الماتى وبلىسى
جەتىسۋ وڭىرىندە بۇرىن جارامسىز بولىپ كەلگەن 127 مىڭ گەكتار القاپ ىسكە قوسىلدى. ونىڭ 72 مىڭ گەكتارى – تالدىقورعان, 55 مىڭ گەكتارى الماتىنىڭ ۇلەسىنە تيەدى.
اقمولا وبلىسى
وبلىستىڭ ەلوردامەن ىرگەلەس جاتقان اۋداندارىندا جىلىجاي كەشەندەرى كوپتەپ سالىنۋدا. ءبىر عانا ارشالى اۋدانىندا 10-عا جۋىق باقشا شارۋاشىلىعى بار. بيىل وسى اۋداندا تاعى 2 جىلىجاي ىسكە قوسىلادى. مۇنداي نىساندار استانانىڭ ازىق-تۇلىك بەلدەۋىن قالىپتاستىرىپ, باس قالا تۇرعىندارىن ساپالى ونىمدەرمەن قامتاماسىز ەتۋدە.
ماڭعىستاۋ وبلىسى
وڭىردە 5 مىڭعا جۋىق ادام تسيفرلىق ساۋاتتىلىعىن ارتتىرىپتى. 1 ماۋسىمنان باستاپ اشىلعان 65 مەكتەپتە ينفورماتيكا مۇعالىمدەرى مەن IT-ماماندار حالىققا تەگىن كەڭەس بەرىپ, ساۋاتىن اشۋدا. بۇگىنگە دەيىن وبلىس حالقىنىڭ 80 پايىزى ەلەكتروندى مەديتسينالىق كارتانى قولدانادى.
جامبىل وبلىسى
جامبىل وبلىسىندا تاۋ بوكتەرىندە تۇتانعان ءورت ءبىر تاۋلىكتەن كەيىن ءسوندىرىلدى. «ءتىلسىز جاۋدىڭ» اياقاستىنان كۇش الۋىنا وڭىردە اۋا رايىنىڭ 40 گرادۋسقا دەيىن كوتەرىلۋى ناتيجەسىندە قۇرعاق ءشوپتىڭ جانۋى سەبەپ بولعان. ءبىر اي بۇرىن ءدال وسى رىسقۇلوۆ اۋدانىندا ءورت شىعىپ, 100 گەكتاردان استام جەردى جالىن شارپىدى.
تۇركىستان وبلىسى
بيىل تۇركىستان قالاسىندا 3 جاڭا قوسالقى ترانسفورماتورلىق ستانسا سالىنادى. سونىڭ ناتيجەسىندە حالىقتى ەلەكتر قۋاتىمەن ساپالى قامتاماسىز ەتۋ دەڭگەيى ارتادى. الداعى ۋاقىتتا وبلىستاعى بارلىق ەلەكتر جەلىلەرى جاڭعىرتىلادى. سوڭعى 2 جىلدا ەنەرگەتيكالىق ينۆەستيتسيالار ەسەبىنەن ايماقتا 1820 شاقىرىم ەلەكتر جەلىلەرى جاڭارتىلىپتى.
سولتۇستىك قازاقستان وبلىسى
پەتروپاۆل قالاسىنىڭ تۇرعىنى الەكساندر رەمشوۆ ەرتىس وزەنىنىڭ جاعاسىنان مۇز داۋىرىندە ءومىر سۇرگەن جانۋاردىڭ سۇيەگىن تاپتى. تاريحشى-عالىم اناتولي پلەشاكوۆ «بۇل – مامونتتىڭ نە ءجۇندى مۇيىزتۇمسىقتىڭ مويىن ومىرتقاسى» دەپ بولجاعان. وسىدان 40 مىڭ جىل بۇرىن تىرشىلىك ەتكەن الىپ جانۋاردىڭ سۇيەگى پالەونتولوگتاردى قاتتى قىزىقتىرۋدا. قالا تۇرعىنى تاۋىپ العان «ولجاسىن» تاريحي-ولكەتانۋ مۋزەيىنە بەرمەكشى.
شىعىس قازاقستان وبلىسى
اقسۋات اۋدانىندا قىمىزمۇرىندىق مەرەكەسى تويلاندى. بيىل ەكىنشى رەت ۇيىمداستىرىلعان شاراعا بارلىق اۋىلدار اتسالىستى. 50-گە جۋىق كيىز ءۇي تىگىلىپ, 60 شارۋاشىلىق اق داستارقانىن جايدى. ۇلتتىق مەرەكەدە 500 ليتر قىمىز بەن 100 ليتر شۇبات جيىلعان حالىققا تەگىن تاراتىلدى. سونداي-اق, ءار سالادا تابىسقا جەتكەن اقسۋاتتىقتارعا العىس حاتتار تابىس ەتىلدى.
