استانادان اۋىلعا دەيىن…
استانا
SCAT اۋە كومپانياسى استانا–ۆيلنيۋس باعىتىندا رەيس اشىپ, جولاۋشىلاردى قۋانتتى. بۇدان بىلاي ەلوردالىق جولاۋشىلار بەيسەنبى, جەكسەنبى كۇندەرى جايلى Boeing-737 ۇشاعىمەن ليتۆا استاناسىنا 4 ساعات 40 مينۋتتا ۇشىپ جەتەدى. استانا–ۆيلنيۋس–استانا باعىتىنىڭ ەڭ تومەنگى ءتاريفى 200 ەۋرونى قۇرايدى.
اقتوبە وبلىسى
اقتوبە قالاسىندا ەلىمىز بويىنشا «قازپوشتانىڭ» 4-ءىنشى ساندىق كەڭسەسى اشىلدى. ەلدى ەلەڭدەتكەنى, پوشتا بولىمشەسىنە كەلۋشىلەرگە قۇلتەمىر قىزمەت كورسەتە باستادى. بۇرىنعى قىزمەتتەن ءبىر ەرەكشەلىگى, تۇرعىندار بىرنەشە مينۋتتىڭ ىشىندە كوممۋنالدىق تولەمدەردى تولەپ, پوشتالىق سالەمدەمە جىبەرە الادى.
باتىس قازاقستان وبلىسى
وڭىردە بيىل كيىك سانى 1,5 ەسەگە ارتىپ, 140 مىڭعا جەتتى. ءساۋىر ايىندا 5 اۋداننىڭ اۋماعىن اۋەدەن شولىپ, 50 ساعات بويى ۇشىپ, جۇيرىك جانۋارلاردى ساناعان مامانداردىڭ جاعىمدى جاڭالىعى وسىنداي.
قاراعاندى وبلىسى
شەت اۋدانىنىڭ ورتالىعى اقسۋ-ايۋلى اۋىلىندا ساۋاپتى ءىس جاسالدى. اۋدانداعى مەملەكەتتىك قىزمەتشىلەر, جۋرناليستەر جانە اۋىل اقساقالدارىنىڭ باس بولۋىمەن بيىل 200 جىلدىق مەرەيتويى تويلاناتىن شورتانباي جىراۋدىڭ بەيىتىنىڭ باسىنا 160 ءتۇپ اعاش وتىرعىزىلدى.
قىزىلوردا وبلىسى
قىزىلوردا قالاسىنداعى قالتاي مۇحامەدجانوۆ اتىنداعى №1 ورتا مەكتەپ-گيمنازياسىنا ءبىر عاسىر تولدى. 1918 جىلى مۇسىلمان مەكتەبى بولىپ اشىلعان ءبىلىم ۇياسىنان ايگىلى اكادەميك شاحماردان ەسەنوۆ, جازۋشى-دراماتۋرگ قالتاي مۇحامەدجانوۆ, قوعام قايراتكەرى ابدىجالەل باكىر, مەديتسينا مايتالمانى تۇرعانباي ماحانوۆ جانە تاعى باسقالار تۇلەپ ۇشتى.
ماڭعىستاۋ وبلىسى
كەشە وبلىس ورتالىعى اقتاۋ قالاسىندا ەلوردانىڭ 20 جىلدىعىنا ارنالعان ءۇش كۇندىك بىرەگەي جوبا ءوز مارەسىنە جەتتى. استانالىق ارتىستەردىڭ گاسترولى اباي قۇنانباەۆ اتىنداعى مادەنيەت سارايىندا «ەلوردادان ەلگە سالەم!» اتتى كونتسەرتپەن قورىتىندىلاندى.
وڭتۇستىك قازاقستان وبلىسى
ءشاۋىلدىر ەلدى مەكەنىندە جاڭا ىقشام اۋدان بوي كوتەرەدى. قازىرگى كەزدە جالپى قۇنى 311 ملن تەڭگەنى قۇرايتىن 24 پاتەرلى 2 ءۇيدىڭ قۇرىلىسى ءجۇرىپ جاتىر. 2018 جىلدىڭ سوڭىندا پايدالانۋعا بەرىلەتىن 2-3 بولمەلى پاتەرلەر اگرونوم, ينجەنەر, مۇعالىم, دارىگەر سياقتى ماماندىق يەلەرىنە بەرىلەدى.