استانا
1 ماۋسىمنان 31 شىلدەگە دەيىن ەلوردادا مەكتەپتەردىڭ, كوللەدجدەردىڭ جانە الەۋمەتتىك قىزمەت كورسەتۋ ورتالىقتارىنىڭ نەگىزىندە 6 مەن 74 جاس ارالىعىنداعى قالا تۇرعىندارى ءۇشىن تسيفرلىق ساۋاتتىلىق كۋرستارى ۇيىمداستىرىلادى.
الماتى وبلىسى
ەندى الماتىلىقتار ەلىمىزدەگى ەڭ تانىمال تۋريستىك ورىنداردىڭ ءبىرى – الاكولگە ۇشاقپەن جەتە الادى. بۇگىن الماتى اۋەجايىنان ۇشارالعا العاشقى رەيس كوككە كوتەرىلەدى. ۇشاقتار اپتاسىنا بەس رەت قاتىنايتىن بولادى. ءالماتى–ۇشارال–الماتى باعىتىنداعى ۇشاقتار بيلەتىنىڭ ءبىر باعىتتىق قۇنى – 10 مىڭ تەڭگە.
اتىراۋ وبلىسى
يساتاي اۋدانىنداعى قىزىلۇي اۋىلى 105 جىلدىعىن اتاپ ءوتتى. مەرەكەگە وراي «مەنىڭ اۋىلىم» شاراسى ۇيىمداستىرىلىپ, اۋىل تۇرعىندارى قىزىلۇيدىڭ ىرگەتاسى 1913 جىلى قالانعانىن ايعاقتايتىن ستەلا-بەلگىنىڭ ورناتىلۋىنا جانە ەلدى مەكەنگە تارتىلعان تازا اۋىزسۋ قۇبىرى مەن سۋ تاراتۋ عيماراتىنىڭ پايدالانۋعا بەرىلۋ راسىمىنە كۋا بولدى.
ماڭعىستاۋ وبلىسى
تۇپقاراعان اۋدانىنا قاراستى سايىن شاپاعاتوۆ اۋىلىنىڭ تۇرعىنى – 13 جاستاعى ءامىرحان دارحان 4 باۋىرىن, ياعني 9, 11 جاسار ىنىلەرى مەن 2, 4 جاستاعى ەكى قارىنداسىن ورتتەن امان الىپ قالدى. ءورت تۇتانعان كەزدە بالالاردىڭ اتا-اناسى تۇنگى كەزەكشىلىكتە جۇمىستا بولعان. وقيعانى ەسكە العان دارحان تەك باۋىرلارىن قۇتقارۋ باستى ماقساتى بولعانىن ايتادى.
وڭتۇستىك قازاقستان وبلىسى
وتىرارلىق تۇرعىن تۋعان جەرىنە سپورت كەشەنىن سالىپ بەردى. قاسيەتتى رامازان ايىندا اقتوبە اۋىلىندا زاماناۋي تالاپقا ساي 240 ورىندىق
اۋەسبەك قامباروۆ اتىنداعى سپورت كەشەنىن سالىپ بەرگەن جەكە كاسىپكەر ەسبول قامباروۆ اۋىل تۇرعىندارىن زور قۋانىشقا كەنەلتتى.
قىزىلوردا وبلىسى
جالاعاش اۋدانىندا «دومبىرا-دۋمان» اتتى دومبىراشىلار شەرۋى ءوتىپ, ءبىر مەزگىلدە 100 ونەرپاز قۇرمانعازى كۇيلەرىن ورىندادى. شاراعا مۋزىكا مەكتەبى مۇعالىمدەرى, وقۋشىلارى, ەتنو توپ دومبىراشىلارى, «مۇراگەر» دومبىراشىلار انسامبلىنەن قۇرالعان ونەرپازدار قاتىستى.
اقتوبە وبلىسى
اقتوبە قالاسىندا اشارشىلىق جانە قۋعىن-سۇرگىن قۇرباندارىنا ارنالعان ەسكەرتكىش بەلگى قويىلىپ, شاعىن اللەيا قايتا قالپىنا كەلتىرىلۋدە. قازىر ەسكەرتكىش ورناتۋ, كوگالداندىرۋ, ارلەۋ جۇمىسى ءجۇرىپ جاتىر. بارلىعى 6 جوبا ۇسىنىلىپ, وبلىستىق, رەسپۋبيكالىق كوميسسيا ەڭ ۇزدىگىن تاڭداپ الدى.
