قىزىلوردا وبلىسى
بيىل قىزىلوردا وبلىسى شيەلى اۋدانىندا 1200 باس ءىرى قارا فەرماسىن ىسكە قوسىپ, وڭىردەگى تابيعي ءسۇت ءوندىرۋ ۇلەسىن ارتتىرۋ جوسپارلانىپ وتىر. ال الداعى 2019 جىلى ءسۇت كومبيناتىنىڭ قۇرىلىسى باستالماق.
الماتى
الماتى تسيفرلاندىرۋ بويىنشا قالالار اراسىنداعى دۇنيەجۇزىلىك رەيتينگتە 25-ورىننان كورىندى. تالداۋ ناتيجەسى كورسەتكەندەي, ۇلكەن قالادا قاۋىپسىزدىك ماسەلەسى وتە وزەكتى. ونىڭ باستى سەبەبى كوشى-قون كورسەتكىشى وتە جوعارى. ال قاۋىپسىزدىكتى قامتاماسىز ەتۋ ماقساتىندا تسيفرلاندىرۋ ءىسىن بەلسەندى قولعا الىپ جاتىر.
اقتوبە
ەلىمىزدىڭ بەس وڭىرىنەن 100-دەن اسا تالاپكەر «سەرپىن» الەۋمەتتىك جوباسى ارقىلى اقتوبەدەگى جوعارى وقۋ ورىندارىنا قابىلداندى. وتكەن جىلى وسى جوبا بويىنشا 134 ستۋدەنت ءبىلىم العان. ولار پەداگوگيكا سالاسىنىڭ 14 باعىتى بويىنشا وقىعان, ال بيىل پەداگوگيكا سالاسىنا قوسا, تەحنيكالىق ماماندىقتار دا قولجەتىمدى بولا باستادى.
اقتاۋ
اقتاۋدا اشىق اسپان استىندا امفيتەاتر اشىلدى. كەڭ, زاماناۋي ۇلگىدەگى ەرەكشە ساحنانىڭ ۇزىندىعى 70 مەتردى قۇرايدى, سونداي-اق بيىكتىگى 9 مەتر بولاتىن 19 باعاناسى بار. ساxنا «Led-پانەلمەن», سوڭعى ۇلگىدەگى جارىق تەحنيكالارىمەن جابدىقتالعان. بۇل ورىندا ءبىر مەزەتتە 1000 ونەرپازدىڭ ونەر كورسەتۋىنە جاعداي جاسالعان. ال ولاردى 25 مىڭ كورەرمەن تاماشالاي الادى.
تۇركىستان وبلىسى
تۇركىستان وبلىسىندا ش.قالداياقوۆ اتىنداعى «مەنىڭ قازاقستانىم» وبلىستىق ءان بايقاۋىنىڭ ىرىكتەۋ كەزەڭى ءوتتى. ۇلى كومپوزيتور اتىن ۇلىقتايتىن ءداستۇرلى ونەر دوداسىنىڭ اۋدان, قالا دەڭگەيىندە وتكەن ءبىرىنشى كەزەڭىنە 200-گە جۋىق ۇمىتكەر ءوتىنىش ءبىلدىرىپ, ونىڭ ىشىنەن 56 ۇمىتكەر وبلىستىق بايقاۋعا جولداما العان. ونەر بايگەسىنە 15-29 جاس ارالىعىنداعى ۇمىتكەرلەر باق سىنادى.
قاراعاندى وبلىسى
نۇرا اۋدانىنداعى شارۋا قوجالىقتارى كارتوپ ءوسىرۋ جۇمىسىندا ساندىق تەحنولوگيالاردىڭ تولىق كەزەڭىن ەنگىزدى. مۇندا 237 مىڭ گەكتار القاپقا ءداندى داقىلدار ەگىلسە, سونىڭ 922 گەكتارىنا كارتوپ سالىنعان. بۇل كورسەتكىش وتكەن جىلمەن سالىستىرعاندا 22,6 پايىزعا ارتقان.
پاۆلودار
پاۆلودارداعى ەرتىس وزەنىنىڭ جاعاجايى كوركەيىپ, تاعى ءبىر شاقىرىمعا ۇزارتىلاتىن بولدى. يگىلىگى مول ءىستىڭ ناتيجەسىندە جەرگىلىكتى حالىقتىڭ دەمالىس ورنى بەس شاقىرىمعا سوزىلماق. بۇل جوباعا دەمەۋشىلەر قاۋىمى 1 ملرد 300 ملن تەڭگە ءبولىپ وتىر.
