استانادان اۋىلعا دەيىن…
جامبىل وبلىسى
تارازدا 80 وتباسى جاڭا پاتەرلەردىڭ كىلتىن الىپ, قونىس تويىن تويلادى. «نۇرلى جەر» باعدارلاماسى بويىنشا سالىنعان كوپ پاتەرلى تۇرعىن ۇيگە الەۋمەتتىك جاعىنان از قامتىلعاندار, سوعىس ارداگەرلەرى جانە ۇزاق جىلدار بويى كەزەكتە تۇرعان بيۋدجەتتىك مەكەمە قىزمەتكەرلەرى قونىستاندى.
تۇركىستان وبلىسى
تۇركىستان قالاسىندا «ولكەتانۋ» وقۋلىعىنىڭ تۇساۋكەسەر ءراسىمى ءوتتى. 5-7-سىنىپتارعا ارنالعان وقۋلىقتا تۇركىستان وبلىسىنىڭ گەوگرافيالىق ەرەكشەلىكتەرى, اۋماقتىق ورنى, ادەبيەتى مەن مادەنيەتى, تاريحى مەن ونەرى تولىق قامتىلعان.
الماتى قالاسى
الداعى ءۇش جىلدا 22 مىڭ ورىندىق 37 جاتاقحانا بوي كوتەرەدى. قالا بيلىگى كەيبىر ۋنيۆەرسيتەتتەرگە جەر تەلىمدەرىن ءبولىپ, قۇرىلىس الاڭدارىنا جىلۋ, سۋ, ەلەكتر ەنەرگياسى سياقتى ينجەنەرلىك جەلىلەردى تارتىپ, كومەك كورسەتۋدە.
اقمولا وبلىسى
بۋراباي باۋرايىندا «بۋراbike» ءداستۇرلى قايىرىمدىلىق ۆەلوشەرۋى ءوتتى. بۇقارالىق شاراعا بيىل 2300 ادام قاتىستى. ۆەلوسيپەدپەن شەرۋگە شىققاندار اراسىندا وليمپيادا چەمپيوندارى الەكساندر ۆينوكۋروۆ, سەرىك ساپيەۆ جانە كەشە عانا ازيا ويىندارىنىڭ ەكى دۇركىن چەمپيونى اتانعان الەكسەي لۋتسەنكو سياقتى تانىمال سپورتشىلار بولدى.
ماڭعىستاۋ وبلىسى
اقتاۋ قالاسىندا تۇڭعىش رەت سمارت-مەكتەپ اشىلادى. جاڭا زامان تالابىنا ساي سالىنعان عيماراتتا تولىعىمەن ساندىق ءبىلىم بەرۋ تەحنولوگياسى ەنگىزىلگەن. «اقىلدى مەكتەپ» جوباسى اياسىندا باقىلاۋ-وتكىزۋ قۇرىلعىلارى, اقپاراتتىق تەرمينالدار ورناتىلدى.
اقتوبە وبلىسى
اقتوبە وبلىسىندا ءبىلىم كۇنىنە وراي 9 جاڭا مەكتەپ پايدالانۋعا بەرىلەدى. بۇگىنگى تاڭدا اتالعان وڭىردە 27 مەكتەپتىڭ قۇرىلىسى ءجۇرىپ جاتىر. سونىڭ ىشىندە 15-ءى جىل اياعىنا دەيىن تاپسىرىلماق.
اتىراۋ وبلىسى
اتىراۋدا «اتا زاڭدى جاتقا بىلەمىن!» اتتى بايقاۋ ۇيىمداستىرىلدى. بايقاۋدىڭ ءناتيجەسىندە ۇزدىك شىققان ءۇش ستۋدەنت – نۇرداۋلەت باعىتجان, گۇلنۇر عاليەۆا جانە نازەركە نۇرمۇقانوۆالار ح.دوسمۇحامەدوۆ اتىنداعى اتىراۋ مەملەكەتتىك ۋنيۆەرسيتەتىنىڭ ءبىر جىلدىق وقۋ گرانتىنا يە بولدى.