استانا
استانا قالالىق دەنساۋلىق ساقتاۋ باسقارماسى 80 مىڭنان استام مەديتسينالىق قۇجاتتى ەلەكتروندى فورماتقا اۋىستىردى. وسى ارقىلى قالا تۇرعىندارىنىڭ 93 پايىزى ەلەكتروندىق دەنساۋلىق قۇجاتىنا قول جەتكىزدى. بۇگىندە بارلىق مەديتسينالىق ۇيىم 100 پايىز ينتەرنەت جەلىسىنە قوسىلعان.
الماتى
وڭتۇستىك مەگاپوليس باسشىلىعى بيىلعى جىلى قوعامدىق كولىكتەردىڭ 80 پايىزىن جاڭارتادى. بۇل قالانىڭ اۆتوبۋس پاركىندەگى 1560 اۆتوبۋستىڭ تۇگەلگە جۋىعى وزگەرتىلەتىنىن بىلدىرەدى. وتكەن جىلى شاھارعا 479 اۆتوبۋس اكەلىنگەن بولسا, ونىڭ 80 پايىزى جەرگىلىكتى بيۋدجەت ارقىلى ساتىپ الىنعان. ال بيىل 569 اۆتوبۋس جەتكىزۋ جوسپارلانسا, ونىڭ 65 پايىزىن جەكە كومپانيالار اكەلەدى.
تۇركىستان وبلىسى
تۇركيانىڭ Dal Holding Investment CO. كومپانياسى وبلىستىڭ تۇركىستان جانە كەنتاۋ قالالارىندا قۇرامداستىرىلعان جىلىجاي كەشەنىن سالۋدى جۇزەگە اسىرادى. ول 200 گەكتاردان استام جەردە جىلىجاي شارۋاشىلىعىن دامىتىپ, وندا وسىرىلگەن ءونىمنىڭ 80 پايىزىن ەكسپورتقا شىعارادى. وبلىستا بۇعان دەيىن 1250 گەكتاردان استام جىلىجايلار بار ەدى. ونىڭ 50 پايىزىنان استامى سارىاعاش اۋدانىندا ورنالاسقان.
پاۆلودار وبلىسى
وبلىستا جەرگىلىكتى بيۋدجەت ەسەبىنەن ستۋدەنتتەرگە ءبىلىم بەرۋ گرانتتارى بەرىلەتىن بولدى. ولاردىڭ 65-ءى پەداگوگيكالىق ماماندىقتارعا, 35-ءى تەحنيكالىق جانە 50 گرانت جوعارى جانە جوعارى بىلىمنەن كەيىنگى ءبىلىمى بار ماماندارعا ءبولىندى. كونكۋرسقا بارلىعى 285 ءوتىنىش كەلىپ تۇسكەن. ولاردىڭ ىشىندە مەملەكەتتىك تىلدە ءبىلىم الۋ ءۇشىن – 211, ورىس تىلىندە ءبىلىم الۋ ءۇشىن 74 ءوتىنىش تىركەلگەن.
قوستاناي
قىتاي بيزنەسمەندەرى قوستاناي قالاسىندا تراكتور قۇراستىرۋ زاۋىتىن اشۋعا مۇددەلىلىك تانىتىپ وتىر. اتاپ ايتقاندا, YTO Group Corporation كومپانياسى قازاقستاندا «YTO» تراكتورلارىن قۇراستىرۋعا كىرىسكەلى تۇر. كاسىپورىن وكىلدەرى وسى ماسەلە جونىندە تاياۋ ارادا قازاقستانعا كەلىپ قايتپاق. قوستانايداعى يندۋستريالىق ايماقتا جۇزەگە اساتىن مەگا جوبانىڭ قۇنى 300 ملن اقش دوللارىن قۇرايدى.
قاراعاندى
كەنشىلەر استاناسىندا «تسيفرلى قازاقستان» مەملەكەتتىك باعدارلاماسى اياسىندا تسيفرلاندىرۋ كۇنى ءوتتى. باعدارلاما ءۇش بولىمنەن قۇرالدى. وعان قاراعاندى, پاۆلودار جانە شىعىس قازاقستان وبلىستارىنىڭ, استانا قالاسىنىڭ وكىلدەرى قاتىستى. قاتىسۋشىلار Smart city سالاسىندا جۇزەگە اسىرىلىپ جاتقان جوبالار تۋرالى ايتتى. شەشىمىن كۇتىپ تۇرعان ماسەلەلەر دە ورتاعا سالىندى.
اقتوبە
ارنايى كوميسسيا اقتوبەنى اباتتاندىرۋعا, كوگالداندىرۋعا جانە تازالىقتى قامتاماسىز ەتۋگە بولىنگەن بيۋدجەت قاراجاتىنىڭ ءتيىمدى جۇمسالۋىن تەكسەرەدى. جۇمىس توبىنا ەكونوميكا جانە بيۋدجەتتى جوسپارلاۋ, قارجى باسقارمالارى مەن باسقا دا قۇزىرلى مەملەكەتتىك ورگانداردىڭ باسشىلارى كىرەدى. مامانداردان قۇرالعان كوماندا قالالىق بيلىكتەردىڭ اقشالاي قاراجاتتى جۇمساۋ كەزىندەگى ناتيجەلىلىك پەن ۇنەمدەۋ قاعيدالارىن ساقتاۋلارىنا باعا بەرۋلەرى ءتيىس.
