استانا
30-31 تامىز كۇندەرى استانا تۇرعىندارى مەن قوناقتارى «Red Bus» اۆتوبۋستارىمەن استانانىڭ سول جاعالاۋىمەن تەگىن ەكسكۋرسياعا قاتىسا الادى. وزىنە ىڭعايلى ءتىلدى تاڭداۋ ءۇشىن ءار قاتىسۋشى وزىمەن بىرگە قۇلاققاپ اكەلۋى ءتيىس. اۆتوبۋستار ساعات 10.00-دەن باستاپ «AiLand» جانە «MEGA Silk Way» ايالدامالارىنان قوزعالادى.
ماڭعىستاۋ وبلىسى
ماڭعىستاۋ وبلىسىندا 2018-2019 وقۋ جىلىندا 9 جاڭا مەكتەپ پايدالانۋعا بەرىلمەك. ونىڭ ۇشەۋى – حالىق كوپ قونىستانعان جاڭاوزەن قالاسىندا, ەكەۋى مۇنايلى اۋدانىندا اشىلادى. وسىلايشا بيىل ايماقتا ءۇش اۋىسىمدا ءبىلىم بەرەتىن 8 مەكتەپتىڭ سانى 3-كە قىسقارماق.
قىزىلوردا وبلىسى
تامىز تۇگەسىلەر تۇستا جىلداعى داستۇرمەن قىزىلوردا ءوڭىرى كۇرىشكە وراق سالدى. كەردەلى اۋىلدىق وكرۋگىندەگى شارۋاقوجالىق شامامەن ءار گەكتاردان 50 تسەنتنەردەن ءونىم الۋدى مەجەلەدى. جالپى, بيىل شيەلى اۋدانى 24 مىڭ گەكتار جەرگە ءدان سەپسە, ونىڭ تەڭ جارتىسى – كۇرىش. ال وبلىس بويىنشا سىر مارجانىنىڭ ۇلەسى 87 مىڭ گەكتارعا جۋىقتايدى.
شىعىس قازاقستان وبلىسى
سەمەي قالاسى ماڭىنان ادام سۇيەگى مەن وعان تيەسىلى زاتتار تابىلدى. «مۇقىر اڭشىسى» دەپ ات قويىلعان بۇل جادىگەر ەرتە قولا داۋىرىنە جاتادى دەپ توپشىلانۋدا. قۇندى زاتتاردى «پريرتىشە» ولكەتانۋشىلار قوعامىنىڭ مۇشەلەرى مامىر ايىنىڭ سوڭىندا مۇقىر وزەنىنىڭ بويىنان تاپقان. ادام سۇيەكتەرىمەن قوسا جىلقىنىڭ دا قاڭقالارى تابىلعان.
اقمولا وبلىسى
اقمولا وبلىسىنىڭ ەرەيمەنتاۋ اۋدانىنداعى جەل ەلەكتر ستانساسى بۇگىنگە دەيىن 500 ملن كۆت ەنەرگيا ءوندىردى. 2015 جىلدىڭ تامىز ايىندا پايدالانۋعا بەرىلگەلى دامىلسىز جۇمىس ىستەپ تۇرعان جوبا جەرگىلىكتى تۇرعىنداردى دا تۇراقتى جۇمىسپەن قامتىپ وتىر. ونەركاسىپتىك ۇلگىدەگى العاشقى وتاندىق جەل ەلەكتر ستانساسى 60 گا اۋماقتى الىپ جاتىر.
اقتوبە وبلىسى
اقتوبە قالالىق ءماسليحاتى جاڭا ءتاريفتى بەكىتتى. بۇعان دەيىن جول ءجۇرۋ اقىسى 55 تەڭگە بولسا, ەندى 80 تەڭگەگە كوتەرىلدى. زەينەتكەرلەرگە, اۋعان سوعىسى ارداگەرلەرى مەن چەرنوبىل اپاتىنىڭ زاردابىن جويۋعا قاتىسقاندارعا جەڭىلدىك جاسالدى. ولار 60 تەڭگەمەن جۇرەدى.
سولتۇستىك قازاقستان وبلىسى
پەتروپاۆلدا كوپتەن كۇتكەن جاڭا مەشىت حالىق يگىلىگىنە بەرىلدى. كۇمبەزى كوكپەن تالاسقان ءزاۋلىم عيباداتحانا كونستيتۋتسيا مەرەكەسى قارساڭىندا قالا تۇرعىندارىنا تاماشا تارتۋ بولدى. مەشىت مۇناراسىنىڭ بيىكتىگى – 32 مەتر. جوبا قۇنى 1 ميلليارد تەڭگەدەن اسىپ جىعىلدى. اللا ۇيىندە ءبىر ۋاقىتتا 500-دەن استام ادام قۇلشىلىق ەتە الادى.
