڭىزدى وتەپ, ەل تىنىشتىعىن كۇزەتەيىن دەپ وتىرسىزدار. ءدال قازىرگى كەزدە الاڭدا تۇرعان ساربازداردىڭ اتا-انالارى مەن تۋعان-تۋىستارى قوبالجىپ تۇرعانى جاسىرىن ەمەس. الايدا ساپتا تۇرعان ساربازداردىڭ اسكەرگە بارعاننان كەيىن شىنىعىپ, شىمىر بولىپ ورالاتىنىن قاپەردەن شىعارماعان ءجون. سوندىقتان دا سىزدەر اسكەردە جۇرگەن كەزدە ءبىر-بىرلەرىڭىزگە قولداۋ كورسەتىپ, ابىرويمەن ورالىڭىزدار, – دەدى ول.
ءسوز سوڭىندا ول كوپشىلىكتى 7 مامىر – وتان قورعاۋشىلار كۇنى جانە جەڭىستىڭ 72 جىلدىعىمەن قۇتتىقتادى. ال گەنەرال-مايور ءمۇسىلىم دايىروۆ بولسا جاس ساربازداردى جىگەرلەندىرەتىن سوزدەر ايتىپ, ءوز اقىل-كەڭەستەرىن جەتكىزدى. ونىڭ ايتۋىنشا, اسكەرگە بارىپ, ەلىنە قىزمەت ەتۋ – ءاربىر ازاماتتىڭ مىندەتى.
– قۇرمەتتى شاقىرۋشىلار! سىزدەر اسكەري مىندەتتەرىڭىزدى اتقارۋ ءۇشىن اتتاناتىن بيىلعى جىل – ەرەكشە جىل. ويتكەنى قازاقستان رەسپۋبليكاسى قارۋلى كۇشتەرىنىڭ قۇرىلعانىنا 25 جىل تولىپ وتىر. ءبىزدىڭ قازىرگى تاڭداعى قارۋلى كۇشتەرىمىز – زامان تالابىنا ساي, كاسىبي دەڭگەيى جوعارى دەڭگەيدەگى ارميا. اسكەر ءاربىر ەر-ازاماتتى تارتىپكە جانە جاۋاپكەرشىلىككە جەتەلەيدى. سوندىقتان دا الداعى قابىلدايتىن ءاسكەري انتتارىڭا بەرىك بولىڭدار. وتان الدىنداعى بورىشتارىڭدى ابىرويمەن اتقارىپ, اتا-انالارىڭا, تۋعان-تۋىسقاندارىڭا امان-ەسەن ورالۋلارىڭا شىن جۇرەكتەن تىلەكتەسپىن. جولدارىڭ اشىق بولسىن! – دەدى گەنەرال-مايور.
شارا بارىسىندا استانا قالاسىنىڭ ارنايى ماقساتتاعى دەسانتتىق-شابۋىل بريگاداسى جۇرتشىلىققا قويان-قولتىق جەكپە-جەكتەن ونەر كورسەتتى. سونداي-اق, الاڭدا «ايبىن-2015, 2016» رەسپۋبليكالىق اسكەري پاتريوتتىق جيىنىنا قاتىسۋشى نارتاي نۇرلانۇلى جانە №25 مەكتەپتىڭ وقۋشىلارى مەرەكەلىك قويىلىم كورسەتتى.
سەرىك جولداسباي
